ត្រីចៀនចួន

ត្រីចៀនចួន ជាមុខម្ហូបសាមញ្ញដែលគេធ្វើសម្រាប់បរិភោគក្នុងគ្រួសារ ទទួលភ្ញៀវបន្តិចបន្តួច ឬអាចយកទៅលក់រកចំណូលឲ្យគ្រួសារបាន បើយើងមានជំនាញចំពោះមុខម្ហូបនេះ។

គ្រឿងផ្សំ

ត្រីកែស ឬត្រីសណ្ដាយ កន្លះគីឡូក្រាម
ទឹកត្រី ១ស្លាបព្រា បាយ
អំពិលទុំ ប៉ុនមេដៃ
ស្ករត្នោត ១ស្លាបព្រាបាយ
ខ្ទឹមស ១ដុំតូច
ស្លឹកខ្ទឹម ឬស្លឹកគូឆាយ
សៀង ២ស្លាបព្រា (យកតែគ្រាប់សណ្ដែក)
ខ្ញី ១០០ក្រាម(ហាន់ជាចំណិតតូចៗ)
ខ្លាញ់រាវ ០,៥០ក្រាម

វិធីធ្វើ

ត្រីកែស ឬត្រីសណ្ដាយ ឆ្កឹះយកស្រកី និងវះយកពោះចេញ លាងទឹកកោសឲ្យស្អាត បើត្រីធំកាត់ជាពីរទុកមួយអន្លើ។
ហាន់ខ្ញីជាសរសៃតូចៗ ដើមខ្ទឹមឬស្លឹកគូឆាយ លាងទឹកឲ្យស្អាត កាត់ឲ្យខ្លី ប្រមាណ ៣សង់ទីម៉ែត។
ដាំខ្លាញ់ក្នុងខ្ទះឲ្យក្ដៅ ដាក់ត្រីចៀន ឲ្យក្រៀម(ស្បែកពណ៌លឿង) ដួសចេញសិន។
ខ្ទះលាងឲ្យស្អាត ដាំខ្លាញ់ឲ្យក្ដៅ ដាក់ខ្ទឹមស(ចិញ្ច្រាំឲ្យល្អិត) បំពងឲ្យឈ្ងុយ ដួសទុកសិន។
ដាក់ខ្ញីបំពង់ឲ្យឈ្ងុយ ដាក់សៀង ស្ករ ទឹកត្រី ម្សៅស៊ុប អំពិលទុំ ទឹកបន្តិច(កុំឲ្យរាវ) ដាំឲ្យពុះ ដាក់សាច់ ត្រីឲ្យចូលជាតិ(ប្រយ័ត្នកុំឲ្យបែកសាច់ត្រី) ភ្លក់ឲ្យល្មមតាមចំណូលចិត្ត រោយស្លឹកខ្ទឹម ឬស្លឹកគូឆាយពីលើ ដួសដាក់ចាន។ ម្ហូបនេះ គេបរិភោគជាមួយបាយ៕