ប្រទេសព្រុយណេ
អំណោយដឹកពីភ្នំពេញមកចែក ជូនដល់ពលរដ្ឋអ្នកខេត្តមណ្ឌលគិរីនេះ មានគ្រឿងឧបភោគ បរិភោគផ្សេងៗដូចជា អង្ករ៥តោន ទឹកត្រី២០០យួរ ទឹកស៊ីអ៊ីវ២០០យួរ ដោយអំណោយទាំងនោះត្រូវបានធ្វើការប្រគល់ជូនដល់ដៃប្រជាជនក្រីក្រ ២០០គ្រួសារផ្ទាល់តែម្តង។ លោក រ៉ាមី សារ៉ាហ្វ អគ្គនាយកក្រុមហ៊ុន RMA គ្រុប បានឲ្យដឹងថា អស់រយៈពេល៦ឆ្នាំហើយ ដែលក្រុមហ៊ុនហ្វដ បានរៀបចំកម្មវិធីបែបនេះ ហើយសកម្មភាពនេះស្ទើរតែក្លាយជាប្រពៃណីមិនអាចកាត់ផ្តាច់បាន ដែលក្រុមហ៊ុនរថយន្តហ្វដ តែងពាំនាំយកនូវអំណោយចែកជូនដល់ពលរដ្ឋខ្មែរមួយចំនួនដែលមានជីវភាពខ្វះខាតនោះ ដែលនេះជាការចូលរួមចំណែកមួយនៅក្នុងសង្គមជាតិ។
ជាក្រុមហ៊ុនតែមួយគត់ដែលរៀបចំកម្មវិធីបែបនេះ លោកបានមានប្រសាសន៍ថា៖ «វាស្ទើរក្លាយជាវប្បធម៌មួយទៅហើយដែលក្រុមហ៊ុនហ្វដរៀបចំកម្មវិធីបែបនេះ និយាយរួមគឺ ហ្វដ មិនត្រឹមតែធ្វើជំនួញនៅក្នុងប្រទេសកម្ពុជាប៉ុណ្ណោះទេ តែក្រុមហ៊ុនយើងក៏ចូលរួមនៅក្នុងកិច្ចការសង្គមយ៉ាងច្រើនផុសផុល ផងដែរ ហើយនេះជាគំរូមួយដល់ក្រុមហ៊ុននានាទៀតផង»។
នៅក្នុង ពិធីផ្តល់អំណោយសប្បុរសធម៌របស់ក្រុមហ៊ុនរថយន្ត ហ្វដ ដល់ពលរដ្ឋក្រីក្រចំនួន២០០គ្រួសារ ហើយភាគច្រើនជាជនជាតិភាគតិចនោះ លោក យីម លុច្ស អភិបាលរងខេត្តមណ្ឌលគិរី បានឲ្យដឹងថា ទោះបីជាខេត្តមណ្ឌលគិរីនៅពេលនេះ មានការអភិវឌ្ឍជាងមុន ក៏ប៉ុន្តែកត្តាជីវភាពប្រជាជននៅក្នុងខេត្តមួយនេះនៅមានកម្រិត នៅឡើយ ព្រោះតែប្រជាជនប្រមាណ៩០ភាគរយជាជនជាតិភាគតិច ដែលពួកគាត់កំពុងតែមានការវិវឌ្ឍខ្លួនពីការរស់នៅបែបប្រពៃណីជន ជាតិភាគតិចមករស់នៅបែបបងប្អូនខ្មែរកណ្តាលវិញនោះ។
លោក អភិបាលខេត្តរង បានមានប្រសាសន៍ថា៖ «នៅរយៈពេលប៉ុន្មានឆ្នាំចុងក្រោយនេះ យើងសង្កេតឃើញថា ខេត្តមណ្ឌលគិរី មានការអភិវឌ្ឍលឿនជាងមុន ក្រោយពេលដែលបណ្តាញហេដ្ឋារចនាសម្ព័ន្ធរបស់យើងត្រូវបានតភ្ជាប់។ ទោះជាយ៉ាងណា កម្រិតជីវភាពប្រជាជននៅមណ្ឌលគិរីនេះ នៅមានកម្រិតនៅឡើយ តែយើងក៏បានជំរុញឲ្យពួកគាត់ពង្រីកការបង្កបង្កើនផលផងដែរ ព្រោះខេត្តយើងជាខេត្តសក្តានុពលខ្លាំងលើវិស័យកសិកម្ម»។
លោក បានបញ្ជាក់ថា៖ «ពលរដ្ឋមណ្ឌលគិរីប្រមាណ៩០ភាគរយជាជនជាតិភាគតិច ពិសេសជនជាតិព្នងតែម្តង តែឥឡូវនេះពួកគាត់បានធ្វើការផ្លាស់ប្តូរការរស់នៅយ៉ាងខ្លាំង និងមានការរីកចម្រើនជាងមុន»។
ជាមួយនឹងកន្ទុយបារីធំមួយបឺត បង្ហុយផ្សែងបណ្តើរកាន់អំណោយបណ្តើរអ្នកស្រី ក្វាង ក្រាញ់ ដែលជនជាតិភាគតិចព្នង បានឲ្យដឹងថា សព្វថ្ងៃពួកគាត់ធ្វើស្រែចម្ការបណ្តើរ ឆ្លៀតពេលស៊ីឈ្នួលក្រុមហ៊ុនអភិវឌ្ឍន៍បណ្តើរ ហើយមិនសូវបានចូលព្រៃរកជ័រទឹក ឬក៏បរបាញ់សត្វដូចមុនទេ។ ស្ត្រីជនជាតិព្នងនេះបានទទួលស្គាល់ថា ជីវភាពរបស់ពួកគាត់ឥឡូវមានការប្រែប្រួលរីកចម្រើនជាងមុន។
ជាមួយ កាយវិការនៅអឹមអៀនអ្នកស្រីនិយាយថា៖«ពីមុនពួកខ្ញុំហ្នឹងច្រើន ចូលព្រៃរកជ័រទឹក ឬក៏រកបាញ់សត្វអីហ្នឹងយកមកលក់ តែពេលនេះមិនសូវបានទៅទេ ព្រោះយើងជាប់ស៊ីឈ្នួលក្រុមហ៊ុន គេឲ្យធ្វើអីក៏ធ្វើទៅឲ្យតែបានលុយ។ ខ្ញុំគិតថា គ្រួសារខ្ញុំគ្រាន់បើជាងមុន ហើយកូនខ្ញុំពីរនាក់ក៏បានចូលរៀននឹងគេដែរ»។
នៅពេលមានឈ្មោះ ទទួលអំណោយរបស់ក្រុមហ៊ុនរថយន្តអ្នកស្រីនិយាយថា៖ «ខ្ញុំអរណាស់ ខ្ញុំបានធូរច្រើនហើយ ព្រោះពេលបានអំណោយអ៊ីចឹង ពិតជាបានជួយជីវភាពគ្រួសារខ្ញុំច្រើន ព្រោះឥឡូវហ្នឹងគ្រួសារខ្ញុំក៏យ៉ាប់ រស់នៅទាំងត្រដរដែរ។ ពួកខ្ញុំអរគុណណាស់ អរគុណមែនទែន»។
គួរបញ្ជាក់ថា ដំណើរកម្សាន្តបោះជំរំ Adventure របស់អតិថិជន FORD បង្កើតឡើងដោយក្រុមហ៊ុន RMA ខេមបូឌា ចាប់ពីឆ្នាំ ២០០៧ ធ្វើដំណើរឆ្ពោះទៅខេត្តមណ្ឌលគិរី ឆ្នាំ ២០០៨ ទៅខេត្តរតនគិរី ឆ្នាំ២០០៩ ទៅខេត្តប៉ៃលិន ឆ្នាំ២០១០ និង២០១១ ទទួលជោគជ័យដ៏អស្ចារ្យគួរជាទីមោទនៈតាមរយៈការធ្វើដំណើរកម្សាន្ត Adventure ឆ្លងប្រទេសដ៏អស្ចារ្យពីព្រះរាជាណាចក្រកម្ពុជាឆ្ពោះទៅកាន់ទឹកដី ខេត្តចម្ប៉ាសាក់ ប្រទេសឡាវ ហើយសម្រាប់ឆ្នាំ២០១២ដែលជាឆ្នាំទី៦នេះ បានឆ្ពោះទៅកាន់ខេត្ត មណ្ឌលគិរីជាថ្មីម្តងទៀត៕