ភ្នំគូលែន

ភ្នំគូលែន (អង់គ្លេស : Phnom Kulen or Kulen Mountain) គឺជាជួរភ្នំនិងជាផ្នែកមួយនៃឧទ្យានជាតិព្រះជ័យវរ្ម័ន-នរោត្តម ភ្នំគូលែនដែលមានទីតាំងស្ថិតនៅខេត្តសៀមរាប ប្រទេសកម្ពុជា។

ភ្នំគូលែន Phnom Kulen or Kulen Mountain
ទេសភាពភ្នំគូលែន ទេសភាពភ្នំគូលែន
ភ្នំគូលែន ផែនទីនៃភ្នំគូលែន
កូអដោនេ: 13°34′47.28″N 104°12′55.44″E
ទីតាំង	ខេត្តសៀមរាប, កម្ពុជា
ប្រភេទភ្នំ	ថ្មភក់
ល្វែងម៉ោង	កម្ពុជា (ម.ស.ស.+7)

ប្រវត្តិសាស្ត្រ

ភ្នំគូលែនមានឈ្មោះដើមថាមហេន្ទ្របវ៌តឬមហិន្រ្ទបព៌តដែលត្រូវបានគេចាត់ទុកជាទីតាំងកំណើតនៃសម័យអង្គរ។ភ្នំគូលែនក៏ជាទីកន្លែងដែលព្រះបាទជ័យវម្ម៌ទី ២ ប្រារព្ធធ្វើពិធីទេវរាជនិងប្រកាសឯករាជ្យពីប្រទេសជ្វានៅក្នុងឆ្នាំ ៨០២ និងជាពេលដែលសម័យអង្គរកកើតឡើង។ភ្នំនេះគឺជារាជធានីនៃសម័យអង្គរដំបូងគេជិតកន្លះសតវត្សរ៍មុនពេលប្តូរទៅហរិហរាល័យដែលឥឡូវនេះហៅថារលួសវិញ។

លក្ខណៈភូមិសាស្ត្រ

ភ្នំគូលែនគឺជាជួរភ្នំមួយដែលមានទីតាំងស្ថិតនៅខេត្តសៀមរាប ប្រទេសកម្ពុជា។ឧទ្យានជាតិព្រះជ័យវរ្ម័ន-នរោត្តម ភ្នំគូលែនត្រូវបានបង្កើតឡើងនិងកំណត់ដោយព្រះរាជក្រឹត្យចុះនៅថ្ងៃទី ០១ ខែវិច្ឆិកា ឆ្នាំ ១៩៩៣ ដោយមានផ្ទៃដីសរុប ៣៧៥០០ ហិកតាដែលមានវិសាលភាពគ្របដណ្តប់លើភ្នំចំនួន ០៣ គឺភ្នំហប់ ភ្នំគូលែន និង ភ្នំក្បាលស្ពាន។ភ្នំនីមួយៗមិនត្រឹមតែមានតួនាទីសំខាន់នៅក្នុងការជួយថែរក្សាលំនឹងបរិស្ថាននៅតំបន់អង្គរតាមរយៈប្រភពធនធានធម្មជាតិដ៏សម្បូរបែបមានព្រៃឈើ ប្រភពទឹក និង ជីវៈចម្រុះប៉ុណ្ណោះនោះទេប៉ុន្តែវាមានអត្ថន័យយ៉ាងជ្រៅជ្រះនិងមានតម្លៃជាប្រវត្តិសាស្រ្តសម្រាប់ប្រទេសកម្ពុជាដោយសារសំណង់ប្រវត្តិសាស្រ្តនិងស្ថានីយ៍បុរាណជាច្រើនកន្លែងត្រូវបានរកឃើញនៅទីនោះ។កន្លងមកភ្នំគូលែនធ្លាប់ទទួលបានងារជាឧទ្យានជាតិតាមព្រះរាជក្រឹត្យកាលពីឆ្នាំ ១៩៦៩ ហើយបានក្លាយជាឧទ្យានជាតីទី ០២ បន្ទាប់ពីឧទ្យានជាតិទី ០១ នៅតំបន់អង្គរដែលត្រូវបានការពារនិងកំណត់ដោយព្រះរាជក្រឹត្យកាលពីឆ្នាំ ១៩២៥។

តំបន់អភិរក្សនិងការពារ

អត្ថបទដើម: ឧទ្យានជាតិព្រះជ័យវរ្ម័ន-នរោត្តម ភ្នំគូលែន

នៅតំបន់ភ្នំគូលែនមានតំបន់អភិរក្សធម្មជាតិមួយឈ្មោះឧទ្យានជាតិព្រះជ័យវរ្ម័ន-នរោត្តម ភ្នំគូលែនដែលមានទីតាំងស្ថិតនៅស្រុកស្វាយលើនិងស្រុកវ៉ារិន។គោលបំណងនៃការបង្កើតឧទ្យានជាតិនេះឡើងគឺសម្រាប់ទេសចរណ៍និងការសិក្សាស្រាវជ្រាវវិទ្យាសាស្ត្រដើម្បីអភិរក្សនិងការពារតំបន់ធម្មជាតិនៃភ្នំគូលែនដូចជាទឹកជ្រោះល្បីៗមួយចំនួន។