ហ្វាតា

ចលនារំដោះជាតិប៉ាឡេស្ទីន حركة التحرير الوطني الفلسطيني
អក្សរកាត់	ហ្វាតា
ប្រធាន	ម៉ះមូដ អាបបាស់
ស្ថាបនិក	យ៉ាស៊ែរ អារ៉ាហ្វាត់ ខាលីដ យ៉ាស៊្រូទី សាឡា ខាឡាហ្វ ខាលីល អាល់វ៉ាហ្សៀរ
អគ្គលេខាធិការ	ជីប៊្រីល រ៉ាជួប
អនុប្រធាន	ម៉ះមូដ អាលូល
បាវចនា	يا جبل ما يهزك ريح ('ឱភ្នំអើយ គ្មានខ្យល់ណាអាចរង្គើអ្នកឡើយ') ثورة حتى النصر ('បដិវត្តន៍ទាល់ជំនះ')
បង្កើត	១៩៥៩ (ជាចលនានយោបាយ) ១៩៦៥ (ជាគណបក្សនយោបាយ)
ទីស្នាក់ការកណ្ដាល	រ៉ាំអាឡា វ៉េសប៊ែង
ស្លាបយុវជន	យុវជនហ្វាតា
សាខាយោធា	អាល់អាស៊ីហ្វា (១៩៦៥–២០០០) កងពលតូចទុក្ករយុទ្ធអាលអាក់សា (២០០០–២០០៧)
មនោគមវិជ្ជា	ជាតិប៉ាឡេស្ទីននិយម ប្រជាធិបតេយ្យសង្គមនិយម លោកិយនិយម សហអារ៉ាប់និយម អភិរក្សនិយម អរិចក្រពត្តិនិយម ដំណោះស្រាយរដ្ឋពីរ អតីត៖ សង្គមនិយមអារ៉ាប់
គោលជំហរនយោបាយ	មជ្ឈិមនិយម ទៅមជ្ឈិមឆ្វេងនិយម
ទំនាក់ទំនងជាតិ	អង្គការរំដោះប៉ាឡេស្ទីន
ទំនាក់ទំនងអន្តរជាតិ	សម្ព័ន្ធវឌ្ឍនភាព អង្គការសង្គមនិយមអន្តរជាតិ
ទំនាក់ទំនងអឺរ៉ុប	គណបក្សនៃអ្នកសង្គមនិយមអឺរ៉ុប (សង្កេតការណ៍)
ពណ៌ផ្លូវការ	លឿង
ក្រុមប្រឹក្សានីតិបញ្ញត្តិប៉ាឡេស្ទីន	៤៥ / ១៣២
គេហទំព័រ
fatehmedia.ps
ទង់
នយោបាយនៅប៉ាឡេស្ទីន គណបក្សនយោបាយ ការបោះឆ្នោត

ចលនាហ្វាតា (ភាសាអារ៉ាប់៖ فتح) ដោយមានឈ្មោះផ្លូវការថា ចលនារំដោះជាតិប៉ាឡេស្ទីន (حركة التحرير الوطني الفلسطيني) គឺជាគណបក្សនយោបាយសង្គមប្រជាធិបតេយ្យ និងជាតិនិយមប៉ាឡេស្ទីនមួយ។ គណបក្សគឺជាក្រុមធំបំផុតនៅក្នុងអង្គការរំដោះប៉ាឡេស្ទីន (អ.រ.ប.) និងជាគណបក្សធំបំផុតទីពីរនៅក្នុងក្រុមប្រឹក្សានីតិបញ្ញត្តិប៉ាឡេស្ទីន (ក.ន.ប.)។ លោកម៉ះមូដ អាបបាស់ ដែលជាប្រធានអាជ្ញាធរប៉ាឡេស្ទីន គឺជាប្រធាននៃចលនាហ្វាតានេះ។

ក្រុមហ្វាតាធ្លាប់ប្រឡូកចូលពាក់ព័ន្ធក្នុងចលនាតស៊ូប្រដាប់អាវុធប្រឆាំងនឹងរដ្ឋអ៊ីស្រាអែល (ក៏ដូចជាប្រទេសហ្សកដានីក្នុងកំឡុងជម្លោះខែកញ្ញាងងឹតនៅរវាងឆ្នាំ១៩៧០–១៩៧១) និងធ្លាប់បញ្ជាក្រុមសកម្មប្រយុទ្ធជាច្រើនក្រុម ក្នុងយុទ្ធនាការវាយប្រហារប្រឆាំងគោលដៅយោធា ក៏ដូចជាជនស៊ីវិលអ៊ីស្រាអែល ជាពិសេសគឺព្រឹត្តិការណ៍សម្លាប់រង្គាលលើដងផ្លូវជាប់ឆ្នេរសមុទ្រនៃឆ្នាំ១៩៧៨។ ក្រុមមួយនេះបានសម្រេចដកខ្លួនចេញពីជម្លោះប្រដាប់អាវុធប្រឆាំងនឹងអ៊ីស្រាអែលក្រោយបានចុះហត្ថលេខាលើកិច្ចព្រមព្រៀងទីក្រុងអូស្លូ (១៩៩៣–១៩៩៥) និងជាពេលដែលសាមីខ្លួនបានទទួលស្គាល់ប្រទេសអ៊ីស្រាអែលជាថ្នូរនឹងការរក្សាសិទ្ធិអំណាចគ្រប់គ្រងលើទឹកដីប៉ាឡេស្ទីនមួយចំនួនដែលស្ថិតក្រោមការកាន់កាប់អ៊ីស្រាអែល។ ក្នុងកំឡុងចលនាអ៊ីនធីហ្វាដាលើកទីពីរ (២០០០–២០០៥) ក្រុមហ្វាតាបានបង្កើនសកម្មភាពប្រដាប់អាវុធប្រឆាំងនឹងអ៊ីស្រាអែល ដោយអះអាងទទួលខុសត្រូវចំពោះការវាយប្រហារអត្តឃាតមួយចំនួន។ ក្រុមហ្វាតាមានអត្តសញ្ញាណស្និទ្ធនឹងមេដឹកនាំស្ថាបនិករបស់ខ្លួន គឺលោកយ៉ាសែរ អារ៉ាហ្វាត់ ដែលលោកបានបម្រើការជាប្រធានចលនាហ្វាតាចាប់ពីថ្ងៃដែលក្រុមនេះបានកកើតឡើងមករហូតដល់ថ្ងៃមរណៈរបស់លោកនៅក្នុងឆ្នាំ២០០៤។ លោកហ្វារូគ អាល់កាដឌូមីបានឡើងកាន់តំណែងជាប្រធាននៃចលនាហ្វាតាបន្តពីលោកអារ៉ាហ្វាត់រហូតដល់ឆ្នាំ២០០៩ មុនពេលលោកអាបបាស់ត្រូវបានគេបោះឆ្នោតជ្រើសរើសជាប្រធានថ្មី។ ចាប់តាំងពីមរណភាពរបស់លោកអារ៉ាហ្វាត់មក គេបានសង្កេតឃើញកាន់តែច្បាស់អំពីវត្តមាននៃក្រុមបក្សសម្ព័ន្ធនីមួយៗខុសៗគ្នារួមជាមួយនឹងមនោគមវិជ្ជាផ្សេងៗគ្នាផងដែរនៅក្នុងក្រុមហ្វាតានេះ។

នៅក្នុងការបោះឆ្នោត ក.ន.ប. ឆ្នាំ ២០០៦ ហ្វាតាបានរងបរាជ័យដោយបាត់បង់សំឡេងភាគច្រើនរបស់ខ្លួនទៅក្រុមហាម៉ាស់។ ជ័យជម្នះរបស់ហាម៉ាស់នៅក្នុង ក.ន.ប. បាននាំឱ្យផ្ទុះជម្លោះរវាងក្រុមហ្វាតា និងក្រុមហាម៉ាស់ឡើង ហើយជាលទ្ធផល តំបន់ហ្កាហ្សាបានធ្លាក់ទៅក្រោមការត្រួតត្រាទាំងស្រុងរបស់ហាម៉ាស់ ខណៈក្រុមហ្វាតាបានរក្សាអំណាចគ្រប់គ្រងក្នុងនាមជាអាជ្ញាធរជាតិប៉ាឡេស្ទីននៅតំបន់វ៉េសប៊ែង។ ក្រុមហ្វាតាសិទ្ធិគ្រប់គ្រងក្នុងជំរុំជនភៀសខ្លួនប៉ាឡេស្ទីនដែរ។

តំណភ្ជាប់ក្រៅ

• ទំព័រគំរូ:គេហទំព័រផ្លូវការ
• អតីតគេហទំព័រហ្វាតា (ផ្ទុកជាឯកសារដ្ឋាន)
• ធម្មនុញ្ញហ្វាតា