សម្បត្តិវប្បធម៌ខ្មែរដែលបានដាក់បញ្ចូលទៅក្នុងបញ្ជីបេតិកភ័ណ្ឌពិភពលោក

ឧទ្យានជាតិអង្គរ

តំបន់រលួស

ប្រាសាទបន្ទាយស្រី

ប្រាសាទព្រះវិហារ

តំបន់ប្រាសាទសម្បូរព្រៃគុហ៍

តំបន់ប្រាសាទកោះកេរ្តិ៍

សារមន្ទីរឧក្រិដ្ឋកម្មប្រល័យពូជសាសន៍ទួលស្លែង

មជ្ឈមណ្ឌលប្រល័យពូជសាសន៍ជើងឯក

អតីតមន្ទីរឃុំឃាំង ១៣

តំបន់បេតិកភ័ណ្ឌពិភពលោកនៅក្នុងព្រះរាជាណាចក្រកម្ពុជា

អង្គការសិក្សា​វិទ្យាសាស្រ្ត អប់រំ និង វប្បធម៌ (អង់គ្លេស : The United Nations Educational, Scientific and Cultural Organization) ឬ ហៅកាត់ថាយូណេស្កូ(UNESCO) កំណត់តំបន់បេតិកភ័ណ្ឌពិភពលោកដែលមានតម្លៃជាសកលដ៏លេចធ្លោចំពោះបេតិកភ័ណ្ឌវប្បធម៌ឬបេតិកភ័ណ្ឌធម្មជាតិដែលត្រូវបានស្នើសុំចុះបញ្ជីដោយរដ្ឋហត្ថលេខីនៃអនុសញ្ញាស្តីពីការការពារបេតិកភ័ណ្ឌវប្បធម៌និងធម្មជាតិពិភពលោកនៅក្នុងឆ្នាំ ១៩៧២ របស់អង្គការយូណេស្កូ។បេតិកភ័ណ្ឌវប្បធម៌មានដូចជាបូជនីយដ្ឋាន(រួមមានស្នាដៃស្ថាបត្យកម្ម រូបចម្លាក់ ឬ សិលាចារឹក) ក្រុមសំណង់អគារ និង ទីតាំងនានា(រួមទាំងតំបន់បុរាណវិទ្យា)។បេតិកភ័ណ្ឌធម្មជាតិរួមមានលក្ខណៈពិសេសនៃធម្មជាតិ(ទម្រង់រូបវន្តនិងជីវសាស្ត្រ) ទម្រង់ភូគព្ភសាស្ត្រ និង ភូមិសណ្ឋានវិទ្យា(រួមទាំងជម្រករបស់ប្រភេទសត្វនិងរុក្ខជាតិដែលកំពុងរងនូវការគំរាមកំហែង)ព្រមទាំងតំបន់ធម្មជាតិដែលមានសារៈសំខាន់ផ្នែកវិទ្យាសាស្ត្រ ការអភិរក្ស ឬ សោភ័ណភាពធម្មជាតិ។ប្រទេសកម្ពុជាបានផ្តល់សច្ចាប័នលើអនុសញ្ញានេះនៅថ្ងៃទី ២៨ ខែវិច្ឆិកា ឆ្នាំ ១៩៩១។

ប្រទេសកម្ពុជាមានតំបន់ចំនួន ០៥ ដែលត្រូវបានចុះនៅក្នុងបញ្ជីបេតិកភ័ណ្ឌពិភពលោក។តំបន់អង្គរត្រូវបានចុះបញ្ជីនៅក្នុងឆ្នាំ ១៩៩២ នៅពេលដែលប្រទេសកម្ពុជាស្ថិតនៅក្រោមការគ្រប់គ្រងជាបណ្តោះអាសន្នរបស់បេសកកម្មអង្គការសហប្រជាជាតិបន្ទាប់ពីសង្គ្រាមកម្ពុជា-យួនស្របតាមកិច្ចព្រមព្រៀងសន្តិភាពទីក្រុងប៉ារីសនៅក្នុងឆ្នាំ ១៩៩១។តំបន់នេះត្រូវបានដាក់បញ្ចូលភ្លាមៗទៅក្នុងបញ្ជីបេតិកភ័ណ្ឌពិភពលោកដែលស្ថិតនៅក្នុងស្ថានភាពគ្រោះថ្នាក់ដើម្បីអាចដោះស្រាយបញ្ហាបន្ទាន់នានាពាក់ព័ន្ធនឹងការអភិរក្សបានយ៉ាងឆាប់រហ័សនិងមានប្រសិទ្ធភាព។នៅក្នុងឆ្នាំ ២០០៤ តំបន់អង្គរត្រូវបានដកចេញពីបញ្ជីបេតិកភ័ណ្ឌពិភពលោកដែលស្ថិតនៅក្នុងស្ថានភាពគ្រោះថ្នាក់។ប្រាសាទព្រះវិហារត្រូវបានចុះបញ្ជីនៅក្នុងឆ្នាំ ២០០៨ តំបន់ប្រាសាទសំបូរព្រៃគុហ៍នៅក្នុងឆ្នាំ ២០១៨ តំបន់ប្រាសាទកេាះកេរ្តិ៍នៅក្នុងឆ្នាំ ២០២៣ និង តំបន់បូជនីយដ្ឋានចងចាំនៃកម្ពុជានៅក្នុងឆ្នាំ ២០២៥។

បេតិកភ័ណ្ឌផ្នែករូបី(World Heritage Site)

ឈ្មោះតំបន់ដែលបានចុះនៅក្នុងបញ្ជី	រូបភាព	ទីតាំង(រាជធានី-ខេត្ត)	លក្ខណៈវិនិច្ឆ័យ	កាលបរិច្ឆេទ	សម័យប្រជុំ	ឯកសារយោង
ឧទ្យានជាតិអង្គរ		ខេត្តសៀមរាប	668; i, ii, iii, iv (វប្បធម៌)	១៤ ធ្នូ ១៩៩២	សម័យប្រជុំគណៈកម្មាធិការបេតិកភ័ណ្ឌពិភពលោកលើកទី ១៦ នៅទីក្រុងសាន់តា ហ្វេ សហរដ្ឋអាមេរិក។
ប្រាសាទព្រះវិហារ		ខេត្តព្រះវិហារ	1224: i (វប្បធម៌)	០៧ កក្កដា ២០០៨	សម័យប្រជុំគណៈកម្មាធិការបេតិកភ័ណ្ឌពិភពលោកលើកទី ៣២ នៅទីក្រុងកេប៊ិច ប្រទេសកាណាដា។
តំបន់ប្រាសាទសម្បូរព្រៃគុហ៍		ខេត្តកំពង់ធំ	1532; ii, iii, vi (វប្បធម៌)	០៨ កក្កដា ២០១៧	សម័យប្រជុំគណៈកម្មាធិការបេតិកភ័ណ្ឌពិភពលោកលើកទី ៤១ នៅទីក្រុងក្រាកូវ ប្រទេសប៉ូឡូញ។
តំបន់ប្រាសាទកោះកេរ្តិ៍		ខេត្តព្រះវិហារ	1667; ii, iv (វប្បធម៌)	១៧ កញ្ញា ២០២៣	សម័យប្រជុំគណៈកម្មាធិការបេតិកភ័ណ្ឌពិភពលោកលើកទី ៤៥ នៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត។
បូជនីយដ្ឋានចងចាំនៃកម្ពុជា: សារមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក និង អតីតមន្ទីរឃុំឃាំង ១៣		រាជធានីភ្នំពេញ, ខេត្តកំពង់ឆ្នាំង, ខេត្តកំពង់ស្ពឺ	1748; vi (វប្បធម៌)	១១ កក្កដា ២០២៥	សម័យប្រជុំគណៈកម្មាធិការបេតិកភ័ណ្ឌពិភពលោកលើកទី ៤៧ នៅទីក្រុងប៉ារីស ប្រទេសបារាំង។

បញ្ជីបេតិកភ័ណ្ឌផ្នែកអរូបី(Intangible Cultural Heritage)

ឈ្មោះបេតិកភ័ណ្ឌអរូបីដែលបានចុះនៅក្នុងបញ្ជី	រូបភាព	ប្រភេទបញ្ជីដែលត្រូវបានចុះ	កាលបរិច្ឆេទ	សម័យប្រជុំ	ឯកសារយោង
របាំព្រះរាជទ្រព្យ		បញ្ជីតំណាងនៃមនុស្សជាតិ	០៧ វិច្ឆិកា ២០០៣	កិច្ចប្រជុំលើកទី ០៣ នៃគណៈកម្មាធិការអន្តររដ្ឋាភិបាល​ដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងអ៊ីស្ដង់ប៊ុល ប្រទេសតួកគី។
ល្ខោនស្រមោលស្បែកធំ		បញ្ជីតំណាងនៃមនុស្សជាតិ	២៥ វិច្ឆិកា ២០០៥	កិច្ចប្រជុំលើកទី ០៣ នៃគណៈកម្មាធិការអន្តររដ្ឋាភិបាល​ដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងអ៊ីស្ដង់ប៊ុល ប្រទេសតួកគី។
ល្បែងទាញព្រ័ត្រ		បញ្ជីតំណាងនៃមនុស្សជាតិ	០២ ធ្នូ ២០១៥	កិច្ចប្រជុំលើកទី ១០ នៃគណៈកម្មាធិការអន្តររដ្ឋាភិបាល​ដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងវីនដ៍ហុក ប្រទេសណាមីប៊ី។
ចាប៉ីដងវែង		បញ្ជីត្រូវការការសង្គ្រោះបន្ទាន់	៣០ វិច្ឆិកា ២០១៦	កិច្ចប្រជុំលើកទី ១១ នៃគណៈកម្មាធិការអន្តររដ្ឋាភិបាលដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូ​នៅទីក្រុងអាឌីស អាបាបា ប្រទេសអេត្យូពី។
ល្ខោនខោលវត្តស្វាយអណ្ដែត		បញ្ជីត្រូវការការសង្គ្រោះបន្ទាន់	២៨ វិច្ឆិកា ២០១៨	កិច្ចប្រជុំលើកទី ១៣​ នៃគណៈកម្មាធិការអន្តររដ្ឋាភិបាលដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងផត ល្វីស ប្រទេសម៉ូរីស។
គុនល្បុក្កតោ		បញ្ជីតំណាងនៃមនុស្សជាតិ	២៩ វិច្ឆិកា ២០២២	កិច្ចប្រជុំលើកទី ១៧ នៃគណៈកម្មាធិការអន្តររដ្ឋាភិបាលដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងរ៉ាបាត ប្រទេសម៉ារ៉ុក។
ក្រមាខ្មែរ		បញ្ជីតំណាងនៃមនុស្សជាតិ	០៤ ធ្នូ ២០២៤	កិច្ចប្រជុំលើកទី ១៩ នៃគណៈកម្មាធិការអន្តររដ្ឋាភិបាលដើម្បីការពារបេតិកភ័ណ្ឌវប្បធម៌អរូបីរបស់អង្គការយូណេស្កូនៅទីក្រុងអាសង់ស្យុង ប្រទេសប៉ារ៉ាហ្គាយ។

បញ្ជីស្មារតីនៃការចងចាំពិភពលោក(Memory of the World International Register)

• សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ត្រូវបានដាក់បញ្ចូលកាលពីថ្ងៃទី ៣១ ខែកក្កដា ឆ្នាំ ២០០៩ នៅទីក្រុងប្រ៊ិជថោន ប្រទេសបាបាដូស។
• រឿងអ៊ីណាវ បុស្សិបា ត្រូវបានដាក់បញ្ចូលកាលពីថ្ងៃទី​​ ៣០ ខែតុលា ឆ្នាំ ២០១៧​ នៅទីក្រុងប៉ារីស ប្រទេសបារាំង។

បញ្ជីស្មារតីនៃការចងចាំពិភពលោកថ្នាក់តំបន់អាស៊ីប៉ាស៊ីហ្វិក(Memory of the World for Asia and the Pacific)

• ខ្សែ​អាត់​សម្លេង​រឿង​រាមកេរ្តិ៍តាគ្រុឌ​ ត្រូវបានដាក់បញ្ចូលកាលពីថ្ងៃទី ១៤ ខែឧសភា ឆ្នាំ ២០១៤ នៅទីក្រុងក្វាងចូវ ប្រទេសចិន។

ឋបនីយជីវមណ្ឌល(Biosphere Reserves)

• ឋបនីយជីវមណ្ឌលទន្លេសាប ត្រូវបានដាក់បញ្ចូលដោយអង្គការយូណេស្កូនៅក្នុងឆ្នាំ ១៩៩៧។

បណ្ដាញទីក្រុងច្នៃប្រឌិតរបស់អង្គការយូណេស្កូ(UNESCO Creative Cities Network)

• ក្រុងបាត់ដំបង ត្រូវបានអង្គការយូណេស្កូចុះនៅក្នុងបញ្ជីបណ្ដាញទីក្រុងច្នៃប្រឌិតផ្នែកម្ហូបអាហារ(Gastronomy)កាលពីថ្ងៃទី​ ៣១ ខែតុលា ឆ្នាំ ២០២៣ នៅទីក្រុងអ៊ីស្តង់ប៊ុល ប្រទេសតួកគី។