អគ្គនាយកដ្ឋានរតនាគារជាតិ
អគ្គនាយកដ្ឋានរតនាគារជាតិ គឺជាបេឡាករ និងជាគណនេយ្យករសាធារណៈតែមួយគត់របស់រាជរដ្ឋាភិបាលកម្ពុជា ។ រតនាគារជាតិ ត្រូវបានបង្កើតឡើងតាមអនុក្រឹត្យលេខ ២៤ អនក្រ ចុះថ្ងៃទី ២០ ខែ កញ្ញា ឆ្នាំ ១៩៩០ ហើយបានចាប់ដំណើរការកិច្ចប្រតិបត្តិការរបស់ខ្លួន ចាប់ពីថ្ងៃទី ១ ខែ មករា ឆ្នាំ ១៩៩១។ បច្ចុប្បន្ននេះ រតនាគារជាតិ ត្រូវបាន រាជរដ្ឋាភិបាលតំឡើងឋានៈទៅជាអគ្គនាយកដ្ឋានរតនាគារជាតិ។ អគ្គនាយកដ្ឋានរតនាគារជាតិ ដឹកនាំដោយប្រធានមួយរូប ដែលជាប្រតិភូរាជរដ្ឋាភិបាល និងមានអគ្គនាយករងចំនួន បីរូប ជាជំនួយការ។ អគ្គនាយកដ្ឋានរតនាគារជាតិ មានប្រព័ន្ធចាត់តាំងឯកភាពពីថ្នាក់ កណ្តាលរហូតដល់ថ្នាក់មូលដ្ឋាន។ នៅថ្នាក់កណ្តាលមាននាយកដ្ឋានចំនួន ៦ និងមានអធិការកិច្ច រតនាគារជាតិមួយមានឋានៈស្មើនាយកដ្ឋាន និងមាន ការិយាល័យជំនាញក្រោមឱវាទចំនួន ២០។ នៅថ្នាក់មូលដ្ឋាន មានរតនាគារខេត្ត-រាជធានី ចំនួន ២៤ ដែលបច្ចុប្បន្នមាន ២៣ ខេត្ត-រាជធានី កំពុងដំណើរការ ព្រោះរតនាគារខេត្តកែប បានអនុញ្ញាតអោយដំណើរការនៅជាមួយរតនាគារខេត្តកំពត ជាបណ្តោះអាសន្ន។ មន្ត្រីរាជការរបស់អគ្គនាយកដ្ឋានរតនាគារជាតិទូទាំងប្រទេសមានចំនួន សរុប ៥៥៥ នាក់។
បេសកកម្ម
[កែប្រែ]- ជាបេឡាករ និងជាគណនេយ្យករសាធារណៈរបស់រាជរដ្ឋាភិបាល
- គ្រប់គ្រងប្រាក់កាសរបស់រដ្ឋ និងគណនីពិសេសនៃរតនាគារ
- រៀបចំគោលការណ៍ និងបទបញ្ជាគណនេយ្យសាធារណៈ
- កាន់កាប់ និងតាមដានការអនុវត្តន៍គណនេយ្យទូទៅ និងមជ្ឈការគណនី
- ធានាតុល្យភាពទូទៅនៃគណនី
- តំរង់ទិស និងតាមដានការអនុវត្តន៍គោលនយោបាយហិរញ្ញវត្ថុ និងបំណុលសាធារណៈ
- សហការជាមួយធនាគារជាតិនៃកម្ពុជា ក្នុងការអនុវត្តន៍គោលនយោបាយរូបិយវត្ថុ
- កសាងសេចក្តីព្រាងច្បាប់សំរាប់ទូទាត់ថវិកាប្រចាំឆ្នាំ។
ភារៈកិច្ច
[កែប្រែ]- គ្រប់គ្រងបេឡាថវិកាថ្នាក់ជាតិ ថ្នាក់ក្រោមជាតិ និងថវិកាស្វយ័ត
- គ្រប់គ្រងគណនីរបស់ក្រសួងស្ថាប័នថ្នាក់ជាតិថ្នាក់ក្រោមជាតិ គណនីប្រាក់បញ្ញើឯកជន គណនីក្រៅថវិកា និងគណនីពិសេសរបស់រតនាគារ
- គ្រប់គ្រងប្រាក់កាសរបស់រដ្ឋ មូលប័ត្ររដ្ឋ និងសញ្ញាប័ណ្ណរដ្ឋ
- ធ្វើតុល្យភាពសាច់ប្រាក់ និងគ្រប់គ្រងចំណូល-ចំណាយថវិកាជាតិ
- រួមចំណែកក្នុងការតំរង់ទិសការអនុវត្តន៍គោលនយោបាយរូបិយវត្ថុ
- តំរង់ទិស និងតាមដានការអនុវត្តន៍គោលនយោបាយហិរញ្ញវត្ថុ និងបំណុលសាធារណៈ
- កាន់កាប់ និងតាមដានការអនុវត្តន៍គណនេយ្យទូទៅ និងមជ្ឈការគណនី
- រៀបចំគោលការណ៍ និងបិទបញ្ជីគណនេយ្យសាធារណៈ
- ធានាតុល្យភាពទូទៅនៃគណនី
- ផ្តល់សេវាដល់គ្រប់ក្រសួង-ស្ថាប័នថ្នាក់ជាតិ និង រដ្ឋបាលថ្នាក់ក្រោមជាតិ លើការទូទាត់ ការចំណាយផ្សេងៗ ការបើកបៀវត្សរ៍ និងការប្រមូល ចំណូលស្របតាមច្បាប់ហិរញ្ញវត្ថុប្រចាំឆ្នាំ
- ធ្វើទំនាក់ទំនងជាមួយធនាគារជាតិនៃកម្ពុជាក្នុងការអនុវត្តន៍គោលនយោបាយរូបិយ-វត្ថុ
- ចូលរួមរៀបចំគំរោងថវិកាជាតិប្រចាំឆ្នាំ ដើម្បីបញ្ចូលទៅក្នុងសេចក្តីព្រាងច្បាប់ហិរញ្ញវត្ថុប្រចាំឆ្នាំ
- កសាងសេចក្តីព្រាងច្បាប់សំរាប់ទូទាត់ថវិកាប្រចាំឆ្នាំ។
មើលផងដែរ
[កែប្រែ]- រាជរដ្ឋាភិបាលកម្ពុជា
- ក្រសួងសេដ្ឋកិច្ច និងហិរញ្ញវត្ថុ
- ក្រសួងសេដ្ឋកិច្ច និងហិរញ្ញវត្ថុ
- អគ្គនាយកដ្ឋានពន្ធដារ
- អគ្គនាយកដ្ឋានគយ និងរដ្ឋាករ
ឯកសារយោង
[កែប្រែ]- ដកស្រង់ចេញពីគេហទំព័រអគ្គនាយកដ្ឋានរតនាគារជាតិ