អង្គរ

អង្គរ (អង់គ្លេស : Angkor) ឬត្រូវបានគេស្គាល់ផងដែរថាជា យសោធរបុរៈទី ០៣ (អង់គ្លេស : Yasodharapura, សំស្ក្រឹត : यशोधरपुर) គឺជារាជធានីរបស់អាណាចក្រខ្មែរដែលសព្វថ្ងៃមានទីតាំងស្ថិតនៅក្នុងខេត្តសៀមរាប ព្រះរាជាណាចក្រកម្ពុជា។អាណាចក្រខ្មែររីកចម្រើនរុងរឿងដល់កំពូលចាប់ពីសតវត្សរ៍ទី ០៩ រហូតដល់សតវត្សរ៍ទី ១៥។នៅក្នុងតំបន់អង្គរមានសំណង់ស្ថាបត្យកម្មជាច្រើនរួមមានប្រាសាទបុរាណ បណ្ណាល័យ គូទឹក និង សំណង់ស្ថាបត្យកម្មដទៃទៀត។សំណង់ស្ថាបត្យកម្មទាំងនោះខ្លះត្រូវបានប្រើប្រាស់ដោយមន្ត្រីរាជការហើយខ្លះទៀតគឺជាព្រះបរមរាជវាំងដ៏ស្កឹមស្កៃដែលជាទីគង់ប្រថាប់របស់ព្រះមហាក្សត្រខ្មែរ។ចំពោះសំណង់ស្ថាបត្យកម្មទាំងឡាយណាដែលកសាងឡើងនៅខាងក្រៅបរិវេណប្រាសាទគឺមិនបានកសាងឡើងពីថ្មនោះទេ។ទីតាំងមួយនៅក្នុងចំណោមទីតាំងដែលមានភ្ញៀវទេសចរទៅទស្សនាច្រើនជាងគេបំផុតនៅក្នុងតំបន់អង្គរគឺប្រាសាទអង្គរវត្តដែលជាសំណង់វិមានសាសនាដ៏ធំបំផុតនៅលើពិភពលោកនិងជាតំបន់ទាក់ទាញទេសចរណ៍ដ៏ល្បីល្បាញបំផុតរបស់ប្រទេសកម្ពុជា។