សូ សាវឿន

អ្នកស្រីសូ-សាវឿន
ឈ្មោះពេញ	សូ-សាវឿន
ថ្ងៃខែឆ្នាំកំណើត	០១ មិថុនា ១៩៤៥
ទីកន្លែងកំណើត	ឃុំបឹងងោង ស្រុកគងពិសី ខែត្រកំពង់ស្ពឺ
បិតានាម	សូ-ប៉ុក
មាតានាម	តាត-វិល
បងប្អូនបង្កើត	២ នាក់
ការងារ	តារាចម្រៀង

អ្នកស្រីសូ-សាវឿន (កើត ១ មិថុនា ១៩៤៥-បច្ចុប្បន្ន) ជាតារាចម្រៀងខ្មែរមួយរូបដែលមានកេរ្តិ៍ឈ្មោះក្នុងសម័យមុនអាពត។

ជីវប្រវត្តិសង្ខេប

អ្នកស្រីសូ-សាវឿន ជាអតីតអ្នកចម្រៀងដ៏មានកេរ្តិ៍ឈ្មោះបោះសំឡេងក្នុងប្រទេសកម្ពុជា កាលពីអំឡុងទសវត្សរ៍ទី៦០និងដើមទសវត្សរ៍ទី៧០។ អ្នកស្រីកើតនៅថ្ងៃទី០១ ខែមិថុនា ឆ្នាំ១៩៤៥ ក្នុងឃុំបឹងងោង ស្រុកគងពិសី ខេត្តកំពង់ស្ពឺ។ ឪពុកឈ្មោះសូ-ប៉ុក ជាទាហានសម័យខ្មែរឥស្សរៈ ម្តាយឈ្មោះតាត-វិល។ អ្នកស្រីមានបងប្អូនបង្កើតតែ២នាក់ប៉ុណ្ណោះ។ អ្នកស្រីបានរៀបអាពាហ៍ពិពាហ៍ជាមួយលោកកែវ-ឯម ដែលជាតន្រ្តីករដ៏ល្បីម្នាក់ប្រចាំក្រុមតន្រ្តីយោធាភិរម្យ។ អ្នកទាំងពីរទទួលបានចំណងដៃបុត្របីនាក់ក្នុងនោះមានស្រី ១ នាក់ និង ប្រុស ២ នាក់ ។ ក្នុងសម័យប៉ុលពត គឺនៅចុងឆ្នាំ១៩៧៦ អ្នកស្រីមានភ័ព្វសំណាងបានភៀសខ្លួនពីមាតុភូមិទៅរស់នៅប្រទេសបារាំង។ សព្វថ្ងៃនេះ អ្នកស្រីសូ-សាវឿន កំពុងរស់នៅទីក្រុងប៉ារីស ប្រទេសបារាំង។

ជីវិតសិល្បៈ និង ស្នាដៃ

អ្នកស្រីបានចាកចេញពីស្រុកកំណើតមករស់នៅទីក្រុងភ្នំពេញជាមួយឪពុកធំដែលនៅដំណាក់លោកឃុន តាត។ ដើមឡើយ អ្នកស្រីបានចូលច្រៀងនៅក្នុងក្រុមល្ខោនផ្សារស៊ីលិប។ លុះក្រោយមក លោក កែវ ឯម ដែលត្រូវជាស្វាមីអ្នកស្រីបានមកឃើញអ្នកស្រីច្រៀងហើយចាប់អារម្មណ៍ពេញចិត្តចំពោះទឹកដមសម្លេងរបស់អ្នកស្រីក៍បានយកអ្នកស្រីមកបង្ហាត់បង្រៀនឱ្យចេះច្រៀងរហូតទាល់តែមានឈ្មោះបោះសម្លេងទទួលការគាំទ្រពីសំណាក់មហាជន។ កាលពីសម័យទៅដល់សង្គមរាស្រ្តនិយម អ្នកស្រីសូ សាវឿន បានច្រៀងនៅក្នុងក្រុមតន្រ្តីយោធាភិរម្យដង្ហែអង្គព្រះករុណាដំណាលនឹងអ្នកចម្រៀងស្រីដទៃទៀតដូចជា អ្នកម្នាងសៀង ឌី, អ្នកស្រីម៉ៅ សារ៉េត ,អ្នកស្រីឈុន វណ្ណា និងអ្នកស្រីឈួន ម៉ាឡៃ។ គេតែងឃើញវត្តមានអ្នកស្រីឡើងច្រៀងជាកិត្តិយសក្នុងការប្រគំតន្រ្តីរបស់ក្រុមយោធាភិរម្យនៅពេលសមាជជាតិនៅវាលមេរុម្ដងៗ ដែលមាន កវីសេកមាសម៉ា ឡៅពី ជាអ្នកធ្វើអត្ថាធិប្បាយយ៉ាងពិរោះរណ្ដំ។ អ្នកស្រីសូ សាវឿនត្រូវបានកវីសេកមាសម៉ា ឡៅពីប្រសិទ្ធិនាមឱ្យថាជាតារាចម្រៀងសម្លេងរៃកណ្ដឹង ដោយសារអ្នកស្រីមានអំណោយផលទឹកដមសម្លេងពិរោះគ្រលួចស្រួយស្រេះដែលពិបាកឱ្យអ្នកចម្រៀងដទៃទៀតត្រាប់តាមអ្នកស្រី ។ គួរបព្ជាក់ផងដែរថា អ្នកស្រីសូ សាវឿន ជាតារាចម្រៀងដំបូងបង្អស់ដែលច្រៀងបទចង្វាក់សារ៉ាវ៉ាន់នៅប្រទេសកម្ពុជាគឺបទឱពពេជចៀប ដែលជាស្នាដៃនិពន្ធរបស់កវីវ៉ែន សុនថតផ្សាយដោយក្រុមតន្រ្តី រាជតម្រួតភិរម្យ នៅពេលដង្ហែព្រះករុណាព្រះប្រមុខរដ្ឋទៅដល់ស្រុកថាឡាបរិវ៉ាត់ ខេត្តស្ទឹងត្រែង។កវីដែលធ្លាប់និពន្ធបទចម្រៀងឱ្យតារាចម្រៀងរៃកណ្ដឹងរូបនេះមានដូចជាកវីម៉ា ឡៅពី,កវីគង្គ ប៊ុនឈឿន,កវីវ៉ែន សុន,កវីស្វាយ សំអឿ ជាដើម។ទន្ទឹមនឹងជោគជ័យក្នុងអាជីពជាតារាចម្រៀង អ្នកស្រីសូ សាវឿន ធ្លាប់បានចូលរួមសម្ដែងជាតារាកិត្តិយសក្នុងរឿងស្លៀកខ្យល់ដណ្ដប់មេឃ របស់ផលិតកម្មឃ្លាំងមឿងភាពយន្តដែលដឹកនាំរឿងដោយលោកគង្គ ប៊ុនឈឿន ដាក់បញ្ចាំងនៅឆ្នាំ១៩៧៤ និងរឿងមួយទៀតគឺរឿងមុខមួយភ្នែកបួន របស់ផលិតកម្មឃ្លាំងមឿងភាពយន្តដែលដឹកនាំរឿងដោយលោកគង្គ ប៊ុនឈឿនដដែលតែរឿងនេះមិនទាន់បានបញ្ចាំងនៅឡើយទេ ព្រឹត្តិការណ៍ថ្ងៃទី១៧ មេសា ១៩៧៥ បានចូលមកដល់។ដោយឡែកក្រោយពេលដែលអ្នកស្រីភៀសខ្លួនទៅរស់នៅប្រទេសបារាំង អ្នកស្រីបានចាប់អាជីពជាតារាចម្រៀងឡើងវិញបំពេរអារម្មណ៍អាណិកជនខ្មែរគ្រប់រូបដែលរស់នៅទីនោះគឺនៅឆ្នាំ១៩៧៨ ពីរឆ្នាំក្រោយពេលទៅដល់ទីនោះ។ លុះដល់ឆ្នាំ១៩៨២ ទើបអ្នកស្រីចូលច្រៀងតាមភោជនីយដ្ឋាន និង កម្មវិធីប្រគំតន្រ្តីនានានៅក្នុងទីក្រុងប៉ារីស។ ក្រោយរបបប៉ុលពតដួលរលំ អ្នកស្រីសូ សាវឿនបានមកប្រទេសកម្ពុជាជាលើកដំបូងនៅឆ្នាំ១៩៨៦ នៅឯពហុកីឡាដ្ឋានជាតិអូឡាំពិក។ បទចម្រៀងល្បីៗរបស់អ្នកស្រីសូ សាវឿន មានដូចជាបទ៖

បទចម្រៀងទោល(បទមនោសញ្ចេតនា)

បទកំពង់ហ្លួងដួងចិត្ត (ស្ពានកំពង់ហ្លួង)
បទស្ទឹងសែនប៉ារីស
បទអ្នកបំរើតាមយន្តហោះ
បទវិញ្ញាណផ្នូរខ្ញុំ
បទនេះឬចិត្តប្រុស
បទថ្ពាល់និងច្រមុះ
បទក្លិនស្នេហ៍ (ព្រៃល្បាស់ខៀវខ្ចី)
បទសង្ស័យមិនទាន់មានគូ
បទជ្រោះទារុណកម្ម
បទចំណងដៃទឹកភ្នែក
បទសុវិទ្យា
បទវាលវែងឆ្ងាយ
បទម្ចាស់ចិត្តបរយ៉ាខា
បទអនុស្សាវរីយ៍កំពង់ហ្លួង

បទចម្រៀងទោល(បទប្រជាប្រិយ)

បទឱពពេជចៀប
បទឱផ្កាយលើមេឃ
បទឱដើមគគីរ
បទសារ៉ាវ៉ាន់ស្លៀកខ្យល់
បទលលកវាយំ
បទលលកចុងត្រស់
បទម្លប់ដូង
បទស្នេហាក្នុងពេលរាត្រី
បទធ្វើម្ដេចនឹងបានគូរាំ
បទស្ងោរស៊ុបមាន់ញី
បទគេលេងភ្លេងហើយ
បទឃ្មុំឡើងក្បាលទឹក
បទអូនចូលចិត្តបងញញឹម
បទច្រូចទឹកចោលទៅ
បទបងអើយស្ដាប់ផ្គរ
បទកន្តុបម៉ែមួយ
បទផ្ញើសារតាមសត្វ
បទល្ងាចអូនទៅដល់
បទជូនអូនទៅម៉ែ
បទអូននាំបងរត់
បទមិនគួរឃ្លាតឆ្ងាយពីស្រី
បទចាបពូកចំពុះខៀវ
បទកង្កែបរាំវង់
បទទឹកលិចភូមិអូន
បទភ្លៀង១០០មេ
បទផ្កាក្រវ៉ាន់ព្រៃ
បទអូនយំស្ដាយស្រូវ
បទមាន់ធ្នាក់ទាក់មាន់ព្រៃ
បទដឹកគោទៅចង
បទរាត្រីរាំវង់
បទបងមិនអាណិត
បទរំពេរហើរមក

បទចម្រៀងឆ្លងឆ្លើយ

បទក្រមុំជនបទ ច្រៀងដោយអ្នកស្រី ប៉ែន រ៉ន និង សូ សាវឿន
បទក្អែកបូល ច្រៀងដោយលោក មាស សាម៉ន និង សូ សាវឿន
បទត្រូវនឹងថ្នាំអូនស្រី ច្រៀងដោយលោក មាស សាម៉ន និង សូ សាវឿន
បទអាគកខ្នាយវែង ច្រៀងដោយលោក មាស សាម៉ន និង សូ សាវឿន
បទក្រសារហូតដាវ ច្រៀងដោយលោកមាស សាម៉ន និង សូ សាវឿន
បទកឺការ៉ូប៊ិចជួង ច្រៀងដោយលោក មាស សាម៉ន និង សូ សាវឿន
បទផ្ដាំបងឱ្យរែកទឹក ច្រៀងដោយលោកមាស សាម៉ន និង សូ សាវឿន
បទទឹកដក់បាតព្រែក ច្រៀងដោយលោកមាស សាម៉ន និង សូ សាវឿន
បទជាតិខ្មែរមិនមែនល្ងង់ខ្លៅ ច្រៀងដោយលោកមាស សាម៉ន និង សូ សាវឿន
បទរលឹមតក់ៗ ច្រៀងដោយលោក មាស សាម៉ន និង សូ សាវឿន
បទដេកថ្ងៃសំចៃទុកយប់ ច្រៀងដោយលោក ឡឹក សាវ៉ាត និង សូ សាវឿន
បទផ្កាសារ៉ាយ ច្រៀងដោយលោកជា សាវឿន និង សូ សាវឿន
បទទិញស្រាឱ្យឪ ច្រៀងដោយលោក តូច តេង និង សូ សាវឿន
បទភួងស្នេហ៍កម្រង ច្រៀងដោយលោក តូច តេង និង សូ សាវឿន
បទលាបងចូលម្លប់ ច្រៀងដោយលោក សុះ ម៉ាត់ និង សូ សាវឿន
បទប៉ាឡេឡៃ ច្រៀងដោយលោក ស៊ីន ស៊ីសាមុត និង សូ សាវឿន
បទឱ្យតែបាន ច្រៀងដោយលោក ស៊ីន ស៊ីសាមុត និង សូ សាវឿន
បទបងឯងជាព្រាននារី ច្រៀងដោយលោក ស៊ីន ស៊ីសាមុត អ្នកស្រី រស់ សេរីសុទ្ធា ប៉ែន រ៉ន និង សូ សាវឿន
បទមិនជឿទេចិត្តប្រុសសម័យ ច្រៀងដោយលោក ស៊ីន ស៊ីសាមុត និង សូ សាវឿន
បទកូនអ្នកណា ច្រៀងដោយលោក មាស សាម៉ន និង សូ សាវឿន
បទម៉ែអូននៅផ្ទះ ច្រៀងដោយលោក ថេត សម្បត្តិ និង សូ សាវឿន

ឯកសារយោង

សៀវភៅខ្មែរប្រឈមមុខនឹងវប្បធម៌ វិទ្យាស្ថានរៃយំ
[១]
[២]