ឆ្នាំ ២០២៦

សហស្សវត្សរ៍	សហស្សវត្សរ៍ទី ៣
សតវត្សរ៍	សតវត្សរ៍ទី ២១
ទសវត្សរ៍	ឆ្នាំ ២០២០
ឆ្នាំ	២០២៣ • ២០២៤ • ២០២៥ • គ.ស. ២០២៦ • ២០២៧ • ២០២៨ • ២០២៩

ឆ្នាំ ២០២៦ ក្នុង​ប្រតិទិន​ផ្សេងៗ
ពុទ្ធសករាជ	២៥៧០
ប្រតិទិនគ្រីកូរី	២០២៦ MMXXVI
Ab urbe condita	២៧៧៩
ប្រតិទិនអាមេនី	១៤៧៥ ԹՎ ՌՆՀԵ
ប្រតិទិនអាស៊ីរី	៦៧៧៦
ប្រតិទិនបាហៃ	១៨២–១៨៣
ប្រតិទិនសាកាបាលី	១៩៤៧–១៩៤៨
ប្រតិទិនបេងហ្កាល់	១៤៣៣
ប្រតិទិនប៊ែប៊ែរ	២៩៧៦
រាជ្យឆ្នាំអង់គ្លេស	៤ Cha. ៣ – ៥ Cha. ៣
ប្រតិទិនភូមា	១៣៨៨
ប្រតិទិនប៊ីហ្សង់តាំង	៧៥៣៤–៧៥៣៥
ប្រតិទិនចិន	甲辰年 (រោង ធាតុឈើ) ៤៧២៣ ឬ ៤៥១៦   — ដល់ — 乙巳年 (មមី ធាតុភ្លើង) ៤៧២៤ ឬ ៤៥១៧
ប្រតិទិនកូបទិក	១៧៤២–១៧៤៣
ប្រតិទិនឌីស្កតដ៍	៣១៩២
ប្រតិទិនអេត្យូពី	២០១៨–២០១៩
ប្រតិទិនហេប្រឺ	៥៧៨៦–៥៧៨៧
ប្រតិទិនហិណ្ឌូ	២០៨២–២០៨៣ (វិក្រមសម្វត) ១៩៤៧–១៩៤៨ (សកសម្វត) ៥១២៦–៥១២៧ (កលិយុគ)
ប្រតិទិនអូឡូសែន	១២០២៦
ប្រតិទិនអ៊ីហ្គបូ	១០២៦–១០២៧
ប្រតិទិនអ៊ីរ៉ង់	១៤០៤–១៤០៥
ប្រតិទិនឥស្លាម	១៤៤៧–១៤៤៨
ប្រតិទិនជប៉ុន	សករាជរេវ៉ា ៨ (令和８年)
ប្រតិទិនជ្វា	១៩៥៩–១៩៦០
ប្រតិទិនជូឆេ	១១៥
ប្រតិទិនជូលាន	គ្រីកូរីដក ១៣ ថ្ងៃ
ប្រតិទិនកូរ៉េ	៤៣៥៩
ប្រតិទិនមីនគួ	ROC ១១៥ 民國115年
ប្រតិទិនណានក្សាហ៊ី	៥៥៨
ប្រតិទិនសុរិយគតិថៃ	២៥៦៩
ប្រតិទិនទីបេ	ཤིང་མོ་སྦྲུལ་ལོ (រោងញីធាតុឈើ) ២១៥២ ឬ ១៧៧១ ឬ ៩៩៩    — ដល់ — མེ་ཕོ་རྟ་ལོ་ (មមីញីធាតុឈើ) ២១៥៣ ឬ ១៧៧២ ឬ ១០០០
ម៉ោងយូនីក	១៧៦៧២២៥៦០០ – ១៧៩៨៧៦១៤៩៩

គ.ស. ២០២៦ ត្រូវ​នឹង ព.ស. ២៥៧០ ជាឆ្នាំសកលចាប់ផ្តើមនៅថ្ងៃព្រហស្បតិ៍ តាមប្រតិទិនគ្រីកូរី ហើយជាឆ្នាំទី ២០២៦ នៃសកលសករាជ និងគ្រិស្តសករាជ។

• ឆ្នាំមមី អដ្ឋស័ក ចុល្លសករាជ ១៣៨៨ (ថ្ងៃទី១៦ ខែមេសា ជាថ្ងៃឡើងស័ក)។
• ឆ្នាំទី ៧ ក្នុងទសវត្សរ៍ឆ្នាំ ២០២០, ឆ្នាំទី ២៦ ក្នុងសតវត្សរ៍ទី២១ និងឆ្នាំទី ២៥ ក្នុងសហស្សវត្សរ៍ទី ៣។

នៅក្នុងឆ្នាំនេះ គេសង្កេតឃើញមានជម្លោះប្រដាប់អាវុធថ្មីៗផ្ទុះឡើងនៅក្នុងទ្វីបអាមេរិក និងតំបន់មជ្ឈិមបូព៌ា។ នៅដើមខែមករា សហរដ្ឋអាមេរិកបានចាប់ផ្តើមប្រតិបត្តិការយោធានៅក្នុងប្រទេសវេណេស៊ុយអេឡា និងជាលទ្ធផល​បានចាប់ខ្លួនប្រធានាធិបតីកំពុងកាន់អំណាច លោកនីកូឡាស ម៉ាឌូរ៉ូ។ អន្តរាគមន៍នេះបានបង្កឱ្យមានការបិទផ្លូវនាំចេញប្រេងរបស់ប្រទេសវេណេស៊ុយអេឡា ដែលបន្តរុញច្រានឱ្យកើតមានវិបត្តិប្រេងនៅក្នុងប្រទេសគុយបា។ ចូលមកដល់ខែកុម្ភៈ ប្រទេសប៉ាគីស្ថានបានបើកការវាយប្រហារតាមអាកាសចូលក្នុងប្រទេសអាហ្វហ្កានីស្ថាន ដែលនាំឱ្យផ្ទុះជម្លោះបើកចំហរវាងប្រទេសទាំងពីរ។ ជាប្រតិកម្មនឹងការបង្ក្រាបរបស់អាជ្ញាធរអ៊ីរ៉ង់លើចលនាបាតុកម្មមហាជន សហរដ្ឋអាមេរិកនិងអ៊ីស្រាអែលបានរួមគ្នាផ្តើមសង្គ្រាមប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈ ជាមួយនឹងការធ្វើឃាតមេដឹកនាំកំពូលអ៊ីរ៉ង់អាលី ហាមេនៃ ហើយជាលទ្ធផលនៃជម្លោះនេះ សេដ្ឋកិច្ចពិភពលោកត្រូវទទួលរងនូវសោកនាដកម្មធ្ងន់ធ្ងរ ក្រោយអ៊ីរ៉ង់បានបាញ់ប្រហារសងសឹកលើប្រទេសក្នុងតំបន់ជាសម្ព័ន្ធមិត្តអាមេរិក ក៏ដូចជាការបិទច្រកសមុទ្រហ័រមូហ្ស៍។

នៅក្នុងវិស័យវិទ្យាសាស្ត្រនិងបច្ចេកវិទ្យាវិញ បេសកកម្មហោះកាត់ឋានព្រះច័ន្ទ អារតេមីស ២ របស់ណាសាបានក្លាយជាប្រធានបទដ៏ពេញនិយមមួយ ដោយវាត្រូវជាបេសកកម្មដែលពាំនាំមនុស្សចេញពីគន្លងផែនដីទាបដំបូងគេចាប់តាំងពីបេសកកម្មអាប៉ូឡូ ១៧ កាលពីឆ្នាំ១៩៧២ មក។ បញ្ញាសិប្បនិម្មិតបានបន្តអភិវឌ្ឍទៅមុខ ដោយមានការផ្តោតច្រើនឡើងៗលើមាត្រដ្ឋានម៉ូឌែល ហេដ្ឋារចនាសម្ព័ន្ធ និងកម្មវិធីពាណិជ្ជកម្មផ្សេងៗ។ ខណៈពេលដែលគម្រោងប្រជាប្រិយមួយចំនួនដូចជា សូរ៉ា របស់អូផិនអេអាយត្រូវបានបញ្ឈប់ដំណើរការពិតមែនក្ដី យ៉ាងណាបញ្ញាសិប្បនិម្មិតជំនាន់ថ្មី រួមទាំងគំរូវាយអក្សរបង្កើតជាវីដេអូ នៅតែបន្តវិវត្តទៅមុខដដែរ។

មេដឹកនាំកម្ពុជា

អត្ថបទដើមចំបង: បញ្ជីមេដឹកនាំរដ្ឋប្រចាំសតវត្សរ៍ទី២១

ព្រះ​ឆាយា​ល័ក្ខណ៍/រូបថត	តំណែង	នាម
	ព្រះមហាក្សត្រនៃព្រះរាជាណាចក្រកម្ពុជា	ព្រះបាទសម្តេចព្រះបរមនាថ នរោត្តម សីហមុនី
	នាយករដ្ឋមន្រ្តីនៃព្រះរាជាណាចក្រកម្ពុជា	សម្ដេចមហាបវរធិបតី ហ៊ុន ម៉ាណែត

ព្រឹត្តិការណ៍សំខាន់ៗ

មករា

• ១ មករា
  • ប្រទេសប៊ុលហ្ការី​បាន​ចាប់អនុម័ត​ប្រើប្រាក់​អឺរ៉ូ ដោយ​ក្លាយ​ខ្លួនជា​រដ្ឋ​សមាជិក​ទី ២១ នៃ​ហ្សូន​អឺរ៉ូ។
  • ប្រទេសស៊ីបបានចាប់ផ្តើមតួនាទីក្នុងនាមជាប្រធានក្រុមប្រឹក្សាសហភាពអឺរ៉ុប។
  • មនុស្សចំនួន ៤១ នាក់បានបាត់បង់ជីវិត និងមនុស្សប្រមាណ ១១៦ នាក់ទៀតបានទទួលរងរបួសនៅក្នុងគ្រោះអគ្គិភ័យឆាបឆេះបារនីយដ្ឋានមួយកន្លែងក្នុងក្រុងក្រង់-ម៉ុងតាណានៃប្រទេសស្វីស។
• ៣ មករា
  • សហរដ្ឋអាមេរិកបានបើកការវាយប្រហារតាមអាកាសជាច្រើនសារទៅលើទីតាំងយ៉ាងច្រើនកន្លែងនៅទូទាំងតំបន់ភាគខាងជើងនៃប្រទេសវេណេស៊ុយអេឡា ហើយបានចាប់ខ្លួនប្រធានាធិបតីវេណេស៊ុយអេឡា លោកនីកូឡាស ម៉ាឌូរ៉ូ រួមជាមួយនឹងភរិយាគឺលោកស្រីស៊ីលីយ៉ា ហ្វ្លរ៉េស។
  • ប្រទេសគីនេអេក្វាទ័របានផ្លាស់ប្ដូររដ្ឋធានីពីម៉ាឡាបូទៅស៊ីយូដាដដេឡាប៉ាស។
• ៥ មករា – លោកស្រីឌែលស៊ី រ៉ូឌ្រីហ្គែសបានស្បថឡើងកាន់តំណែងជាប្រធានាធិបតីស្តីទីផ្លូវការនៃប្រទេសវេណេស៊ុយអេឡា ក្រោយពីការចាប់ខ្លួនលោកនីកូឡាស ម៉ាឌូរ៉ូ។
• ៦ មករា – ការប្រយុទ្ធគ្នាបានផ្ទុះឡើងរវាងកងកម្លាំងនៃរដ្ឋាភិបាលស៊ីរី និងក្រុមប្រដាប់អាវុធឃឺដគឺ កងកម្លាំងប្រជាធិបតេយ្យស៊ីរី។
• ៧ មករា – សហរដ្ឋអាមេរិកបានស្ទាក់ចាប់និងរឹបអូសនាវាដឹកប្រេងស្រមោលចំនួនពីរគ្រឿង ដោយក្នុងនោះរួមមាននាវារុស្ស៊ីមួយគ្រឿង នៅកំឡុងប្រតិបត្តិការលំពែងខាងត្បូង ដែលជាដំណើរការបិទផ្លូវរត់ពាណិជ្ជកម្មប្រេងចេញចូលប្រទេសវេណេស៊ុយអេឡាដោយអាមេរិក។
• ៨ មករា – លោកថងលូន ស៊ីស៊ូលីតត្រូវបានជ្រើសតាំងម្តងទៀតជាអគ្គលេខាធិការបក្សប្រជាជនបដិវត្តន៍ឡាវ នៅក្នុងកិច្ចប្រជុំលើកដំបូងនៃគណៈកម្មាធិការមជ្ឈិមបក្សលើកទី១២។
• ៨–៩ មករា – រដ្ឋាភិបាលអ៊ីរ៉ង់បានពង្រាយកងកម្លាំងសន្តិសុខដើម្បីបង្ក្រាបបាតុកម្មមហាជនប្រឆាំងនឹងរបបឥស្លាម ដោយមានមនុស្សប្រមាណរាប់ពាន់នាក់ត្រូវបានគេរាយការណ៍ថាបានបាត់បង់ជីវិត បើរាប់គិតត្រឹមតែថ្ងៃទី៨ និងទី៩ ហើយមានមនុស្សរាប់ពាន់នាក់ទៀតត្រូវបានអាជ្ញាធរចាប់ខ្លួនឃុំឃាំង។
• ៩ មករា – យុទ្ធនាការ​​យេម៉ែនខាងត្បូងឆ្នាំ២០២៥–២០២៦៖ ក្រុមប្រឹក្សា​អន្តរកាលខាងត្បូងបានប្រកាស​រំលាយខ្លួន បន្ទាប់ពីបានបាត់បង់​ទឹកដី រួមទាំង​រដ្ឋធានីអាតាក​របស់ខ្លួន​។
• ១១ មករា – ការបោះឆ្នោតសភាបេណាំងត្រូវបានប្រព្រឹត្តិធ្វើឡើង។
• ១៤ មករា – ប្រតិបត្តិការអំណត់អាកទិក ត្រូវបានបើកដំណើរការឡើងដោយប្រទេសដាណឺម៉ាក ដោយមានការចូលរួមពីបណ្ដាប្រទេសអឺរ៉ុបជាច្រើនក្នុងការការពារកោះក្រូអិនឡង់ ពីការគំរាមកំហែងឈ្លានពាន ឬការកាត់មហាកោះមួយនេះដោយប្រធានាធិបតីអាមេរិកលោកដូណាល់ ត្រាំ។
• ១៥–១៦ មករា – ការបោះឆ្នោតសកលអ៊ូកង់ដា៖ ប្រធានាធិបតីកាន់អំណាចគឺលោកយ៉ូវែរី មូសេវេនីបានជាប់ឆ្នោតបន្តកាន់អំណាច ខណៈបាតុកម្មចោទប្រកាន់អំពីការក្លែងបន្លំសន្លឹកឆ្នោតបានផ្ទុះឡើង នាំឱ្យបាតុករស្លាប់រាប់សិបនាក់ រីឯបេក្ខជនបក្សប្រឆាំងលោកបូប៊ី វ៉ែញវិញវិះនឹងត្រូវបានអាជ្ញាធរចាប់ជំរិតទៅហើយ។
• ១៨ មករា​ – មនុស្សចំនួន ៤៦ នាក់បានបាត់បង់ជីវិត និងមនុស្សប្រមាណ ២៩១ នាក់ទៀតបានរងរបួស បន្ទាប់ពីរថភ្លើងពីរគ្រឿងបានធ្លាក់ចេញពីផ្លូវរត់នៅក្បែរក្រុងអាដាមូសនៅភាគខាងត្បូងប្រទេសអេស្ប៉ាញ។
• ១៩–២៣ មករា – វេទិកាសេដ្ឋកិច្ចពិភពលោកលើកទី ៥៦ បានប្រារព្ធធ្វើឡើងនៅទីក្រុងដាវ៉ូស ប្រទេសស្វីស។
• ២០ មករា – រដ្ឋាភិបាលអន្តរកាលស៊ីរីបានវាយដណ្តើមកាន់កាប់ទឹកដីមួយភាគធំដែលធ្លាប់ស្ថិតនៅក្រោមកងកម្លាំងប្រជាធិបតេយ្យស៊ីរី បន្ទាប់ពីយុទ្ធនាការវាយលុកបានប្រព្រឹត្តិទៅអស់រយៈពេលជាច្រើនថ្ងៃ មុនពេលបទឈប់បាញ់ត្រូវបានព្រមព្រៀងចូលជាធរមាន។
• ២២ មករា – សហរដ្ឋអាមេរិកបានដកខ្លួនចេញជាផ្លូវការពីអង្គការសុខភាពពិភពលោក។
• ២៣ មករា
  • មហាសន្និបាតជាតិបានបោះឆ្នោតជ្រើសរើសលោកតូ ឡឹមឱ្យបន្តកាន់អំណាចក្នុងនាមជាអគ្គលេខាធិការបក្សកុម្មុយនីស្តវៀតណាម។
  • លោកស្រីអ៊ីលីយ៉ាណា យូតូវ៉ាបានក្លាយខ្លួនជាប្រធានាធិបតីស្ត្រីនៃប្រទេសប៊ុលហ្ការីដំបូងគេ បន្ទាប់ពីអតីតប្រធានាធិបតីលោករូមែន រ៉ាដេហ្វបានលាឈប់ពីតំណែង។
• ២៥ មករា – ការបោះឆ្នោតសកលមីយ៉ាន់ម៉ា៖ នៅក្នុងការបោះឆ្នោតដែលត្រូវបានចាត់ទុកថាមិនសេរីនិងយុត្តិធម៌ គណបក្សសាមគ្គីភាព និងអភិវឌ្ឍន៍សហភាព ដែលគាំទ្រដោយក្រុមយោធាមីយ៉ាន់ម៉ា បានដណ្ដើមអាសនៈភាគច្រើនលើសលប់ទាំងនៅក្នុងសភាតំណាងរាស្ត្រ និងរដ្ឋសភា។
• ២៧ មករា – កិច្ចព្រមព្រៀងពាណិជ្ជកម្មសេរីឥណ្ឌា–សហភាពអឺរ៉ុប ត្រូវបានចុះជាធរមានបន្ទាប់ពីឆ្លងកាត់ការចរចាអស់រយៈពេលជិតពីរទសវត្សរ៍ ដោយកិច្ចព្រមព្រៀងនេះបានលុបបំបាត់ពន្ធនាំចូលនាំចេញចំពោះផលិតផល និងសេវាកម្មជាច្រើនប្រភេទរវាងភាគីទាំងសងខាង។
• ២៨ មករា – ការបាក់រលំអណ្តូងរ៉ែកូលតង់រូបាយ៉ា នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ បានសម្លាប់មនុស្សជាង ៤០០ នាក់។
• ២៩ មករា
  • ជម្លោះស៊ីវិលអេត្យូពី៖ ការប៉ះទង្គិចប្រដាប់អាវុធបានផ្ទុះឡើងនៅក្នុងតំបន់ធីក្រេនៃប្រទេសអេត្យូពីរវាងក្រុមសកម្មប្រយុទ្ធធីក្រេ និងកងកម្លាំងប្រដាប់អាវុធជាតិអេត្យូពី។
  • កុបកម្មនៅបាឡូឈីស្ថាន៖ ការផ្ទុះអាវុធដាក់គ្នារវាងកងទ័ពរំដោះបាឡូឈីស្ថាន និងកងកម្លាំងប្រដាប់អាវុធប៉ាគីស្ថាននៅក្នុងស្រុកមួយចំនួននៃខេត្តបាឡូឈីស្ថាន ប្រទេសប៉ាគីស្ថាន បានបង្កឱ្យមានមនុស្សស្លាប់យ៉ាងតិច ២២៥ នាក់។
• ៣០ មករា – ឯកសារសំណុំរឿងអែបស្ទីនប្រមាណជាងបីលានទំព័រត្រូវបានក្រសួងយុត្តិធម៌អាមេរិកបញ្ចេញផ្សាយជាសាធារណៈ ដោយក្នុងនោះមានលេចឈ្មោះឥស្សរជនល្បីៗជាច្រើននៅជុំវិញពិភពលោក។

កុម្ភៈ

• ១ កុម្ភៈ – ការបោះឆ្នោតសកលកូស្តារីកា៖ លោកស្រីលៅរ៉ា ហ៊្វែរណាន់ដេសឌែលហ្កាដូបានជាប់ឆ្នោតក្លាយជាប្រធានាធិបតីថ្មីនៃប្រទេសកូស្តារីកា ហើយគណបក្សរបស់លោកស្រីផងដែរបានបន្តយកឈ្នះអាសនៈភាគច្រើននៅក្នុងសភានីតិបញ្ញត្តិ។
• ៣ កុម្ភៈ – ក្រុមសកម្មប្រយុទ្ធនិយមឥស្លាមហៅ បូកូហារ៉ាម បានធ្វើការវាយប្រហារទៅលើភូមិចំនួនពីរនៅក្នុងរដ្ឋក្វារ៉ានៃប្រទេសនីហ្សេរីយ៉ា ដោយបានសម្លាប់មនុស្សយ៉ាងហោចណាស់ចំនួន ១៦២ នាក់។
• ៥ កុម្ភៈ – សន្ធិសញ្ញាស្តាតថ្មី (New START) កំណត់ចំនួនអាវុធយុទ្ធសាស្ត្រនុយក្លេអ៊ែររវាងសហរដ្ឋអាមេរិក និងរុស្ស៊ីបានផុតសុពលភាព។
• ៦ កុម្ភៈ – មនុស្សប្រមាណ ៣១ នាក់បានស្លាប់បាត់បង់ជីវិត និងប្រមាណ ១០០ នាក់ទៀតបានទទួលរងរបួសនៅក្នុងហេតុការណ៍បំផ្ទុះគ្រាប់បែកអត្តឃាតមួយនៅឯព្រះវិហារឥស្លាមខាឌីចាទូលគូប្រានៅទីក្រុងឥស្លាម៉ាបាដ ប្រទេសប៉ាគីស្ថាន។
• ៦–២២ កុម្ភៈ – កីឡាអូឡាំពិករដូវរងាបានប្រារព្ធធ្វើឡើងនៅទីក្រុងមីឡាន និងកូរទីណាដាំប៉ែតហ្សូ ប្រទេសអ៊ីតាលី។
• ៨ កុម្ភៈ
  • ការបោះឆ្នោតសកលជប៉ុន៖ លោកស្រីសាណាអិ តាកាអ៊ិឈិដែលជានាយករដ្ឋមន្ត្រីកំពុងកាន់អំណាច បានឈ្នះសំឡេងឆ្នោតភ្លូកទឹកភ្លូកដី និងបានកាន់កាប់អាសនៈមួយភាគធំនៅក្នុងសភាតំណាងរាស្ត្រជប៉ុន។
  • ការបោះឆ្នោតសកល និងប្រជាមតិរដ្ឋធម្មនុញ្ញថៃ៖ នាយករដ្ឋមន្ត្រីកាន់អំណាច លោកអនុទិន ជាញវីរកូលបានឈ្នះអាសនៈភាគច្រើននៅក្នុងសភាតំណាងរាស្ត្រ ខណៈប្រជាមតិដើម្បីចាប់ផ្តើមព្រាងរដ្ឋធម្មនុញ្ញថ្មីត្រូវបានអនុម័ត។
  • ការបោះឆ្នោតប្រធានាធិបតីព័រទុយហ្កាល់៖ បេក្ខជនគណបក្សសង្គមនិយម លោកអាន់តូនីញ៉ូ​ ចូសេសេគូរូ ត្រូវបានបោះឆ្នោតជ្រើសរើសជាប្រធានាធិបតីព័រទុយហ្កាល់ថ្មីនៅក្នុងការបោះឆ្នោតជុំទីពីរ ដោយបានផ្តួលមេដឹកនាំគណបក្សស្ដាំនិយមឆ្កេហ្កាគឺ លោកអានដ្រេ វេនធូរ៉ា។
• ១១ កុម្ភៈ – ការបោះឆ្នោតសកលបាបាដ៖ នាយករដ្ឋមន្ត្រី​កាន់អំណាច លោកស្រីមីយ៉ា មត្លីយ៍ និងគណបក្សពលករបាបាដរបស់លោកស្រីបានដណ្ដើមយកឈ្នះ​អាសនៈ​ទាំងអស់នៅក្នុងរដ្ឋ​សភា​ជាតិ។
• ១២ កុម្ភៈ – ការបោះឆ្នោតសកល និងប្រជាមតិរដ្ឋធម្មនុញ្ញបង់ក្លាដែស៖ គណបក្សជាតិនិយមបង់ក្លាដែសដឹកនាំដោយលោកតារីគ រ៉ះម៉ាន់បានឈ្នះអាសនៈភាគច្រើននៅក្នុងសភាជាតិ ខណៈប្រជាមតិ​លើ​ធម្មនុញ្ញ​ខែកក្កដា​ត្រូវបាន​អនុម័ត។
• ១៣–១៥ កុម្ភៈ – សន្និសីទសន្តិសុខទីក្រុងមុយនិចលើកទី៦២ បានប្រព្រឹត្តិធ្វើឡើង។
• ១៧ កុម្ភៈ – ប្រធានាធិបតីប៉េរូ លោកហូសេ ហេរីត្រូវបានសមាជជាតិបោះឆ្នោតដកសិទ្ធិអំណាចជាប្រធានាធិបតី ខណៈលោកហូសេ ម៉ារីយ៉ា បាល់កាហ្សារត្រូវបានសមាជបោះឆ្នោតតែងតាំងជាប្រធានាធិបតីថ្មីនៅថ្ងៃបន្ទាប់។
• ២២ កុម្ភៈ
  • គីម ជុងអ៊ុនត្រូវបានជ្រើសតាំងបន្តជាអគ្គលេខាធិការនៃគណបក្សពលករកូរ៉េ នៅក្នុងសមាជជាតិលើកទី៩។
  • ការបោះឆ្នោតសភាឡាវបានប្រព្រឹត្តិធ្វើឡើង។
  • ប្រតិបត្តិការហាលីស្កូ៖ ប្រតិបត្តិការយោធាដែលគាំទ្រដោយសហរដ្ឋអាមេរិកនៅក្រុងតាប៉ាល់បា រដ្ឋហាលីស្កូ ប្រទេសម៉ិកស៊ិក បានសម្លាប់ផ្ដាច់ជីវិតមេដឹកនាំក្រុមការតែលហាលីស្កូជំនាន់ថ្មីឈ្មោះ ណេមេស៊ីអូ អូសេហ្គេរ៉ា "អែលមេនឆូ" ស៊ែរវ៉ាន់តេស។
• ២៣ កុម្ភៈ –​ បន្ទាប់ពីឆ្លងកាត់ដំណើរការនិម្មិតកម្មរដ្ឋមន្ត្រីតាំងពីចុងឆ្នាំ២០២៥ មក ទីបំផុត លោករ៉ូប យ៉ែធិនក៏បានធ្វើសច្ចាប្រណិធានចូលកាន់តំណែងជានាយករដ្ឋមន្ត្រីនៃប្រទេសហុល្លង់ ក្នុងនាមជាប្រមុខរដ្ឋាភិបាលភាគតិចក្នុងសភា។
• ២៦ កុម្ភៈ – សង្គ្រាមប៉ាគីស្ថាន–អាហ្វហ្កានីស្ថាន៖ ប្រទេសប៉ាគីស្ថានបានប្រកាសសង្គ្រាម "បើកចំហ" ប្រឆាំងនឹងរដ្ឋាភិបាលតាលីបង់នៃប្រទេសអាហ្វហ្កានីស្ថាន ក្រោយជាប់ដៃគ្នាក្នុងជម្លោះតាមព្រំដែនអស់ជាច្រើនខែ។
• ២៨ កុម្ភៈ – សង្គ្រាមអ៊ីរ៉ង់៖ សហរដ្ឋអាមេរិក និងអ៊ីស្រាអែលបានសហការគ្នាបើកការវាយប្រហារទៅលើប្រទេសអ៊ីរ៉ង់ ដោយបានសម្លាប់មន្ត្រីថ្នាក់ដឹកនាំអ៊ីរ៉ង់ជាច្រើនរូប ក្នុងនោះរួមមាន មេដឹកនាំកំពូលអ៊ីរ៉ង់ លោកអាលី ហាមេនៃផងដែរ។ អ៊ីរ៉ង់បានប្រតិកម្មវិញដោយបើកការវាយប្រហារតាមអាកាសសម្ដៅលើមូលដ្ឋានយោធាអាមេរិកនៅក្នុងតំបន់ឈូងសមុទ្រ។

មីនា

• ២​ មីនា
  • មនុស្សយ៉ាងតិច ១៦៩ នាក់បានស្លាប់បាត់បង់ជីវិត និង ៥០ នាក់ទៀតបានរងរបួស នៅពេលដែលក្រុមយុវជនប្រដាប់អាវុធមកពីរដ្ឋរួបរួម បានធ្វើការវាយប្រហារលើស្រុកអាប៊ីអឹមណូម ក្នុងប្រទេសស៊ូដង់ខាងត្បូង។
  • ជម្លោះហេសបុលឡា-អ៊ីស្រាអែល៖ ក្រុមសកម្មប្រយុទ្ធហេសបុលឡានៃប្រទេសលីបង់ បានចាប់ផ្តើមបើកវាយប្រហារប្រឆាំងនឹងអ៊ីស្រាអែល ដើម្បីសងសឹកចំពោះឃាតកម្មមេដឹកនាំកំពូលអ៊ីរ៉ង់អាលី ហាមេនៃ។
• ៤ មីនា – សង្គ្រាមអ៊ីរ៉ង់៖ សហរដ្ឋអាមេរិកបានប្រើនាវាមុជទឺកបាញ់ពន្លិចនាវាចម្បាំងអ៊ីរ៉ង់មួយគ្រឿងឈ្មោះ ដេណា នៅមហាសមុទ្រឥណ្ឌា។ កងនាវានៃប្រទេសស្រីលង្កាបានរាយការណ៍ថា នាវា ដេណា បានលិចទៅបាតសមុទ្រ ដោយមាននាវិកប្រមាណ ១៤០ នាក់បានបាត់ខ្លួនជាលទ្ធផល។
• ៥ មីនា – ការបោះឆ្នោតសកលនេប៉ាល់៖ គណបក្សរាស្ត្រិយស្វតានត្រាដឹកនាំដោយលោកបាឡិន​ ឆាហ៍ បានឈ្នះសំឡេងឆ្នោតភ្លួកទឹកភ្លូកដី។
• ៦–១៥ មីនា – កីឡាប៉ារ៉ាឡាំពិករដូវរងាបានប្រារព្ធធ្វើឡើងនៅទីក្រុងមីឡាន និងកូរទីណាដាំប៉ែតហ្សូ ប្រទេសអ៊ីតាលី។
• ៨ មីនា
  • ការបោះឆ្នោតជ្រើសតាំងមេដឹកនាំកំពូលអ៊ីរ៉ង់៖ កូនប្រុសអាលី ហាមេនៃ គឺលោកមោជតាបា ហាមេនៃត្រូវបានជ្រើសរើសជាមេដឹកនាំកំពូលអ៊ីរ៉ង់។
  • ការបោះឆ្នោតសភាកូឡុំប៊ី​៖ គណបក្សរបស់លោកប្រធានាធិបតីហ្គូស្តាវ៉ូ​ ប៉េត្រូគឺ កតិកាសញ្ញាប្រវត្តិសាស្ត្រ បានដណ្ដើមឈ្នះ​អាសនៈ​មួយភាគធំ​នៅ​ក្នុង​សភា​តំណាងរាស្ត្រ និង​ព្រឹទ្ធសភាកូឡុំប៊ី។
• ១៥ មីនា
  • ប្រជាមតិរដ្ឋធម្មនុញ្ញកាហ្សាក់ស្ថាន៖ ប្រជាជនកាហ្សាក់ស្ថានប្រមាណ​ ៩០% បានបោះឆ្នោតទទួលយករដ្ឋធម្មនុញ្ញថ្មីនៃប្រទេសកាហ្សាក់ស្ថាន។
  • ការបោះឆ្នោតសភាកូរ៉េខាងជើង៖ គណបក្សពលករកូរ៉េកំពុងកាន់អំណាចបានបន្តឈ្នះអាសនៈភាគច្រើននៅក្នុងសភាប្រជាជនកំពូល។
  • ការបោះឆ្នោតនីតិបញ្ញត្តិវៀតណាមបានប្រព្រឹត្តិធ្វើឡើង។
  • ការបោះឆ្នោតប្រធានាធិបតីសាធារណរដ្ឋកុងហ្គោ៖ ប្រធានាធិបតីកាន់អំណាច លោកដេនីស សាស៊្សូ អ៊ិនហ្គេស្សូបានឈ្នះសំឡេងគាំទ្រភ្លួកទឹកភ្លូកដី។
• ១៧ មីនា – សង្គ្រាមប៉ាគីស្ថាន–អាហ្វហ្កានីស្ថាន៖ មនុស្សយ៉ាងតិច ៤០០​ នាក់បានបាត់បង់ជីវិតនៅក្នុងមន្ទីរពេទ្យមួយកន្លែងក្នុងរដ្ឋធានីកាប៊ុលនៃប្រទេសអាហ្វហ្កានីស្ថាន បន្ទាប់ពីមន្ទីរពេទ្យនោះបានរងគ្រាប់បាញ់ប្រហារពីប៉ាគីស្ថាន។
• ២២ មីនា – ការបោះឆ្នោតសភាស្លូវេនី៖ នាយករដ្ឋមន្ត្រីកាន់អំណាច លោករ៉ូប៊ឺត ហ្កូឡូប និងគណបក្សចលនាសេរីភាពរបស់លោកបានដណ្ដើមអាសនៈបានមួយភាគធំនៅក្នុងរដ្ឋសភា។
• ២៤ មីនា
  • ការបោះឆ្នោតសកលដាណឺម៉ាក៖ សម្ព័ន្ធភាពនយោបាយរបស់នាយករដ្ឋមន្ត្រីមិតេ ហ្វ្រេដឺរីកសិនបានបាត់បង់អាសនៈភាគច្រើនរបស់ខ្លួននៅក្នុងហ្វុលកេទីង។
  • សង្គ្រាមអ៊ីរ៉ង់៖ ក្រសួងការបរទេសអ៊ីរ៉ង់បានថ្លែងនៅក្នុងលិខិតមួយផ្ញើទៅកាន់អង្គការសហប្រជាជាតិថា នាវាដឹកជញ្ជូនដែលមិនជាប់ពាក់ព័ន្ធនឹងសហរដ្ឋអាមេរិក ឬអ៊ីស្រាអែល អាចឆ្លងកាត់ច្រកសមុទ្រអ័រមូសបាន។

មេសា

• ១ មេសា – អង្គការណាសាបានចាប់ផ្តើមបេសកកម្មអារតេមីស ២ ដែលជាដំណើរពាំនាំមនុស្សហោះកាត់ឋានព្រះច័ន្ទជាលើកដំបូងចាប់តាំងពីបេសកកម្មអាប៉ូឡូ ១៧ កាលក្នុងឆ្នាំ១៩៧២។
• ៦ មេសា – ក្រុមអវកាសយានិកនៃបេសកកម្មអារតេមីស ២ បានបំបែកឯតទគ្គកម្មសម្រាប់ការនៅឃ្លាតឆ្ងាយបំផុតរបស់មនុស្សពីភពផែនដី ពោលដោយស្ថិតក្នុងចម្ងាយអតិបរមា ៤០៦,៧៧៣ គីឡូម៉ែត្រ ខណៈពួកគេបានធ្វើដំណើរជុំវិញដល់ផ្នែកខាងក្រោយនៃព្រះច័ន្ទ។
• ៧ មេសា
  • ការបោះឆ្នោតប្រធានាធិបតីវៀតណាម៖ រដ្ឋសភាវៀតណាមបានបោះឆ្នោតជ្រើសតាំងលោកតូ ឡឹមជាប្រធានាធិបតីថ្មីជំនួសលោកលឿង កឿង។
  • សង្គ្រាមអ៊ីរ៉ង់៖ សហរដ្ឋអាមេរិក និងអ៊ីរ៉ង់បានព្រមព្រៀងគ្នាទទួលបទឈប់បាញ់រយៈពេលពីរសប្តាហ៍។
• ១០ មេសា – ការបោះឆ្នោតប្រធានាធីបតីជីប៊ូទី៖ ប្រធានាធិបតីកាន់អំណាច លោកអ៊ីស្មាអែល អូមារ ហ្គីឡេហ៍បានជាប់ឆ្នោតបន្តជាប្រធានាធិបតីក្នុងអាណត្តិទីប្រាំមួយរបស់លោក។
• ១១ មេសា – ការបោះឆ្នោតប្រធានាធិបតីអ៊ីរ៉ាក់៖ សភាអ៊ីរ៉ាក់បានបោះឆ្នោតជ្រើសតាំងលោកនីហ្សារ អាមីឌីពីគណបក្សសហភាពស្នេហាជាតិឃឺឌីស្ថានជាប្រធានាធិបតីថ្មី។
• ១២ មេសា
  • ការបោះឆ្នោតសភាហុងគ្រី៖ ក្រោយកាន់អំណាចអស់រយៈពេល ១៦ ឆ្នាំ​ នាយករដ្ឋមន្ត្រីលោកវិចទ័រ អ័របានត្រូវបានផ្តួលដោយលោកពីទ័រ ម៉ាកឌ្យ៉ានៃគណបក្សទីសហ្សា។
  • ការបោះឆ្នោតប្រធានាធិបតីបេណាំង៖ បេក្ខជនឯករាជ្យ លោករ៉ូមូអាល់ដ៍ វ៉ាដាញីបានឈ្នះឆ្នោតដោយទទួលសំឡេងគាំទ្រលើសលប់សរុប ៩៤%។
• ១៣ មេសា – សង្គ្រាមអ៊ីរ៉ង់៖ សហរដ្ឋអាមេរិកបានចាប់ផ្ដើមបិទផ្លូវទឹកចូលកំពង់ផែអ៊ីរ៉ង់ ដោយលោកប្រធានាធិបតីត្រាំបានព្រមានថា នាវាអ៊ីរ៉ង់មួយណាដែលព្យាយាមបំពានចូលតំបន់ហាមឃាត់នឹងត្រូវ "កម្ចាត់ចោលភ្លាមៗ"។ អាជ្ញាធរដែនសមុទ្របានណែនាំគ្រប់នាវានៅក្នុងតំបន់ឱ្យមានភាពប្រុងប្រយ័ត្នខ្ពស់ពីកំណើនសកម្មភាពយោធា និងនីតិវិធីស្ទាក់ចាប់ដែលអាចកើតមានពីសំណាក់ភាគីជម្លោះ។
• ១៩ មេសា – ការបោះឆ្នោតសភាប៊ុលហ្ការី៖ គណបក្សវឌ្ឍនភាពប៊ុលហ្ការី ដែលដឹកនាំដោយអតីតប្រធានាធិបតីរូមែន រ៉ាដេហ្វ បានឈ្នះអាសនៈមួយភាគធំនៅក្នុងរដ្ឋសភា។
• ២១ មេសា​ – សង្គ្រាមអ៊ីរ៉ង់៖ ប្រធានាធិបតីអាមេរិក លោកដូណាល់ ត្រាំបានប្រកាសពន្យារការអនុវត្តបទឈប់បាញ់បន្តបន្ថែមទៀត រហូតដល់សំណើរបស់អ៊ីរ៉ង់ត្រូវបានដាក់ជូន ហើយរាល់ការសន្ទនាត្រូវបានបញ្ចប់ទៅតាមសំណើស្នើសុំដោយប៉ាគីស្ថាន។
• ២៥ មេសា – ការវាយប្រហារនៅម៉ាលី៖ ក្រុមរណសិរ្សរំដោះអាហ្សាវ៉ាដ និងក្រុមគាំទ្រឥស្លាម និងមូស្លីម បានបើកការវាយប្រហារទ្រង់ទ្រាយធំជាច្រើនលើកទៅលើទីក្រុងធំៗសំខាន់ៗនៅទូទាំងប្រទេសម៉ាលី ដោយក្នុងនោះ ពួកគេបានដណ្តើមកាន់កាប់ទីក្រុងគីដាល់ និងមួយផ្នែកខ្លះនៃទីក្រុងហ្គៅ មុបធី និងសេវ៉ារ៉េ។

ឧសភា

• ១ ឧសភា – អេមីរ៉ាតអារ៉ាប់រួម​បានដើរចេញ​ពីអង្គការនៃបណ្តាប្រទេសនាំចេញប្រេងកាត ដោយ​បិទបញ្ចប់ជំពូកក្នុងនាមជា​សមាជិក​រយៈពេល​ប្រាំមួយ​ទសវត្សរ៍ ដោយអង្គការនេះត្រូវបាត់បង់​ប្រទេសសមាជិក​ផលិត​ប្រេង​ធំ​បំផុត​មួយ។
• ៤​ ឧសភា –​ រោងចក្រផលិតកាំជ្រួចមួយកន្លែងបានផ្ទុះឆេះនៅក្នុងទីក្រុងលីវយ៉ាង ខេត្តហ៊ូណាន ប្រទេសចិន ដោយបានសម្លាប់មនុស្សចំនួន ៣៧ នាក់ និងបង្ករបួសដល់មនុស្ស ៥១ នាក់បន្ថែម។
• ១២ ឧសភា – ការបោះឆ្នោតសកលបាហាម៉ា៖ នាយករដ្ឋមន្ត្រីកាន់អំណាច លោកហ្វីលីព ដាវីសបានឈ្នះឆ្នោតបន្តអាណត្តិទីពីររបស់លោក។
• ១២–១៦ ឧសភា – កម្មវិធីប្រឡងចម្រៀងយូរ៉ូវីស្យិន ត្រូវបាន​ប្រារព្ធធ្វើឡើងនៅទីក្រុងវីយែន ប្រទេសអូទ្រីស។ បេក្ខជនមកពីប្រទេសប៊ុលហ្ការីឈ្មោះ ដារ៉ា បានឈ្នះកម្មវិធីឆ្នាំនេះជាមួយនឹងបទចម្រៀងចំណងជើងថា "Bangaranga"។
• ១៦ ឧសភា – ជំងឺរាតត្បាតអេបូឡាក្នុងខេត្តអ៊ីទូរី៖ អង្គការសុខភាពពិភពលោកបានប្រកាសពីការផ្ទុះឡើងនៃជំងឺអ៊ីបូឡាដែលបង្កដោយប្រភេទវីរុសអេបូឡាប៊ុនឌីប៊ូហ្គីយូនៅក្នុងសាធារណរដ្ឋប្រជាធិបតេយ្យកុងហ្គោ និងប្រទេសអ៊ូហ្កង់ដា ហើយបានប្រកាសវាជាភាពអាសន្នសុខភាពសាធារណៈ។
• ១៧​ ឧសភា – ការបោះឆ្នោតសភាកាប់វែរបានប្រព្រឹត្តិធ្វើឡើង។
• ២២​ ឧសភា – ការផ្ទុះឧស្ម័ននៅអណ្តូងរ៉ែធ្យូងថ្មលីវសិនយូក្នុងខេត្តសានស៊ី ប្រទេសចិន បានសម្លាប់មនុស្សចំនួន ៨២ នាក់។
• ២៤ ឧសភា – ការបោះឆ្នោតនីតិបញ្ញត្តិស៊ីប៖ គណបក្សកម្លាំងរួបរួមប្រជាធិបតេយ្យដឹកនាំដោយលោកស្រីអានីតា ឌីមីទ្រីយ៉ូបានដណ្ដើមអាសនៈបានមួយភាគធំនៅក្នុងសភា។
• ៣០ ឧសភា – ការបោះឆ្នោតសកលម៉ាល់តា៖ គណបក្សពលករដឹកនាំដោយនាយករដ្ឋមន្ត្រីកាន់អំណាច លោករ៉ូប៊ឺត អាបេឡា បានឈ្នះការបោះឆ្នោតបួនអាណត្តិជាប់ៗគ្នា។
• ៣១ ឧសភា – ការបោះឆ្នោតសភាគីនេបានប្រព្រឹត្តិធ្វើឡើង។

មិថុនា

• ១​ មិថុនា – ការបោះឆ្នោតសកលអេត្យូពី៖ គណបក្សវិបុលភាពដឹកនាំដោយនាយករដ្ឋមន្ត្រីកាន់អំណាច លោកអាប៊ីយ៍ អះម៉េដបានឈ្នះឆ្នោតមួយអាណត្តិទៀត។
• ៧ មិថុនា
  • ការបោះឆ្នោតសភាអាមេនី៖ ​គណបក្សកិច្ចសន្យាពលរដ្ឋក្រោមការដឹកនាំរបស់លោកនាយករដ្ឋមន្ត្រីនីកុល​ ប៉ាស្ហ៊ីនយ៉ានបានឈ្នះឆ្នោតកាន់អំណាចមួយអាណត្តិទៀត។
  • ការបោះឆ្នោតសភាកូសូវ៉ូ៖ ថ្វីបើនយោបាយជាតិកំពុងជាប់គាំង គណបក្សវ៉េតេវិនដូស្យេរបស់លោកនាយករដ្ឋមន្ត្រីអាល់ប៊ីន គួរធីបានដណ្ដើមកាន់កាប់អាសនៈបានមួយភាគធំ។
  • ការបោះឆ្នោតសកលប៉េរូ៖ ប្រធានគណបក្សកម្លាំងប្រជាជន លោកស្រីកីកូ ហ្វូជីម៉ូរីបានទទួលជ័យជម្នះយ៉ាងប្រផិតប្រផើយទល់នឹងប្រធានគណបក្សទាំងអស់គ្នាដើម្បីប៉េរូ លោករ៉ូប៊ឺតូ សាន់ឆេសនៅក្នុងការបោះឆ្នោតជុំទីពីរ។ គណបក្សឆ្វេងនិយមបានកើបសំឡេងបានភាគច្រើននៅក្នុងសភាតំណាងរាស្ត្រ ប៉ុន្តែបានទទួលសំឡេងស្មើនឹងក្រុមស្ដាំនិយមនៅក្នុងព្រឹទ្ធសភាដែលទើបនឹងបង្កើតថ្មី។
• ៨​ មិថុនា – គ្រោះរញ្ជួយដីកម្រិត ៧.៨ រ៉ិចទ័រ បានវាយអង្រួនប្រទេសហ្វីលីពីន ដោយវាត្រូវជាគ្រោះរញ្ជួយដីដ៏ខ្លាំងសាហាវបំផុតមួយចាប់តាំងពីគ្រោះរញ្ជួយដីកាលពីឆ្នាំ១៩៩០។
• ១១​ មិថុនា – ១៩ កក្កដា – ព្រឹត្តិការណ៍ពានរង្វាន់បាល់ទាត់ពិភពលោកឆ្នាំ២០២៦ បានប្រារព្ធធ្វើឡើងនៅប្រទេសកាណាដា ម៉ិកស៊ិក និងសហរដ្ឋអាមេរិក ដោយអេស្ប៉ាញបានយកឈ្នះអាហ្សង់ទីននៅវគ្គផ្ដាច់ព្រ័ត្រក្លាយខ្លួនជាម្ចាស់ជើងឯក។
• ១៤​ មិថុនា – ឧទ្ធម្ភាគចក្រពីរគ្រឿងបានហោះបុកគ្នានៅលើអាកាសក្នុងទីក្រុងរីយ៉ូដឺហ្សាណេរ៉ូ ប្រទេសប្រេស៊ីល ដោយបានសម្លាប់មនុស្សចំនួនប្រាំមួយនាក់ ក្នុងនោះរួមមានអ្នកចម្រៀងជនជាតិអាមេរិកដ៏ល្បីម្នាក់ឈ្មោះអូលីវើ ធ្រី អ្នកផលិតមាតិកាលើយូធូបជនជាតិអាហ្សង់ទីនឈ្មោះហ្កាស្ពី និងអ្នកដឹកនាំនិពន្ធរឿងជនជាតិអាហ្សង់ទីនឈ្មោះលូកាស អា.​ វិញ៉ាល់ឡេ។
• ១​៥–១៧​ មិថុនា – សហរដ្ឋអាមេរិក និងអ៊ីរ៉ង់បានរួមគ្នាប្រកាសនិងចុះហត្ថលេខាលើអនុស្សរណៈទីក្រុងឥស្លាម៉ាបាដ ដែលជាកិច្ចព្រមព្រៀងបណ្ដោះអាសន្នមាន ១៤ ចំណុច ដើម្បីបិទបញ្ចប់សង្គ្រាមអ៊ីរ៉ង់ ក៏ដូចជាបើកនាវាចរណ៍កាត់ច្រកសមុទ្រហ័រមូហ្ស៍ឡើងវិញ បើកផ្លូវទឹកចេញចូលកំពង់ផែអ៊ីរ៉ង់ដែលធ្លាប់បានបិទដោយអាមេរិក និងចាប់ផ្តើមកិច្ចចរចារយៈពេល ៦០ ថ្ងៃជុំវិញកម្មវិធីនុយក្លេអ៊ែររបស់អ៊ីរ៉ង់។ ចំពោះអ៊ីស្រាអែលវិញបាននិយាយថា ខ្លួននឹងមិនដកទ័ពចេញពីទឹកដីដែលសាមីខ្លួនបានកាន់កាប់នៅភាគខាងត្បូងប្រទេសលីបង់ឡើយ។
• ២១ មិថុនា – ការបោះឆ្នោតប្រធានាធិបតីកូឡុំប៊ី៖ បេក្ខភាពស្ដាំនិយម លោកអាប៊ែឡាដូដេឡា អេស្ព្រីអេយ៉ាបានផ្ដួលបេក្ខភាពឆ្វេងនិយម លោកអ៊ីវ៉ាន់ សេប៉េដា នៅក្នុងជុំទីពីរនៃការបោះឆ្នោតដើម្បីឈ្នះឆ្នោតជាប់ឈ្មោះជាប្រធានាធិបតីកូឡុំប៊ីថ្មី។
• ២២ មិថុនា – នាយករដ្ឋមន្ត្រីចក្រភពអង់គ្លេស លោកគៀរ ស្តារមឺបានប្រកាសពីការលាលែងពីតំណែងនាពេលដ៏ខ្លីខាងមុខ ដែលជាហេតុជំរុញឱ្យគណបក្សកាន់អំណាចត្រៀមរៀបចំការបោះឆ្នោតជ្រើសរើសមេដឹកនាំថ្មី។
• * ២៤ មិថុនា – គ្រោះរញ្ជួយដីវេណេស៊ុយអេឡា៖ គ្រោះរញ្ជួយដីរលកដំបូងកម្រិត ៧.២ វិចទ័រ បានបោកអង្រួនប្រទេសវេណេស៊ុយអេឡាប៉ែកខាងលិច មុនពេលត្រូវរងការវាយប្រហារដោយរលករញ្ជួយដីចម្បងមួយទៀតកម្រិត ៧.៥ វិចទ័រ ដោយបង្កឱ្យកើតការខូចខាតអស់យ៉ាងច្រើនរាប់មិនអស់នៅទូទាំងផ្ទៃប្រទេស។

កក្កដា

• ២ កក្កដា – ការបោះឆ្នោតសភាអាល់ហ្សេរីត្រូវបានប្រព្រឹត្តិធ្វើឡើង។
• ៦ កក្កដា – ហាម៉ាស់បានប្រកាសរំលាយរដ្ឋបាលស៊ីវិលរបស់ខ្លួនក្រោមផែនការសន្តិភាពហ្កាហ្សា។
• ៧–៨ កក្កដា – កិច្ចប្រជុំកំពូលណាតូត្រូវបានប្រព្រឹត្តិធ្វើឡើងនៅទីក្រុងអង់ការ៉ា ប្រទេសតួកគី។
• ៨ កក្កដា – សង្គ្រាមអ៊ីរ៉ង់៖ អនុស្សរណៈទីក្រុងឥស្លាម៉ាបាដរវាងសហរដ្ឋអាមេរិកនិងអ៊ីរ៉ង់បានដួលរលំ ដោយនាំឱ្យសង្គ្រាមរវាងប្រទេសទាំងពីរឆេះពុះកញ្ជ្រោលឡើងវិញ។
• ២០ កក្កដា
  • លោកអានឌី ប៊ឺនហាមត្រូវបានតែងតាំងជានាយករដ្ឋមន្ត្រីនៃចក្រភពអង់គ្លេសបន្តតំណែងពីលោកគៀរ ស្តារមឺ។
  • សង្គ្រាមអ៊ីរ៉ង់៖ ក្រុមហ៊ូទីនៃប្រទេសយេម៉ែនបានប្រកាសបិទច្រកបាបអែលម៉ង់ដិបនៅសមុទ្រក្រហមដើម្បីប្រឆាំងនឹងអារ៉ាប៊ីសាអ៊ូឌីត។
  • សហប្រធានាធិបតីនីការ៉ាក្វា លោកដានីញ៉ែល អ័រតេហ្កាបានប្រកាសបិទដំណើរការបោះឆ្នោតជាតិ។
• ២២–៣០ កក្កដា – រលកកម្ដៅអឺរ៉ុប៖ អគ្គិភ័យឆាបឆេះព្រៃនៅក្នុងប្រទេសបារាំង ព័រទុយហ្កាល់ និងអេស្ប៉ាញបានបង្ខំឱ្យមនុស្សប្រមាណ ៣០០,០០០ នាក់ជំម្លៀសខ្លួនចេញពីគេហដ្ឋានរបស់ពួកគេ។ មន្ត្រីបារាំងបានសម្ដៅលើវាថាជាគ្រោះអាសន្នឆេះព្រៃដ៏អាក្រក់បំផុតក្នុងប៉ុន្មានទសវត្សរ៍ចុងក្រោយនេះ ខណៈដែលមន្ត្រីនៅទីក្រុងម៉ាឌ្រីដបាននិយាយថាវាជាគ្រោះអគ្គិភ័យដ៏អាក្រក់បំផុតមួយក្នុងតំបន់ដែលខ្លួនបានត្រូវប្រឈម។
• ២៨ កក្កដា – គ្រោះរញ្ជូយដីមួយកម្រិត ៦.៨ វិចទ័រចេញពីជម្រៅ ១០ គម ក្រោមដីបានអង្រួនខេត្តគូម៉ាម៉ូតុនៅក្នុងប្រទេសជប៉ុនភាគខាងត្បូង ដោយបានផ្ដាច់ជីវិតមនុស្សយ៉ាងតិចចំនួន ៣០ នាក់ និងបង្ករបួសដល់ជាង ៦០ នាក់ទៀត។
• ៣០ កក្កដា
  • សង្គ្រាមអ៊ីរ៉ង់៖ ប្រទេសអារ៉ាប៊ីសាអ៊ូឌីតបានប្រកាសបង្កើតសម្ព័ន្ធភាពយោធា ១៤ ប្រទេសឡើងដើម្បីស្ដារនិងការពារសេរីភាពនាវាចរណ៍នៅសមុទ្រក្រហម ចំពេលដែលសង្គ្រាមអ៊ីរ៉ង់កំពុងពុះកញ្ជ្រោល និងក៏ដូចជាវិបត្តិនៃសមុទ្រនេះដែលបង្កឡើងដោយក្រុមឧទ្ទាមហ៊ូទី។
  • វិបត្តិព្រំដែនម៉ារ៉ុក–អេស្ប៉ាញ៖ មនុស្សប្រមាណ ៦០,០០០ នាក់បានផ្ដុំគ្នាឆ្លងព្រំដែនដោយខុសច្បាប់ពីប្រទេសម៉ារ៉ុកចូលទៅក្នុងប្រទេសអេស្ប៉ាញតាមរយៈទីក្រុងស្វយ័តសេអ៊ូតា ខណៈមនុស្សមួយចំនួនតូចទៀតបានព្យាយាមឆ្លងដែនចូលទៅក្នុងទីក្រុងមេលីយ៉ា។

សីហា

• ៧ សីហា – ប្រទេសអារ៉ាប៊ីសាអ៊ូឌីត ប៉ាគីស្ថាន និងតួកគីបានរួមគ្នាចុះហត្ថលេខាលើកិច្ចព្រមព្រៀងការពារជាតិរួមទីក្រុងមេក្កា ដែលជាកតិកាសញ្ញាការពារជាតិជនុបត្ថម្ភ ខណៈសង្គ្រាមអ៊ីរ៉ង់បានកំពុងពុះកញ្ជ្រោល។
• ១០ សីហា – គ្រោះរញ្ជួយដីកម្រិត ៧.៤ វិចទ័រ បានរង្គោះរង្គើប្រទេសកូឡុំប៊ី ដោយបានសម្លាប់មនុស្សប្រមាណ ២៤០ នាក់ និងបង្ករបួសដល់មនុស្សជាង ១,២៤៨ នាក់ផ្សេងទៀត។
• ១១ សីហា
  • ការចោទប្រកាន់ឧក្រិដ្ឋជនសង្គ្រាមស៊ីវិលស៊ីរី៖ តុលាការមួយនៅទីក្រុងដាម៉ាស់បានកាត់ទោសប្រហារជីវិតអតីតមន្ត្រីស៊ីរីចំនួនប្រាំបួនរូប ដោយក្នុងនោះរួមមានអតីតប្រធានាធិបតីលោកបាស្ហា អាល់-អាសាដ ព្រមទាំងប្អូនប្រុសរបស់លោកឈ្មោះម៉ាហៀរ អតីតរដ្ឋមន្ត្រីក្រសួងការពារជាតិលោកហ្វាដ ចាស៊េម អាល់-ហ្វារីជ អតីតប្រធាននាយកដ្ឋានសន្តិសុខនយោបាយប្រចាំក្រុងដារ៉ាអា និងត្រូវជាបងជីដូនមួយរបស់អាសាដ គឺលោកអាធីហ្វ ណាជីប ពីបទឃាតកម្មគិតទុកជាមុន ទារុណកម្ម និងឧក្រិដ្ឋកម្មប្រឆាំងមនុស្សជាតិដែលបានប្រព្រឹត្តទៅក្នុងកំឡុងសង្គ្រាមស៊ីវិលស៊ីរី។ ក្រៅពីលោកណាជីប ឧក្រិដ្ឋជនប្រាំបីនាក់ផ្សេងទៀតត្រូវបានកាត់ទោសដោយកំបាំងមុខ។
  • សាឡាងដឹកអ្នកដំណើរមួយគ្រឿងបានក្រឡាប់លិចនៅក្នុងបឹងការីបា ប្រទេសស៊ីមបាវ៉េ ដោយបានសម្លាប់មនុស្សយ៉ាងតិច ៩៧ នាក់ ដោយនាំឱ្យវាក្លាយជាគ្រោះឧប្បត្តិហេតុលិចនាវាដ៏សាហាវបំផុតនៅក្នុងប្រវត្តិសាស្ត្រនៃប្រទេសនេះ។
• ១២ សីហា – សូរ្យគ្រាសពេញលេញបានកើតលេចឡើងនៅតំបន់ផ្នែកខ្លះនៃទ្វីបអឺរ៉ុប ដែលនេះជាបាតុភូតសូរ្យគ្រាសពេញលេញដំបូងបង្អស់នៅទ្វីបអឺរ៉ុបក្នុងសតវត្សរ៍ទី២១ ចាប់តាំងបាតុភូចុងក្រោយដែលបានកើតឡើងកាលឆ្នាំ១៩៩៩។
• ១៣ សីហា – ការបោះឆ្នោតសកលសំប៊ី៖ លោកហាកាំងដេ ហ៊ីឈ៉ៃលេម៉ាបានទទួលជ័យជម្នះបន្តកាន់អំណាចជាប្រធានាធិបតីបន្ថែមមួយអាណត្តិទៀត ខណៈដែលគណបក្សរួបរួមដើម្បីជាតិអភិវឌ្ឍន៍បានឈ្នះអាសនៈភាគច្រើននៅក្នុងរដ្ឋសភាជាតិ។
• ១៤ សីហា – មនុស្សយ៉ាងតិច ៨៧ នាក់បានបាត់បង់ជីវិត និង ១,៣០០ នាក់ផ្សេងទៀតបានទទួលរងរបួសនៅក្នុងហេតុការណ៍គ្រោះរញ្ជួយដីកម្រិត ៧.៧ វិចទ័រនៅកោះហ្វ្លរ៉េសនៃប្រទេសឥណ្ឌូណេស៊ី។
• ១៨ សីហា – មនុស្សប្រមាណជាង ១០០ នាក់បានស្លាប់បាត់បង់ជីវិតនៅក្នុងគ្រោះរអិលបាក់ដីនាអណ្ដូងជីកយករ៉ែមាសសិប្បកម្មមួយកន្លែងនៅហ្សាំប័រ ខេត្តណាណាមំបេរ៉េ សាធារណរដ្ឋអាហ្វ្រិកកណ្តាល ក្បែរព្រំដែនជាមួយប្រទេសកាមេរូន។
• ២០ សីហា – បដិវត្តន៍រ៉ូហាវ៉ា៖ កងកម្លាំងប្រជាធិបតេយ្យស៊ីរីបានប្រកាសធ្វើសមាហរណកម្មកងកម្លាំងខ្លួនចូលទៅក្នុងកងទ័ពស៊ីរី ហើយជាលទ្ធផល រដ្ឋបាលស្វយ័តប្រជាធិបតេយ្យស៊ីរីខាងជើងនិងកើតត្រូវបានរំលាយ ហើយទឹកដីរបស់វាបានបញ្ចូលទៅក្រោមអធិបតេយ្យភាពប្រទេសស៊ីរីវិញ។
• ២៣ សីហា – ការបោះឆ្នោតនីតិបញ្ញត្តិកាហ្សាក់ស្ថាន៖ គណបក្សអាឌីឡេតនិយមតូកាយអេវបានដណ្ដើមឈ្នះអាសនៈមួយភាគធំលើសលប់នៅក្នុងសភាគូរូលតៃដែលទើបបង្កើតថ្មី។
• ២៤ សីហា – ជម្លោះក្រោយសង្គ្រាមស៊ីវិលស៊ីរី៖ សហរដ្ឋអាមេរិកបានដកប្រទេសស៊ីរី និងក្រុមហាយ៉ាតតះរៀរអាល់ឆាមចេញពីបញ្ជីរដ្ឋឧបត្ថម្ភអំពើភេរវកម្ម ដោយបន្ធូរបន្ថយកម្រិតលក្ខខណ្ឌនៃការវិនិយោគបរទេសនៅក្នុងស៊ីរី និងអនុញ្ញាតឱ្យសេវាកម្មដូចជាវីសាបើកប្រតិបត្តិការនៅក្នុងប្រទេសស៊ីរី។
• ២៦ សីហា – គ្រោះទឹកជំនន់នេប៉ាល់៖ មនុស្សយ៉ាងតិច ១,១៣០ នាក់ត្រូវបានបាត់បង់ជីវិត និងមនុស្សប្រមាណជិត ៤,៥០០ នាក់ទៀតត្រូវបានបាត់ខ្លួននៅក្នុងតំបន់ស្វយ័តទីបេ បន្ទាប់ពីទឹកជំនន់ភ្លាមៗបានវាយប្រហារតំបន់រវាងទីបេ និងនេប៉ាល់។
• ២៨ សីហា – រាជាធិបតេយ្យន័រវែស៖ ព្រះបាទហារ៉ាល់ទី៥ បានសោយព្រះទិវង្គត ដោយព្រះរាជបុត្រារបស់ទ្រង់ព្រះនាមហូកុនទី៨ បានឡើងស្នងរាជ្យបន្តជាព្រះមហាក្សត្រន័រវែស។
• ២៩ សីហា
  • ប្រជាមតិចរចាសមាជិកភាពសហភាពអឺរ៉ុបរបស់អ៊ីស្លង់៖ ប្រជាមតិដើម្បីកំណត់ការបន្តចរចាចូលជាសមាជិកនៃសហភាពអឺរ៉ុបរបស់អ៊ីស្លង់ត្រូវបានប្រជាជនអ៊ីស្លង់ភាគច្រើនបដិសេដមិនគាំទ្រ។
  • រដ្ឋប្រហារប៉ុនប៉ងនីហ្សេ៖ ក្រុម​ឧទ្ទាម​ក្បត់មួយ​ក្រុម​នៃ​កងកម្លាំង​ប្រដាប់អាវុធ​នីហ្សេ ដែលសម្ដៅលើខ្លួនឯងថា កងកម្លាំង​ប្រដាប់អាវុធ​ដើម្បី​ស្តារជាតិ​មាតុភូមិ​ បាន​ព្យាយាម​ធ្វើ​រដ្ឋប្រហារ​ទម្លាក់​ប្រធានាធិបតី លោកអាប់ឌូរ៉ាម៉ាន ធានី។
• ៣០ សីហា – អង្គការណាសាបានពាំនាំតេឡេស្កុបអវកាសណានស៊ី ហ្ក្រេស រ៉ូមែនតាមរយៈរ៉ុក្កែតហ្វាល់ខនហ៊ែវីរបស់ក្រុមហ៊ុនស្ពេសអ៊ិចទៅទីអវកាស។ តេឡេស្កុបនេះត្រូវបានរចនាឡើងដើម្បីឆ្លុះមើលសិក្សាអំពីថាមពលងងឹត សារធាតុងងឹត និងភពក្រៅប្រព័ន្ធ។ តេឡេស្កុបនេះផងដែរមានសមត្ថភាពអាចឆ្លុះមើលទិដ្ឋភាព​បានធំ​ជាង​តេឡេស្កុប​អវកាសហាប់ប៊លយ៉ាងតិច ១០០ ដង។

កញ្ញា

• ២ កញ្ញា – ការបោះឆ្នោតប្រធានាធិបតីអេស្តូនី៖ លោកស្រីអ៊ូល្លឺ ម៉ាឌីសត្រូវបានបោះឆ្នោតតែងតាំងជាប្រធានាធិបតីនៃប្រទេសអេស្តូនីដោយរដ្ឋសភាជាតិ។
• ៣ កញ្ញា – ការវាយប្រហារនៅយេម៉ែន៖ ក្រុមឧទ្ទាមហ៊ូទីបានបើកការវាយប្រហារដីគោកដ៏ធំមួយប្រឆាំងនឹងកងកម្លាំងរដ្ឋាភិបាលហ៊ូទីដែលពិភពលោកទទួលស្គាល់​ នាំឱ្យបទឈប់បាញ់អស់សុពលភាពភ្លាមៗ និងសង្គ្រាមស៊ីវិលបានចាប់ផ្ដើមម្ដងទៀត។
• ៨ កញ្ញា
  • សម័យប្រជុំលើកទី៨១ នៃមហាសន្និបាតអង្គការសហប្រជាជាតិបានប្រារព្ធធ្វើឡើង។
  • រដ្ឋប្រទេសចំនួន ១២ រួមមាន កាណាដា បារាំង និងសហរាជាណាចក្រ បានប្រកាសពីផែនការដាក់ចេញ ឬគាំទ្រការរឹតបន្តឹងផ្នែកពាណិជ្ជកម្មលើទំនិញដែលនាំចេញមកពីតំបន់តំណាំងលំនៅរបស់អ៊ីស្រាអែល ដោយលើកឡើងថាវាបានគំរាមកំហែងដល់ដំណោះស្រាយរដ្ឋពីរ។
• ១២–១៣ កញ្ញា – កិច្ចប្រជុំកំពូលប៊្រីក្សឆ្នាំ២០២៦ បានប្រព្រឹត្តិធ្វើឡើងនៅប្រទេសឥណ្ឌា។
• ១៣ កញ្ញា – ការបោះឆ្នោតសកសស៊ុយអែតបានប្រព្រឹត្តិធ្វើឡើង។

ថ្ងៃ​មរណភាព

អត្ថបទដើម: មរណភាពក្នុងឆ្នាំ២០២៦