អំពីបាលីស្នេហ៍
តាមការសង្កេត បុព្វបុរសខ្មែរយើងប្រើបាលីស្នេហ៍នេះក្នុងគោលបំណងផ្សេង ៗ ពីគ្នា ។ ដូច្នេះហើយបានជាយើងកត់សម្គាល់ឃើញថា នៅក្នុងក្បួនខ្មែរបុរាណមានស្នេហ៍បីប្រភេទ ដែលយកមកប្រើក្នុងទិសដៅបីយ៉ាងដែរ :
ស្នេហ៍មុខ[កែប្រែ]
មុននឹងចូលទៅកាន់កន្លែងធ្វើការរបស់មនន្ត្រីធំណាមួយ ឬក៏ទៅកាន់លំនៅឋានរបស់វរជន ដោយមានបំណងសុំពឹងពាក់ ឬសុំក្ដីអនុគ្រោះបែបណាមួយនោះ បុព្វបុរសយើងតែងតែប្រើដន្លាប់មន្តអាគមសែកសូត្របាលីស្នេហ៍មុខ ផ្លុំទៅលើក្រមួនមាត់ដែលដាក់ក្នុងដន្លាប់ រួចយកមកលាបសក់ ចិញ្ចើម ថ្ងាស ។ល។ ព្រមជាមួយនេះដែរ ដូនតាយើង លោករៀបឫកពារ សុភាពរាបសារ ឱនលំទោនទាំងកាយទាំងវាចា សម្ដែងនូវការគោរពប្រណិប័តន៍ ចំពោះវរជនដែលជាមេបា ចៅហ្វាយនាយ ។ ខាងក្រោមនេះ គឺបាលីស្នេហ៍មុខរបស់លោកគ្រូ សុខ សែម ដែលមានការខុសប្លែកខ្លះៗ អំពីបាលីស្នេហ៍មុខរបស់លោក កិម ផង់ ។ ជួនកាលលោកប្រើបាលីស្នេហ៍មុខនេះ ដើម្បីកម្រើកទឹកចិត្តឲ្យក្លាហាន មិនឲ្យចាញ់ច្រាបគេ ឲ្យមានសិរីសួស្ដី និងមានអំណោយទាន មានគេអាណិត និងឲ្យមានតេជះក្នុងការចូលទៅកាន់ជំនុំចំណោមប្រជុំមនុស្សធំតូច ។ ត្រូវសែកបាលីនេះ និងក្រមួនមាត់ ឬប្រេងដូងអប់ លម្អងផ្កាក្រអូបថា : “ ឧមសេពមហាសេព ទើបគ្រូប្រើអញសែកប្រេងក្រមួន លាយលាបធ្វើខ្លួនអញអើយ ល្អបីដូចមាស ថ្ងាសអញអើយ ល្អបីដូចប្រាក់ ព្រះភក្ត្រអញអើយ ល្អបីដូចខែពេញបូណ៌ សម្បុរអញអើយ ល្អបីដូចឃ្មុំពេញឆោម ម្រោមពេញទឹកបងប្អូននឹករលឹកមកគ្រប់ៗគ្នា " ។
*បាលីស្នេហ៍មុខទី ២ ហៅថា បាលីស្នេហ៍សារិកា
“ឱមសារិការអើយ អញទៅត្រង់ណាមិនដែលទំនេរ ពាក្យអញសសិត មាត់អញស្រដី លួងលោមប្រុសស្រី ឲ្យចូលចិត្តនឹងអញ " ។
*បាលីស្នេហ៍មុខទី ៣ ហៅថា បាលីស្នេហ៍ក្រពុំរីករាយ
“ឱមរីក ឱមរាយ រីកដូចព្រះពាយ រាយព្រះអាទិត្យ"
បាលីស្នេហ៍ទាំងប៉ុន្មានមេនេះ ត្រូវសូត្រសេព ៣ចប់ ឬ ៧ ចប់ ។
បាលីស្នេហ៍ដាក់ខ្មោច[កែប្រែ]
នៅឯកសារមុន ខ្ញុំបានជម្រាបអំពីបាលីដាក់ខ្មោចឲ្យទន់ចិត្ត អាណិតដល់គ្រូ ព្រមទាំងបើកដៃឲ្យគ្រូហ្មព្យាបាលសិស្សគណរបស់ខ្លួន ដោយមិនជំទាស់រករឿងរកហេតុអ្វីឡើយ ។ តាមធម្មតាគេតែងតែប្រើបាលីស្នេហ៍មុខ ឬបាលីស្នេហ៍ដាក់មនុស្ស សម្រាប់ដាក់បន្ទាន់ចិត្តខ្មោចជួរជំបួរព្រាយព្រ័ក្សល្បាក់សាផងដែរ ។
អំពីអ្នកនិពន្ធ[កែប្រែ]
ឯកសារនេះជាស្នាដៃស្រាវជ្រាវរបស់លោក មៀច ប៉ុណ្ណ ។