កេរមរតកដូនតា

ពីវិគីភីឌា

កេរមរតកដូនតា (បទ ពាក្យ៨)

កេរមរតកដូនតា (បទ ពាក្យ៨)
(១) អក្ខរាដែលចារនារាត្រីស្ងាត់ ព្រោះមានវិបត្តហាស្ដីមិនចេញ
តឹងណែនឪរ៉ាឈឺផ្សាទោម្នេញ នេត្រារលីងរលោងឥតល្ហែ។
(២) សោកស្ដាយអតីតកិត្យានុភាព ល្បីគ្មានគូប្រៀបកិត្តិនាមជាតិខ្មែរ
ពេលក្រោយប្តូរផ្លាស់ក្រឡាស់កែប្រែ ប្រជាលង់ហែក្នុងសមុទ្រកម្ម។
(៣) យប់កាន់តែជ្រៅខ្ញុំនៅនិពន្ធ ជូនមហាជនរំលឹកចងចាំ
សំនេរវាចាអក្ខរាបណ្ដាំ​ សំរាប់ជាថ្នាំជំនួយស្មារតី។
(៤) កើតមកមួយជាតិសល់ធាតុមួយចាន មិនគួរខកខានរៀបរាប់សេចក្ដី
ចំណេះដែលមានជូនញាតិប្រុសស្រី មិនទុកក្នុងដីជាមួយរូបកាយ។
(៥) ពូជខ្មែរជាពូជប្រពៃកន្លង នគរចម្បងអស់ដែនទាំងឡាយ
ប្រជាសុខសាន្ដរស់នៅសប្បាយ ភោគទ្រព្យនាយអាយសំបូរឥតខ្វះ។
(៦) សម្បត្តិមច្ឆាបឹងទន្លេសាប ពពួកសត្វស្លាបហោះហើរស្អេកស្កះ
ព្រឹក្សព្រៃធម្មជាតិជំរកល្អល្អះ ត្បូងពេជ្រដេរដាស់នៅបរបៃលិន។
(៧) ថ្មធ្យូងរ៉ែប្រេងមានច្រើនសន្ធឹក វស្សាផ្ដល់ទឹកដកស្ទូងច្រូតកិន
ដីមានជីជាតិបើពូកែប៉ិន កុំនៅចាំសិនដុតជើងដុតដៃ។
(៨) បន្លែបង្កាធ្វើច្បារដំណាំ រុក្ខជាតិដើមថ្នាំរួមផ្សំកែច្នៃ
ស្រាវជា្រវពេលយប់ធ្វើការពេលថ្ងៃ នាំក្ដីស្រម៉ៃក្លាយជាការពិត។
(៩) ធនធានដែលបានរៀបរាប់អន្លើ ហាក់ដូចនៅស្ទើរបើតាមការគិត
ផ្ដល់ផលអនេកសំរាប់ញាតិមិត្ត នេះជាទឹកចិត្តរបស់ដូនតា។
(១០) ដូចនេះក្នុងនាមអ្នកទទួលផល ដឹងគុណនឹកដល់អ្នកផ្ដល់សង្ខារ
ស្វែងយល់អោយច្បាស់ខ្មែរជានរណា ខិតខំរក្សាអភិវឌ្ឍកេរ្តិ៍។
(១១) តាមការស្រាវជា្រវសិលាចារិក តែងប្រទះញឹកពាក្យពេជ្រថាក្មេរ
ដើមហេតុនៃពាក្យនោះគឺគេមេ មរតកឋិតថេរដែលមេផ្ដល់ជាក់។
(១២) ប្រទេសយើងពិតមាតាធិប្បតេយ្យ ព្រោះហេតុអាស្រ័យមានស្រ្ដីម្នាក់
គឺព្រះនាងនាគបារមីវង់ភក្រ្ដ័ គឺទ្រង់ជាអ្នកគ្រប់គ្រងដែនដី។
(១៣) ហេតុនេះខ្មែរយើងសន្មត់ពាក្យមេ ជាពាក្យមុខគេគ្រប់ន័យសេចក្តី
មេដៃមេស្រុកមេទ័ពមេព្រៃ មេធាវីក្ដីមេលេខមេទឹក។
(១៤) មេកាព្យមេថ្នាំមេជាមេរយ គឺស្ដែងបញ្ជាក់ថែមក្រើនរំលឹក
មរតកដូនតាមានច្រើនសន្ធឹក ទំាងនេះជាទឹកព្រះទ័យបព្វជន។
(១៥) កុលបុត្រកុលធីតាថ្លាថ្លៃអើយ ចូរកុំព្រងើយតបស្នងសងគុណ
បង្កើនចំណេះរៀនលេខនព្វន្ដ ប្រែក្លាយជាជនប្រសើរឧត្ដម។
និពន្ធដោយ រដ្ឋា ចាន់ថន
១១ កញ្ញា ២០២០