អង្គការទិន្នន័យអំពីការអភិវឌ្ឍ
អង្គការទិន្នន័យអំពីការអភិវឌ្ឍ ត្រូវបានបង្កើតឡើងនៅថ្ងៃទី១៦ ខែសីហា ឆ្នាំ២០១១ (អង់គ្លេស៖ Open Development Cambodia ហៅកាត់ ODC) ជាអង្គការក្រៅរដ្ឋាភិបាល មិនរកប្រាក់កម្រៃមួយដែលមានមូលដ្ឋាននៅក្នុងទីក្រុងភ្នំពេញ ប្រទេសកម្ពុជា។ អង្គការនេះធ្វើការចែកចាយទិន្នន័យទាំងឡាយដោយបើកទូលាយ (Open Source) និងសាធារណៈស្ដីអំពីការអភិវឌ្ឍនានានៅក្នុងប្រទេសកម្ពុជាមានដូចជា៖ កសិកម្ម និងការនេសាទ, ការអភិវឌ្ឍ និងជំនួយ, ថាមពល, បរិស្ថាន និងការគ្រប់គ្រងធនធានធម្មជាតិ, ឧស្សាហកម្មនិស្សារណកម្ម, រដ្ឋាភិបាល និងអភិបាលកិច្ច, ឧស្សាហកម្ម, ហេដ្ឋារចនាសម្ព័ន្ធ, ពលកម្ម, ដី និងធនធានធម្មជាតិ, ច្បាប់ និងប្រព័ន្ធតុលាការ, ប្រជាជន និងជំរឿន, ការអភិវឌ្ឍសង្គម, ពាណិជ្ជកម្ម និងការវិនិយោគ, និងការអភិវឌ្ឍទីក្រុង។ ទិន្នន័យនៃប្រធានបទទាំងនេះ ត្រូវបានផ្ដល់ជារូបផែនទី។[១]
ការកកើត[កែប្រែ]
អង្គការទិន្នន័យអំពីការអភិវឌ្ឍ (ODC) ត្រូវបានផ្តួចផ្តើមឡើងដោយ អង្គការ EWMI ដោយមានការពិគ្រោះយោបល់ជាមួយអង្គការដៃគូអន្តរជាតិ និងអង្គការមិនមែនរដ្ឋាភិបាលក្នុងស្រុកនានា។ គម្រោងនេះ ត្រូវបានអនុវត្តដោយបុគ្គលិកកម្ពុជា ជាក្រុមយុវជនដែលមានភាពស្វាហាប់ និងបណ្តាញដៃគូនានា ដែលកំពុងផ្តល់ព័ត៌មានប្រកបដោយកិច្ចសហការចែករំលែក និងជម្រុញឲ្យមានការចូលរួមពាក់ព័ន្ធពីនិស្សិតបញ្ញាវ័ន្ត និងមនុស្សដទៃទៀត ក្នុងការរួមចំណែកផ្តល់ជាវិភាគទានដល់គេហទំព័រ ហើយក៏បានកំពុងបង្កើនជំនាញរបស់ពួកគេ តាមរយៈការផ្តល់ឱកាសដល់អ្នកស្ម័គ្រចិត្ត។[២]
ទិន្នន័យ និង ព័ត៌មាន[កែប្រែ]
ទិន្នន័យទាំងអស់ដែលបានផ្សព្វផ្សាយនៅលើគេហទំព័រ ODC គឺជាទិន្នន័យដែលមានជាសាធារណៈ និងត្រូវបានប្រមូលពីប្រភពផ្សេងៗ។ គោលការណ៍របស់ ODC គឺធានាថា ទិន្នន័យទាំងអស់ដែលបានចែករំលែកនៅលើគេហទំព័រ ត្រូវមានប្រភពច្បាស់លាស់។ ទោះជាយ៉ាងណាក្តី ODC មិនអាចធានាបាននូវភាពត្រឹមត្រូវនៃទិន្នន័យទាំងអស់បានទេ ដោយសារតែជាធម្មតាត្រូវពឹងផ្អែកទៅលើប្រភពរបស់វា។ រាល់ឯកសារទាំងឡាយណា ដែលមានការរក្សាសិទ្ធិ ការដកស្រង់ និង/ឬបង្ហាញ គឺផ្អែកតាមបទដ្ឋាននៃ "ការប្រើប្រាស់ដោយត្រឹមត្រូវ" ដែលត្រូវបានទទួលស្គាល់ជាអន្តរជាតិ។[២]
អាជ្ញាបណ្ណ[កែប្រែ]
រាល់ព័ត៌មានដែលមាននៅក្នុង ODC ត្រូវបានផ្ដល់ក្រោមអាជ្ញាបណ្ណ Creative Common License ដូច្នេះអ្នកប្រើព័ត៌មាន ឬទិន្នន័យទាំងនេះត្រូវតែប្រើឲ្យបានស្របទៅនឹងអាជ្ញាបណ្ណដើម។
ឯកសារយោង[កែប្រែ]
- ↑ ទាញយកផែនទី, http://www.opendevelopmentcambodia.net/kh/maps/downloads/ Archived 2013-12-28 at the វេយប៊ែខ ម៉ាស៊ីន.
- ↑ ២,០ ២,១ អំពីយើង, http://www.opendevelopmentcambodia.net/kh/about/ Archived 2014-02-09 at the វេយប៊ែខ ម៉ាស៊ីន.