ស្ពានអាកាសស្ទឹងមានជ័យ
ស្ពានអាកាសស្ទឹងមានជ័យបានចាប់ផ្ដើមកសាងពីថ្ងៃទី២៦ ខែវិច្ឆិកា ឆ្នាំ២០១២ និងត្រូវបានប្រារព្ធពិធីសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី៣១ ខែកក្កដា ឆ្នាំ២០១៤ ។ ស្ពានអាកាសស្ទឹងមានជ័យ បានសាងសង់ដោយក្រុមហ៊ុន អូស៊ីអាយស៊ី (OCIC) ដែលចំណាយទឹកប្រាក់អស់ក្នុងតម្លៃ ១៨.៩៧៦.៦៧៨ ដុល្លារ[១]។ ស្ពានអាកាសស្ទឹងមានជ័យជាព្រំប្រទល់ខណ្ឌទួលគោក ខណ្ឌចំការមន និងខណ្ឌមានជ័យ។ វាជាស្ពានអាកាសទី៣ បន្ទាប់ពីស្ពានអាកាសក្បាល ថ្នល់ និងស្ពានអាកាស ៧មករា ( ស្តុបពេទ្យលោកសង្ឃ ) ក្នុងរាជធានីភ្នំពេញ។
ស្ពានអាកាសស្ទឹងមានជ័យនេះ ត្រូវបានសាងសង់តាមប្លង់មេ តាមលក្ខណៈបច្ចេកទេសដូចខាងក្រោម៖
- សាងសង់ស្ពានអាកាសធំ ពីបេតុងអារមេស្របពីលើផ្លូវលេខ ២៧១ ត្រង់ចំណុចភ្លើងស្តុបមានទទឹង ១៤,៨០ម៉ែត្រ សម្រាប់ចរាចរទ្វេរទិស ដោយមាន ២ខ្សែទៅ និង២ខ្សែមក។
- សាងសង់ស្ពានអាកាសតូចពីរឯកទិស ពីបេតុងអារមេមាន ទទឹង៦,៥០ម៉ែត្រ និងសាងសង់ស្ពានបេតុងមួយទៀតជំនួសស្ពានបាឡេដែលមានទទឹង ៨ម៉ែត្រ។
- អ៊ុតកៅស៊ូអមសង្ខាងស្ពានទទឹងពី ៥,៥០ម៉ែត្រ ទៅ៧ម៉ែត្រ និងចិញ្ចើម ៣ម៉ែត្រ។
- កំពស់សុវត្ថិភាពក្រោមស្ពាន ៥,២០ម៉ែត្រ។
- ក្រៅពីនេះ ការស្ថាបនាលូ ច្រាំងបេតុងប្រឡាយជើងទេរ សួនច្បារ ខឿនបែងចែកទ្រូងស្ពាន ដំឡើងបង្គោលភ្លើង លាបគំនូសចរាចរ ដាក់ស្លាកចរាចរ ជាដើម។
ប្រតិបត្តិការស្ថាបនាស្ពានអាកាសស្ទឹងមានជ័យ បានបែងចែកជា ២ដំណាក់កាល រួមមាន៖
- ដំណាក់កាលទី១៖ សាងសង់ស្ពានអាកាសមេ ២ ស្ពានរូងក្រោមដី ១ ដោយប្រើរយៈពេលសាងសង់ ចំនួន ១៨ខែ និងត្រូវចំណាយថវិកាអស់ប្រមាណជាង ១២ លានដុល្លារ។
- ដំណាក់កាលទី២៖ សាងសង់ស្ពានបែងខ្នែងចំនួន ១ និងស្ពានឆ្លងកាត់ប្រឡាយចំនួន ២ ដោយប្រើរយៈពេលសាងសង់ចំនួន ៨ខែ និងចំណាយអស់ថវិកាប្រមាណជិត ៥ លានដុល្លារ។
ឯកសារយោង
[កែប្រែ]- ↑ "ច្បាប់ចម្លងប័ណ្ណសារ". Archived from the original on 2021-04-05. Retrieved 2014-07-31.