វិទ្យាល័យកំពង់ឈើទាល

វិទ្យាល័យកំពង់ឈើទាល (ភាសាអង់គ្លេសៈ kampong chheuteal high school; ភាសាថៃៈ วิทยาลัยกำปงเฌอเตียล) គឺជា វិទ្យាល័យដែលមានទីតាំងនៅស្រុកប្រាសាទសំបូរ ខេត្តកំពង់ធំ។ វិទ្យាល័យនេះ គឺជាព្រះរាជអំណោយដ៏ថ្លៃថ្លានិងប្រកបដោយនិរន្តភាព របស់ព្រះអង្គម្ចាស់ក្សត្រិយ៍ មហាចក្រី សិរិនថន នៃព្រះរាជាណាចក្រថៃ ជូនដល់ប្រជាជនកម្ពុជាដើម្បីតបស្នងទឹកចិត្តមេត្រីភាពដែលមានចំពោះព្រះអង្គ និងជាការតំណាងឱ្យសម្ព័ន្ធភាពដ៏ល្អប្រសើររវាងប្រជាជាតិទាំងពីរប្រទេស ។

ស្លាកសញ្ញាប្រចាំវិទ្យាល័យ[កែប្រែ]

ផ្លាកសញ្ញា (Logo)របស់វិទ្យាល័យកំពង់ឈើទាលបានយកគំរូតាមផ្ទាំងចំលាក់នៅលើជញ្ជាំងរបស់ប្រាសាទទាំងឡាយ នៃក្រុមប្រាសាទសំបូរព្រៃគុក ។ ផ្ទាំងចំលាក់នេះជារូបតំណាងឲ្យវិមានអណ្តែតដែលបង្ហាញអំពីត្រៃភព ឬឋានទាំងបីដែលប្រជារាស្រ្តខ្មែរកាន់ព្រហ្មញ្ញសាសនា និងព្រះពុទ្ធសាសនាតែងមានជំនឿក្នុងរឿងនេះ ។ ផ្ទាំងចំលាក់ទាំងនេះជាប្រភេទចំលាក់លៀនគឺ ឆ្លាក់ឲ្យផុសចេញមកខាងក្រៅ ហើយលំអដោយផ្កាភ្ញី សត្វកំរផ្សេងៗដែលមានបរិយាយក្នុងសាសនាព្រាហ្មណ៍ដូចជា គ្រុឌ ហង្ស និងសត្វមករពាំកូនមនុស្សជាដើម ។ ផ្ទាំងចំលាក់នេះបានបង្ហាញភពទាំងបី គឺផ្នែកខាងក្រោមជាតំណាងឋានព្រះយមរាជ ជាអ្នកគ្រប់គ្រងមើលខុសត្រូវនិងចាំដាក់ទោសដល់មនុស្សណាដែលប្រព្រឹត្តអំពើបាប ។ ត្រង់ផ្នែកកណ្តាលជាតំណាងឋានមនុស្សដែលមានព្រះមហាក្សត្រនិងមហេសី របស់ទ្រង់គង់ក្នុងវិមានជាអ្នកគ្រប់គ្រងនិងជាម្ចាស់លើអ្វីទាំងអស់ដែលនៅលើផែនដីរបស់ព្រះអង្គ និងមានទំនាក់ទំនងដោយផ្ទាល់ជាមួយអទិទេពដែលព្រះអង្គគោរព ។ ចំណែកផ្នែកខាងលើគឺជាឋានរបស់អាទិទេពដែល មានព្រះសិវៈនិងមហេសីរបស់ទ្រងជាអទិទេពចំបងជាអ្នកគ្រប់គ្រងនិងមើលការខុសត្រូវដល់សុខទុក្ខក្នុងឋានលើនិងឋានមនុស្សលោកផងដែរ។

ប្រវត្តិ[កែប្រែ]

វិទ្យាល័យកំពង់ឈើទាល ចាប់ផ្តើមឡើងក្រោយពីព្រះរាជតំរិះ របស់ព្រះអង្គម្ចាស់ក្សត្រិយ៍ មហាចក្រី សិរិនថន នៃព្រះរាជាណាចក្រថៃ ទ្រង់យាងមកទស្សនកិច្ចប្រទេសកម្ពុជាលើកដំបូងនៅថៃ្ងទី 25 សីហា 1992 ដោយទ្រង់អញ្ជើញចូលរួមជាភ្ញៀវកិត្តិយសក្នុងព្រះរាជពិធីលៀងសាយភោជន៍របស់ព្រះបាទ នរោត្តម សីហនុ ទ្រង់មានព្រះរាជតំរិះក្នុងការជួយលើកកំពស់ លើវិស័យអប់រំ នៅប្រទេសកម្ពុជា។ សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានតបស្នងព្រះរាជតំរិះ ទូលស្នើឱ្យព្រះរាជទាន លើវិស័យអប់រំ និងថ្វាយជូនទីតាំងដីចំនួន 45 រ៉ៃ (បន្ទាប់មកពង្រីកទៅជា 117 រ៉ៃ) នៅស្រុកប្រាសាទសំបូរ ខេត្តកំពង់ធំ ដើម្បីសាង់សង់ជាគ្រឹះស្ថានសិក្សា។

នៅខែកុម្ភៈ ឆ្នាំ 2000 ទ្រង់មានព្រះរាជតំរិះឱ្យដំណើរការរៀបចំគម្រោងព្រះរាជឧបត្ថម្ភដល់ព្រះរាជាណាចក្រកម្ពុជា លើវិស័យអប់រំ និងវិស័យសុខាភិបាលកម្រិតមូលដ្ឋាន ដោយមានក្រុមរាជអង្គរក្ស មេបញ្ជាការទាហានកងកំលាំងកំពូល មេបញ្ជាការនគរបាលជាយដែន និងមហាវិទ្យាល័យអប់រំ នៃសាកលវិទ្យាល័យជុឡាឡុងកន រួមស្នងព្រះរាជតំរិះ តាមព្រះរាជបន្ទូលឱ្យតែងតាំងគណៈកម្មការគម្រោងសាលារៀនព្រះរាជឧបត្ថម្ភនៅព្រះរាជាណាចក្រកម្ពុជា ដោយមានទ្រង់ជាប្រធានគម្រោង។

ព្រះអង្គម្ចាស់ក្សត្រីយ៍ ទ្រង់បានយាងមកត្រួតពិនិត្យផ្ទៃដីកសាងវិទ្យាល័យនៅស្រុកប្រាសាទសំបូរ ខេត្តកំពង់ធំ ជាលើកដំបូងកាលពីថ្ងៃអាទិត្យ ទី១៩ ខែវិច្ឆិកា ឆ្នាំ២០០០ ទ្រងយាងមកបញ្ចុះបឋមសិលាកាលពីថ្ងៃព្រហស្បត្តិ៍ ទី១០ ខែឧសភា ឆ្នាំ២០០១ និងទ្រង់យាងមកសម្ពោធវិទ្យាល័យរួមជាមួយសម្តេចអគ្គមហាសេនាបតី ហ៊ុន សែន នាយករដ្ឋមន្រ្តីកម្ពុជា ជាបន្តបន្ទាប់ ។ វិទ្យាល័យកំពង់ឈើទាល ជាសាលារៀនកម្រិតមធ្យមសិក្សាដែលបើកបង្រៀនផ្នែកចំណេះដឹងទូទៅ ចាប់ពីថ្នាក់ទី ៧ ដល់ទី១២ និងបណ្តុះបណ្តាលផ្នែកវិជ្ជាជីវៈ មាន៤ ជំនាញ គឺ អេឡិចត្រូនិច អគ្គិសនី ក្សេត្រសាស្ត្រ និងបសុវប្បកម្ម សមស្របតាមតម្រូវការរបស់ព្រះរាជាណាចក្រកម្ពុជា ។ ព្រះអង្គម្ចាស់ក្សត្រីយ៍ មហាចក្រី សិរិថន ទ្រង់បានព្រះរាជតំរិះទាក់ទងនឹងវិស័យអប់រំដល់គណៈកម្មការភាគីថៃ និងភាគីកម្ពុជា ជាពិសេស គឺព្រះរាជបន្ទូលកាលពី ថ្ងៃទី២២ ខែសីហា ឆ្នាំ២០០៥នៅសាលប្រជុំក្រុមរាជអង្គរក្ស សួនចិត្រលដា ដែលមានដូចខាងក្រោម ៖

ខ្ញុំម្ចាស់មានអារម្មណ៍សព្វព្រះរាជហឫទ័យដែល គណៈកម្មការទាំងពីរភាគី បានដំណើរការវិទ្យាល័យមកមួយរយៈ ហើយទទួលបានលទ្ធផលយ៉ាងគាប់ប្រសើរ ។ សេចក្តីត្រូវការរបស់ខ្ញុំម្ចាស់ គឺចង់ចូលរួមចំណែកក្នុងការផ្តល់ ការឧបត្ថម្ភ លើវិស័យអប់រំដល់យុវជនកម្ពុជា ដែលជាយុវជនមានសក្តានុពលយ៉ាងប្រសើរ អាចជួយអភិវឌ្ឍន៍សង្គមកម្ពុជា និងសង្គមលោករហូតទៅ ។ រឿងដែលមានក្តីសង្ឍឹមចំពោះសិស្សគឺ ៖

ប្រការ ១ ចង់ឃើញសិស្សមានចំណេះដឹង មានសមត្ថភាពទូលំទូលាយអាចយកចំណេះដឹង ទៅប្រកបមុខរបរ ឬ ធ្វើការងារផ្សេងៗបាននិងអាចសិក្សាបន្តទៅកំរិតខ្ពស់ទៀតបាន ។

ប្រការ ២ ឲ្យសិស្សក្លាយជាមនុស្សមានគុណធម៌ មានភាពស្មោះត្រង់ សុចរិត ចេះជួយយកអាសារអ្នកដទៃ ។

ប្រការ ៣ សិស្សមានមានសុខភាពរាងការល្អ មាំមួន អាចធ្វើការងារផ្សេង ៗ បានយ៉ាងល្អ ។

ប្រការ ៤ ក្លាយជាអ្នកមានសមត្ថភាពក្នុងការគ្រប់គ្រង ចាត់ចែង ពិសេសគឺចង់ឲ្យសិស្សមកជួយក្នុងការងារអប់រំរបស់វិទ្យាល័យឲ្យបានគង់វង្សតទៅដោយមិនបោះបង់និងមិនឲ្យគុណភាពថយចុះ ។ សង្ឃឹមថា យុវជនទាំងនេះនឹងមានគំនិតអភិវឌ្ឍន៍ជួយឲ្យការងាររបស់យើងមានភាពកាន់តែប្រសើរឡើង ដើម្បីជួយសាងប្រយោជន៍សម្រាប់ជីវិតរស់នៅ និងកសាងសង្គមកម្ពុជាតរៀងទៅ ។

ឯកសារយោង[កែប្រែ]