មជ្ឈមណ្ឌលខេមរសិក្សា
 | |
| ប្រភេទ | ការអប់រំ |
|---|---|
| បង្កើតនៅ | ១៩៩៩ |
| ទីតាំង | វត្តដំណាក់ , សៀមរាប |
| តំបន់សាវាកម្ម | កម្ពុជា |
| គេហទំព័រ | http://www.khmerstudies.org/ |
មជ្ឈមណ្ឌលខេមរសិក្សា (មខស, អង់គ្លេស៖ Center for Khmer Studies ហៅកាត់ CKS) ត្រូវបានបង្កើតឡើងនៅឆ្នាំ ១៩៩៩ ជាអង្គការអន្តរជាតិមិនមែនរដ្ឋាភិបាលមួយ ដែលទទួលបានការគាំទ្រយ៉ាងទូលំទូលាយពីអ្នកសិក្សា អ្នកប្រាជ្ញ អ្នកស្រាវជ្រាវ បញ្ញាវន្ត និងមនុស្សជាច្រើនទៀត ដែលធ្វើការស្រាវជ្រាវអំពីប្រទេសកម្ពុជា។ មខស បានចុះបញ្ជី នៅក្រសួងការបរទេសក្នុងប្រទេសកម្ពុជា និងត្រូវបានចុះបញ្ជីក្នុងសហរដ្ឋអាមេរិច ក្នុងនាមជាស្ថាប័ន លើកលែងពន្ធ ក្រោមមាត្រា៥០១ (គ)៣ នៃក្រមថវិកាចំណូលផ្ទៃក្នុង។[១]
បេសកកម្ម
[កែប្រែ]មជ្ឈមណ្ឌលខេមរសិក្សា ផ្ដល់ការគាំទ្រដល់ការសិក្សាស្រាវជ្រាវ និងសេវាសាធារណៈទាំងឡាយណាដែលមានទំនាក់ទំនងទៅនឹងប្រទេសកម្ពុជា ទាំងវិស័យវិទ្យាសាស្ត្រសង្គម សិល្បៈ និងមនុស្សសាស្ត្រ។
គោលបំណង
[កែប្រែ]- ផ្សារភ្ជាប់ទំនាក់ទំនងរវាងអ្នកប្រាជ្ញ និស្សិត និងសិល្បករកម្ពុជា ទៅនឹងបណ្ដាសហការីអន្តរជាតិ ដើម្បីបង្កើនការយល់ដឹងអំពីប្រទេសកម្ពុជា និងអាស៊ីអាគ្នេយ៍។
- ពង្រឹងរចនាសម្ព័ន្ធវប្បធម៌និងការសិក្សាស្រាវជ្រាវរបស់កម្ពុជា ព្រមទាំងបញ្ចូលអ្នកប្រាជ្ញកម្ពុជាទៅក្នុងសហគមន៍តំបន់ និងសហគមន៍អន្តរជាតិ
- លើកកម្ពស់សង្គមស៊ីវិល នៅកម្ពុជាឲ្យមានភាពរឹងមាំ។[១]
កម្មវិធី និង គម្រោង
[កែប្រែ]- បណ្ណាល័យ មខស ៖ ជាបណ្ណាល័យសាធារណៈដ៏ធំមួយ ដែលស្ថិតនៅក្រៅរាជធានីភ្នំពេញ ដោយផ្ទុកនូវសំណៅឯកសារ សៀវភៅ ព្រឹត្តិបត្រស្រាវជ្រាវ ជាង ១១០០០ និងកុំព្យូទ័រសាធារណៈជាច្រើនគ្រឿង។
- អាហារូបករណ៍រយៈពេលខ្លី៖ សម្រាប់គាំទ្រដល់ការស្រាវជ្រាវ និងការអប់រំអ្នកប្រាជ្ញជាន់ទាប និងជាន់ខ្ពស់ នៅប្រទេសកម្ពុជា និងមកពីបរទេស។
- កម្មវិធីស្រាវជ្រាវនិងបណ្ដុះបណ្តាល ៖ សម្រាប់គាំទ្រដល់ការបណ្តុះបណ្តាល និងការច្របាច់បញ្ចូលអ្នកប្រាជ្ញកម្ពុជាវ័យក្មេងទៅក្នុងគម្រោងស្រាវជ្រាវអំពីប្រទេសកម្ពុជា តាមរយៈកិច្ចសហប្រតិបត្តិការជាមួយសាកលវិទ្យាល័យក្នុងប្រទេសកម្ពុជា និងសាកលវិទ្យាល័យនៅបរទេស។
- កម្មវិធីបោះពុម្ពផ្សាយនិងបកប្រែ ៖ ធ្វើការបោះពុម្ពផ្សាយ និង/ឬ បកប្រែឯកសារដើម និងបកប្រែជាភាសាខ្មែរនូវអត្ថបទប្រវត្តិសាស្ត្រ និងវិទ្យាសាស្ត្រសង្គមដែលជាតម្រូវការចាំបាច់បំផុត ។
- សន្និសីទ/ព្រឹត្តិការណ៍ផ្សេងៗ ៖ សិក្ខាសាលា សន្និសីទ និងការធ្វើបាឋកថាចម្រុះឯកទេស ដែលមានលក្ខណៈអន្តរជាតិ ដែលរៀបចំឡើងក្នុងខេត្តសៀមរាប និងក្នុងក្រុងភ្នំពេញ បានបង្កើតឲ្យមានបណ្ដាញផ្ទាល់រវាងអ្នកប្រាជ្ញកម្ពុជានិងអ្នកប្រាជ្ញអន្តរជាតិ។[១]
ការបោះពុម្ព
[កែប្រែ]- ការបកប្រែជាភាសាខ្មែរ មជ្ឈមណ្ឌលខេមរសិក្សា បានធ្វើការបកប្រែសំណៅឯកសារសំខាន់ៗដែលស្ដីអំពីប្រទេសកម្ពុជា និងអាស៊ីអាគ្នេយ៍។ នៅពេលបច្ចុប្បន្ននេះ មជ្ឈមណ្ឌលខេមរសិក្សា បានបកប្រែសៀវភៅដូចជា[២]៖
- សាក្សីប្រវត្តិសាស្រ្ត (រេរាំក្នុងស្រមោល៖ សីហនុ ខ្មែរក្រហម និងអង្គការសហប្រជាជាតិ ក្រោយសម័យប្រល័យពូជសាសន៍នៅកម្ពុជា), Benny Widyono
- ប្រវត្តិសាស្ត្រខ្មែរ, ដេវិឌ ឆាណ្ឌល័រ
- ផ្ដើមឈ្វេងយល់អំពីប្រវត្តិសាស្ត្រអាស៊ីអាគ្នេយ៍, Milton Osborne
- សិក្សាចក្រ ជាទស្សនាវដ្ដីដែលត្រូវបានបោះពុម្ពផ្សាយជាបីភាសា (ខ្មែរ អង់គ្លេស បារាំង) ស្ដីអំពីការស្រាវជ្រាវរបស់មជ្ឈមណ្ឌលខេមសិក្សា លើកម្ពុជា និងអាស៊ីអាគ្នេយ៍។[៣]
- In Focus គឺជាព្រឹត្តិបត្រប្រចាំឆ្នាំរបស់មជ្ឈមណ្ឌល ដោយធ្វើការបោះពុម្ពផ្សាយអំពីការណែនាំអំពីមជ្ឈមណ្ឌល អធិប្បាយអំពីកម្មវិធី បុគ្គល និងសន្និសីទ/ព្រឹត្តិការណ៍នានា។ លើសពីនេះទៀត ព្រឹត្តិបត្រ In Focus ក៏មានចុះផ្សាយអំពីនិន្នាការថ្មីៗក្នុងការស្រាវជ្រាវអំពីកម្ពុជា និងអាស៊ីអាគ្នេយ៍។ [៤]
- សំណៅឯកសារ, របាយការណ៍ និងឯកសារស្រាវជ្រាវ
- មូលន័យសង្ខេបសន្និសីទ
មើលផងដែរ
[កែប្រែ]ឯកសារយោង
[កែប្រែ]- ↑ ១,០ ១,១ ១,២ អំពីមជ្ឈមណ្ឌល, http://khmerstudies.org/kh/about/#specific%20objectives%20of%20CKS
- ↑ ការបកប្រែជាភាសាខ្មែរ, http://khmerstudies.org/publications/khmer-language-translations/
- ↑ សិក្សាចក្រ, http://khmerstudies.org/kh/publications/siksacakr
- ↑ http://khmerstudies.org/publications/in-focus/