ផ្គាក់

ផ្គាក់- រាប់ជាអាវុធសម្រាប់ប្រើក្នុងចម្បាំង ១ យ៉ាងទៀត មានលក្ខណៈ; ប្រហែលនឹងដាវដងវែង ប្លែកតែផ្លែ ទ្រង់ក្ងក់ៗ ហើយ មានជា ២ បែប គឺ ១ យ៉ាងចុងស្រួច ១ យ៉ាងទៀត ចុងកាត់បញ្ចៀង ហើយឆែកចុងបន្តិចក៏មាន មិនឆែកក៏មាន ទំហំបន្ទារផ្ទៃប្រមាណ ៣ ធ្លាប់ បណ្តោយប្រមាណ ១ ហត្ថ ដងឈើប្រវែងប្រមាណ ២ ហត្ថ, លក្ខណៈ យ៉ាងនេះមានទាំងផ្គាក់ចុងស្រួច ទាំងផ្គាក់ចុងកាត់ ដូចគ្នា ។

តែនៅមានផ្គាក់ចុងកាត់ ១ បែបទៀត ប្លែកអំពីផ្គាក់ដែលពោលមក ហើយនេះ គឺគ្មានទទ្សា គ្មានមៀន ដងធ្វើដោយគល់ឫស្សី ១ យ៉ាង ។ ដងនោះគេរើសរកឫស្សី ដែលមានគល់ត្លុសៗ កាន់យកទាំងគល់នោះ មកអារ. ដាប់បញ្ចុះគល់ផ្លែផ្គាក់ ហើយយកដែកត្របែងរឹតភ្ជាប់នឹងដងតែ ម្តង ។ ផ្គាក់បែបនេះ សព្វថ្ងៃឃើញមានប្រើ នៅក្នុងខែត្រសៀមរាបច្រើន ជារបស់ដែលគេនិយមប្រើមកតាំងពីបុរាណកាល ចូរមើលរូបភាពកងទ័ព បុរាណដែលធ្លាក់ទុកនៅប្រាសាទបាយ័នជាដើម ក៏នឹងឃើញគេប្រើផ្គាក់ បែបនេះ ។ ផ្គាក់ទាំងពីរបែបនេះគេប្រើជាអាវុធសម្រាប់សេនាថ្មើរជើង ១ យ៉ាង ។ ផ្គាក់បែបខាងលើ វេលានេះមានតម្កល់ទុកនៅក្នុងពិពិធកណ្ឌដ្ឋាន (សាលារចនា) ។