ទំពក់វាទៅ ទើបព្នៅវាជ្រុះ
«ទំពក់វាទៅទើបព្នៅវាជ្រុះ»សេចក្តីយ៉ាងខ្លីនេះមានអត្ថរសយ៉ាងសំខាន់ដើម្បីនឹងញាំងចរិយាជនណាដែលខ្ជិលទំរន់ក្នុងកិច្ចការសព្វសារពើកុំឲ្យតែដេកចាំតែព្រេងវាសនាជូនផលឲ្យ។
អត្ថនុរូបរបស់ភាសិត[កែប្រែ]
បើយើងចង់បានផ្លែព្នៅដែលនៅជាប់នឹងសណ្តង់នៅឡើយយើងត្រូវខ្វល់ខ្វាយរកទំពក់ទៅថ្ពក់ទាញយកមកទើបវាជ្រុះដើម្បីយកមកធ្វើជាចំណីរបស់យើង។បើនៅស្ងៀមអង្គុយចាំឲ្យផ្លែព្នៅជ្រុះមកតែម្តងនោះកុំសង្ឃឹមថានឹងបានអាស្រ័យមុខជា«អង្គុយលេបទឹកមាត់ហើយ»
អត្ថបដិរូបរបស់ភាសិត[កែប្រែ]
ផ្លែព្នៅដែលយើងចង់បាននេះគឺគេចង់និយាយអំពីផលឬបំណងអ្វីមួយដែលយើងប្រាថ្នានឹងឲ្យបានសំរេចមកយើង។យើងមិនមែនដេកចាំឲ្យផលនេះវារត់រកយើងទេគឺត្រូវប្រឹងប្រែងខ្នះខ្នែងប្រើកម្លាំងកាយឬកម្លាំងចិត្តដើម្បីទៅថ្ពក់យកនោះវិស័យដូចគេខំខ្នះខ្នែងធ្វើទំពក់រួចហើយខំថ្ពក់យកផ្លែព្នៅជាចំណី។ឧទាហរណ៍
១) កូនសិស្សដែលប្រាថ្នាចង់បានសញ្ញាប័ត្រអ្វីមួយនោះត្រូវខំប្រឹងប្រែងរៀនសូត្រឲ្យណាស់ព្រោះចំណេះដែលបានពីការខំនេះហើយជាទំពក់យ៉ាងមាំដើម្បីទៅថ្ពក់កាវយកសញ្ញាប័ត្រ។
២) មាតាបិតាទាំងឡាយបើចង់រកភរិយាឲ្យកូនប្រុសតាមច្បាប់នោះត្រូវតែគិតគូរខ្នះខ្នែងរកគេឯងឲ្យជួយស៊ើបសួរចូលទៅដណ្តឹងដល់ម៉ែឪខាងកូនស្រី។បើមិនដូច្នោះទេកូនស្រីអ្នកមានពូជពង្សមិនងាយនឹង«ជ្រុះ»ដោយងាយទេទាល់តែមានទំពក់ទៅទើបព្នៅជ្រុះមកកុំសង្ឃឹមថា«គេនឹងលើកឲ្យដោយងាយនោះ។
៣) ប្រទេសកម្ពុជាដែលបានឋានៈជារដ្ឋឯករាជ្យនេះក៏មិនមែនបានមកដោយគ្មានយក«ទំពក់ទៅថ្ពក់»ដែរ។ចុះអ្វីជាទំពក់នេះ?គឺគ្មានអ្វីក្រៅពីសេចក្តីប្រឹងប្រែងរបស់សម្តេចព្រះបិតាឯករាជ្យជាតិទេ។ព្រះអង្គទ្រង់ប្រើព្រះនយោបាយដ៏ភ្លឺថ្លាធ្វើជាទំពក់ដើម្បីទៅទាញយកឯករាជ្យជូនជាតិ។
សេចក្តីបញ្ចប់[កែប្រែ]
បើចង់ឲ្យបានផលអ្វីមួយដូចសេចក្តីបំណងយើងកុំនៅស្ងៀមឲ្យរត់មករកនោះត្រូវចាំឲ្យជាក់ថា«បើចង់ស្រួចដូចបន្លាត្រូវតែឧស្សាហ៏ដុសដែកដុលទោះមានកុសលអកុសលកុំចាំសេសផលនោះជួយជូន»
សម្គាល់[កែប្រែ]
កែសម្រួលឡើងវិញដោយកែមសំអាង