បារីសង់

បារីសង់របស់ត្រីកោណ

ក្នុងធរណីមាត្រ បារីសង់នៃវត្ថុ$X$ ក្នុងលំហដែលមានវិមាត្រ$n$ គឺជាចំនុចប្រសព្វនៃគ្រប់ប្លង់ដែលបែងចែកវត្ថុ$X$ ជាពីរផ្នែកដែលមានម៉ូម៉ង់ស្មើគ្នាចំពោះប្លង់។ ជាធម្មតា វាត្រូវបានគេហៅថា មធ្យមនៃគ្រប់ចំនុចនៃ$X$ ។

បារីសង់នៃសំនុំចំនុចអាចត្រូវគេគណនា តាមមធ្យមនព្វន្ឋនៃកូអរដោនេរបស់ចំនុច។

បារីសង់របស់ត្រីកោណ និង តេត្រាអែត

បារីសង់របស់ត្រីកោណមួយ គឺជាចំនុចប្រសព្វនៃមេដ្យានទាំង៣របស់ត្រីកោណនោះ។

បារីសង់ចែកមេដ្យាននីមួយៗតាមផលធៀប 2:1​ មានន័យថាវាស្ថិតនៅ ${\frac {1}{3}}\,$នៃកំពស់រវាងជ្រុងនីមួយៗ និង ចំនុចឈម (ដូចបង្ហាញក្នុងរូប)។

បើត្រីកោណបង្កើតឡើងដោយរបាយស្មើសាច់ នោះបារីសង់ជាទីប្រជុំទំងន់នៃត្រីកោណ។ កូអរដោនេដេកាតរបស់វា គឺជាមធ្យមនៃកូអរដោនេរបស់កំពូលទាំង៣ ។ ដូចនេះ បើកំពូលទាំង៣មានកូអរដោនេ$(x_{a},y_{a})$ $(x_{b},y_{b})$ និង $(x_{c},y_{c})$ នោះបារីសង់មានកូអរដោនេ :${\Big (}{\begin{matrix}{\frac {1}{3}}\end{matrix}}(x_{a}+x_{b}+x_{c}),\;{\begin{matrix}{\frac {1}{3}}\end{matrix}}(y_{a}+y_{b}+y_{c}){\Big )}={\begin{matrix}{\frac {1}{3}}\end{matrix}}(x_{a},y_{a})+{\begin{matrix}{\frac {1}{3}}\end{matrix}}(x_{b},y_{b})+{\begin{matrix}{\frac {1}{3}}\end{matrix}}(x_{c},y_{c})$

បារីសង់របស់តេត្រាអែត គឺជាប្រសព្វនៃគ្រប់អង្កត់បន្ទាត់ដែលភ្ជាប់កំពូលនីមួយៗ ទៅនឹងបារីសង់របស់មុខឈម។ អង្កត់បន្ទាត់ទាំងនេះចែកបារីសង់តាមផលធៀប 3:1 ។

បង្ហាញថាបារីសង់នៃត្រីកោណមួយចែកមេដ្យាននីមួយៗតាមផលធៀប 2:1​

តាងមេដ្យាន AD BE និង CF នៃត្រីកោណABC ប្រសព្វគ្នាត្រង់ G ដែលជាបារីសង់នៃត្រីកោណ ហើយតាងបន្ទាត់ត្រង់ AD មានពន្លាតដល់ចំនុច O ដែល

$AG=GO\,$ ។

នោះ ត្រីកោណ AGE និង AOC ជាត្រីកោណដូចគ្នា (AO ស្មើ២ដង AG ហើយ AC​ ស្មើ២ដង AE) ដូចនេះ OC ស្របនឹង GE ។ ដោយ GE ជាពន្លាតនៃ BG ដូចនេះ OC ស្របនឹង BG ។ សំរាយដូចគ្នា គេបាន OB ស្របនឹង CG ។

GBOC ជាប្រលេឡូក្រាម ។ អង្កត់ទ្រូងរបស់ប្រលេឡូក្រាមប្រសព្វគ្នាត្រង់ចំនុច D ។ គេបាន GD = DO

$GO=GD+DO=2GD\,$

ដូចនេះ $AG=GO=2GD\,$

ឬ $AG:GD=2:1\,$

ទាំងនេះពិតចំពោះគ្រប់មេដ្យាន។

បារីសង់របស់ពហុកោណ

បារីសង់នៃពហុកោណបិទជិតដែលកំនត់ដោយ N កំពូល ( x_i , y_i ) អាចត្រូវបានគេគណនាដូចខាងក្រោម ។ កំពូល ( x_N , y_N ) ដូចនឹង ( x₀ , y₀ ) ។

ផ្ទៃរបស់គឺ

$A={\frac {1}{2}}\sum _{i=0}^{N-1}(x_{i}\ y_{i+1}-x_{i+1}\ y_{i})$

នោះ បារីសង់របស់ពហុកោណគឺ

$C_{x}={\frac {1}{6A}}\sum _{i=0}^{N-1}(x_{i}+x_{i+1})(x_{i}\ y_{i+1}-x_{i+1}\ y_{i})$

$C_{y}={\frac {1}{6A}}\sum _{i=0}^{N-1}(y_{i}+y_{i+1})(x_{i}\ y_{i+1}-x_{i+1}\ y_{i})$

បារីសង់នៃសំនុំចំនុច

គេអោយ សំនុំចំនុច $x_{1},x_{2},\ldots ,x_{k}$ in $\mathbb {R} ^{n}$ ។ បារីសង់$C$របស់វា គឺកំនត់ដោយ

$C={\frac {x_{1}+x_{2}+\cdots +x_{k}}{k}}$ ។

បារីសង់នៃផ្ទៃ

បារីសង់នៃផ្ទៃ គឺស្រដៀងនឹងទីប្រជុំនៃមាសនៃអង្គធាតុ។ បើអង្គធាតុជាអូម៉ូសែន ទីប្រជុំទំងន់នៃម៉ាសគឺជាបារីសង់។

ចំពោះរូបធាតុ២ គេបានសមីការ

${\overline {y}}={\dfrac {{\overline {y_{1}}}A_{1}+{\overline {y_{2}}}A_{2}}{A_{1}+A_{2}}}$

${\overline {y}}$ ជាចំងាយពីអ័ក្សកូអរដោនេទៅបារីសង់នៃផ្ទៃអង្គធាតុ។ $A$ ជាផ្ទៃនៃផ្នែករបស់អង្គធាតុ។ អនុគមន៍ទូទៅសំរាប់គណនាបារីសង់

${\overline {x}}={\frac {\sum {\overline {x_{i}}}A_{i}}{\sum A_{i}}}$

${\overline {y}}={\frac {\sum {\overline {y_{i}}}A_{i}}{\sum A_{i}}}$

ចំងាយពីអ័ក្ស (y'oy) ទៅបារីសង់ គឺ ${\overline {x}}$ ។ ចំងាយពីអ័ក្ស (x'ox) ទៅបារីសង់ គឺ ${\overline {y}}$ ។ កូអរដោនេរបស់បារីសង់ $({\overline {x}},{\overline {y}})$ ។

រូបមន្តអាំងតេក្រាល

អាប់ស៊ីសរបស់បារីសង់នៃប្លង់អោយដោយអាំងតេក្រាល

$C_{x}={\frac {\int xf(x)\;dx}{\int f(x)\;dx}}$

បារីសង់របស់កោន និង ពីរ៉ាមីត

បារីសង់របស់កោន ឬ ពីរ៉ាមីតគឺស្ថិតនៅលើអង្កត់បន្ទាត់ដែលភ្ជាប់កំពូលទៅនឹងបាតនៃបារីសង់​ ហើយចែកអង្កត់នោះជាប្រភាគ ៣:១ ។