ឧត្តរា
នាងឧត្តរា ជាកូនស្រីរបស់បុណ្ណកសេដ្ឋី លុះដល់វ័យចម្រើនឡើង លោកសុមនៈសេដ្ឋី ដែលជាមនុស្សមិច្ឆាទិដ្ឋិបានមកស្តីដណ្តឹងនាងឧត្តរាអោយទៅកូនប្រុសរបស់គាត់ដែលជាអ្នកមិច្ឆាទិដ្ឋិដែរ។ នាងឧត្តរា ក្រោយពេលរៀបអាពាហ៍ពិពាហ៍រួចមក នាងមិនដែលបានធ្វើបុណ្យទានជាមួយនឹងភិក្ខុសង្ឃឡើយ ដោយហេតុតែស្វាមីរបស់នាងជាមនុស្សមិច្ឆាទិដ្ឋិ មិនអនុញ្ញាតិអោយនាងបានធ្វើបុណ្យ។ ដោយមានការតូចចិត្តជាខ្លាំង នាងក៏បានសរសេរសំបុត្រទៅឪពុកនាង ក្នុងអត្ថន័យអោយទម្លាក់នាងជាទាសីទៅរៀបការជាមួយអ្នកក្រីក្រណាក៏បាន អោយតែនាងអាចឃើញភិក្ខុសង្ឃ និងអាចមានសេរីភាពក្នុងការធ្វើបុណ្យបាន។ លោកបុណ្ណកសេដ្ឋី ក៏បានបញ្ជូនប្រាក់ ១៥ពាន់កហាបនៈ អោយកូនស្រីក្នុងបំណងអោយកូនជួលអ្នកណាមួយមកអោយបម្រើស្វាមីរបស់ខ្លួនជំនួស ហើយខ្លួនឯងនឹងមានឱកាសធ្វើបុណ្យ។ នាងឧត្តរា ក៏បានជួលនាងសិរិមា ដែលជាស្រីផ្កាមាសប្រចាំនគរ អោយមកនៅបម្រើស្វាមីរបស់នាងជំនួសក្នុងរយៈពេល១៥ថ្ងៃ (ក្នុង១ថ្ងៃ នាងសិរិមាយកថ្លៃ១ពាន់កហាបនៈ)។ នាងឧត្តរាបានផ្តល់សិទ្ធិគ្រប់យ៉ាងអោយទៅនាងសិរិមា ដូចជាភរិយាដែរ អោយនៅគាប់បម្រើស្វាមី។ ដោយការនៅបម្រើ សោយសុខជាមួយនឹងស្វាមីរបស់នាងឧត្តរា នាងសិរិមាក៏ភ្លេចខ្លួនថា នាងជាស្រីសោភិនីដែលនាងឧត្តរាជួលមក ក៏ចាត់ទុកខ្លួនឯងដូចជាភរិយាគេពិតៗ នៅក្នុងថ្ងៃទី១៤ ដែលនាងឧត្តរាកំពុងចាត់ចែងភត្តថ្វាយសង្ឃ នាងសិរិមាបានឃើញស្វាមីឈរសំលឹងមើលនាងឧត្តរា ហើយសើចញឹមៗ នាងក៏មានចិត្តប្រច័ន្ទ ហើយស្ទុះទៅយកបបរក្តៅមកជះលើមុខនាងឧត្តរា។ ដោយអានុភាពនៃខន្តីចិត្តរបស់នាងឧត្តរា (ព្រោះនាងគិតថា បើនាងសិរិមាមិនមកជួយបម្រើស្វាមីជំនួសទេ នាងនឹងមិនបានធ្វើបុណ្យឡើយ នាងក៏ដឹងគុណរបស់នាងសិរិមា ហើយក៏មិនអាចមានចិត្តខឹងនឹងនាងសិរិមានោះបានឡើយ។) ទឹកបបរនោះក៏បែរជាត្រជាក់មិនអាចធ្វើអោយរលាកដល់នាងឧត្តរាបានឡើយ។ នាងសិរិមាក៏បានដឹងខ្លួនខុស សូមទោសចំពោះនាងឧត្តរា។ នាងឧត្តរាបានអោយទៅសូមទោសដល់ព្រះសម្មាសម្ពុទ្ធដែលជាបិតាវិវដ្តរបស់នាង។ លុះបានទៅជួបនឹងព្រះហើយ នាងសិរិមាក៏ដល់នូវព្រះរតនត្រ័យដូចជានាងឧត្តរាដែ។
 |
អត្ថបទដែលទាក់ទងនឹងព្រះពុទ្ធសាសនានេះគឺជាអត្ថបទខ្លីមិនពេញលេញ។ លោកអ្នកអាចជួយវីគីភីឌាដោយសរសេរពង្រីកបន្ថែម។ |