ល្បែងឳបត្រឡាច
ល្បែងឱបត្រឡាច ឬល្បែងបេះឪឡឹក ជាល្បែងមួយរបស់ក្មេងប្រុស-ស្រី ដែលតែងស្រុះស្រួល បបួលគ្នីគ្នាលេងនាពេលយប់ខែភ្លឺ និងមិនចាំបាច់មានកម្មវិធីបុណ្យទានអ្វី ក៏អាចលេងបានដែរ។ [១]
ល្បែងនេះ គឺគេត្រូវចាត់មនុស្សពីរនាក់ ម្នាក់ឲ្យធ្វើជាតំណាងម្ចាស់ត្រឡាច ឬឪឡឹក ឯម្នាក់ទៀតឲ្យធ្វើជាតំណាងអ្នកទិញ។ ចំណែកឯអ្នកចូលរួមលេងទាំងប៉ុន្មាន គឺតម្រូវឲ្យធ្វើជាត្រឡាច ឬជាឪឡឹកទាំងអស់ ដោយប្តូរវេនគ្នា ធ្វើជាអ្នកលក់ អ្នកទិញ និងជាត្រឡាចម្នាក់ម្តង។ អ្នកលេងទាំងនោះ ត្រូវសំដៅទៅរកគល់ឈើ សសរផ្ទះ ឬវត្ថុអ្វីមួយរឹងមាំ មានទំហំល្មមអាចឱបបាន។
កាលបើរកកន្លែងបានល្អហើយ ក្មេងម្នាក់ ក្នុងចំណោមក្មេងតំណាងឲ្យត្រឡាច ឬឪឡឹកនោះ ត្រូវអង្គុយឱបគល់ឈើ ឬសសរនោះ ទាំងដៃ និងជើង ឯក្មេងម្នាក់ទៀតជាក្មេងជាទី២ គឺត្រូវអង្គុយចុះយកដៃឱបចង្កេះ ព្រមទាំងយកជើងទាំងពីរ ដាក់លើភ្លៅក្មេងទី១ ។ ក្មេងទី៣ និងក្មេងដទៃទៀត ត្រូវយកដៃ និងជើងឱបក្មេងទី២ ឲ្យដូចក្មេងទី២ឱបក្មេងទី១ អ៊ីចឹងដែរ រហូតដល់អស់គ្នា។
បន្ទាប់ពីឱបបន្តគ្នាអស់ហើយ ក្មេងម្នាក់ដែលជាតំណាងម្ចាស់ត្រឡាចនោះ ធ្វើព្រងើយ ដើរជុំវិញនៅក្បែងក្មេងៗជាត្រឡាចនោះ ហើយក្មេងម្នាក់ទៀតដែលតំណាងជាអ្នកទិញត្រឡាច ដើរចូលមកសួរតថ្លៃអ្នកលក់ ដូចជាទំនិញក្នុងផ្សារអ៊ីចឹង។
កាលណាអ្នកលក់ និងអ្នកទិញត្រូវគ្នាក្នុងតម្លៃណាមួយហើយ អ្នកលក់ ឲ្យអ្នកទិញ បេះត្រឡាចតាមចិត្ត ហើយអ្នកទិញក៏ដើរចូលមកយកដៃគោះ គោះខ្នងក្មេងៗដែលអង្គុយឱបគល់ឈើ ឬសសរ ជាប់គ្នានោះតិចៗ។ គោះបណ្តើរ សួរបណ្តើរថា «ខ្ចី» ឬ«ទុំ»? អ្នកទិញគោះបន្តគ្នា ពីម្នាក់ទៅម្នាក់ ហើយក្មេងដែលត្រូវអ្នកទិញគោះមុន ត្រូវឆ្លើយថា«ខ្ចីៗ»រហូត ទាល់តែដល់អ្នកចុងក្រោយបំផុត ទើបឆ្លើយថា «ទុំ» ។
បន្ទាប់ពីឮពាក្យនេះហើយ អ្នកទិញ ក៏បេះយកអ្នកចុងគេបំផុតនោះ ដោយប្រើកម្លាំងខ្លាំង ដើម្បីទាញ ព្រោះអ្នកអង្គុយទាំងនោះ ព្យាយាមរឹបឱបគា្នជាប់ចំកោងខ្នងរៀងៗខ្លួន រេចុះ រេឡើង ប្រៀបដូចជាទងត្រឡាច។ អ្នកទិញត្រូវប្រលេះម្តងមួយៗ ប្រលេះបានហើយត្រូវទុកមួយដុំ។ បើសិនជាប្រលេះមិនបានទេ ពួកគេត្រូវលេងសារជាថ្មី៕
ដកស្រង់ចេញពីសៀវភៅ៖ «ល្បែងប្រជាប្រិយខ្មែរ» ដែលរៀបរៀងដោយ៖ លោក ចាប ពិន អ្នកស្រី ពេជ្យ សល់, លោក លី ធាមតេង និង ស្តើង ឆូរ នៃក្រុមជំនុំទំនៀមទម្លាប់ខ្មែរ(ឆ្នាំ១៩៦៤)[១]
- ↑ "ល្បែងឱបត្រឡាច ឬល្បែងបេះឪឡឹក ជាលំហាត់ដៃជើងឲ្យមាំមួន និងសុខភាពល្អ". thmeythmey.com (in អង់គ្លេស). Retrieved 2025-04-08.
{{cite web}}: zero width space character in|title=at position 6 (help)