ឆ្នាំ ២០២៣

សហស្សវត្សរ៍	សហវត្សរ៍ទី ៣
សតវត្ស	សតវត្សទី ២១
ទសវត្សរ៍	ឆ្នាំ ២០២០
ឆ្នាំ	២០២០ • ២០២១ • ២០២២ • គ.ស. ២០២៣ • ២០២៤ • ២០២៥ • ២០២៦

ឆ្នាំ ២០២៣ ក្នុង​ប្រតិទិន​ផ្សេងៗ
ពុទ្ធសករាជ	២៥៦៧
ប្រតិទិនគ្រីកូរី	២០២៣ MMXXIII
Ab urbe condita	២៧៧៦
ប្រតិទិនអាមេនី	១៤៧២ ԹՎ ՌՆՀԲ
ប្រតិទិនអាស៊ីរី	៦៧៧៣
ប្រតិទិនបាហៃ	១៧៩–១៨០
ប្រតិទិនសាកាបាលី	១៩៤៤–១៩៤៥
ប្រតិទិនបេងហ្កាល់	១៤៣០
ប្រតិទិនប៊ែប៊ែរ	២៩៧៣
រាជ្យឆ្នាំអង់គ្លេស	១ Cha. ៣ – ២ Cha. ៣
ប្រតិទិនភូមា	១៣៨៥
ប្រតិទិនប៊ីហ្សង់តាំង	៧៥៣១–៧៥៣២
ប្រតិទិនចិន	壬寅年 (ខាល ធាតុទឹក) ៤៧១៩ ឬ ៤៦៥៩   — ដល់ — 癸卯年 (ថោះ ធាតុទឹក) ៤៧២០ ឬ ៤៦៦០
ប្រតិទិនកូបទិក	១៧៣៩–១៧៤០
ប្រតិទិនឌីស្កតដ៍	៣១៨៩
ប្រតិទិនអេត្យូពី	២០១៥–២០១៦
ប្រតិទិនហេប្រឺ	៥៧៨៣–៥៧៨៤
ប្រតិទិនហិណ្ឌូ	២០៧៩–២០៨០ (វិក្រមសម្វត) ១៩៤៤–១៩៤៥ (សកសម្វត) ៥១២៣–៥១២៤ (កលិយុគ)
ប្រតិទិនអូឡូសែន	១២០២៣
ប្រតិទិនអ៊ីហ្គបូ	១០២៣–១០២៤
ប្រតិទិនអ៊ីរ៉ង់	១៤០១–១៤០២
ប្រតិទិនឥស្លាម	១៤៤៤–១៤៤៥
ប្រតិទិនជប៉ុន	សករាជរេវ៉ា ៥ (令和５年)
ប្រតិទិនជ្វា	១៩៥៦–១៩៥៧
ប្រតិទិនជូឆេ	១១២
ប្រតិទិនជូលាន	គ្រីកូរីដក ១៣ ថ្ងៃ
ប្រតិទិនកូរ៉េ	៤៣៥៦
ប្រតិទិនមីនគួ	ROC ១១២ 民國112年
ប្រតិទិនណានក្សាហ៊ី	៥៥៥
ប្រតិទិនសុរិយគតិថៃ	២៥៦៦
ប្រតិទិនទីបេ	阳水虎年 (ខាលឈ្មោលធាតុទឹក) ២១៤៩ ឬ ១៧៦៨ ឬ ៩៩៦    — ដល់ — 阳水虎年 (ថោះញីធាតុទឹក) ២១៥០ ឬ ១៧៦៩ ឬ ៩៩៧
ម៉ោងយូនីក	១៦៧២៥៣១២០០ – ១៧០៤០៦៧១៩៩

គ.ស. ២០២៣​ ត្រូវ​នឹង ព.ស. ២៥៦៧ ជាឆ្នាំសកលចាប់ផ្តើមនៅថ្ងៃអាទិត្យ តាមប្រតិទិនគ្រីកូរី ហើយជាឆ្នាំទី ២០២៣ នៃសកលសករាជ និងគ្រិស្តសករាជ។

មេដឹកនាំកម្ពុជា

អត្ថបទដើមចំបង: បញ្ជីមេដឹកនាំបរទេស ឆ្នាំ ២០២៣

ព្រះ​ឆាយា​ល័ក្ខណ៍/រូបថត	តំណែង	នាម
	ព្រះមហាក្សត្រនៃព្រះរាជាណាចក្រកម្ពុជា	ព្រះបាទសម្តេចព្រះបរមនាថ នរោត្តម សីហមុនី
	នាយករដ្ឋមន្ត្រីនៃព្រះរាជាណាចក្រកម្ពុជា	សម្ដេចអគ្គមហាសេនាបតីតេជោ ហ៊ុន សែន

ព្រឹត្តិការណ៍

មករា

• ១ មករា – ប្រទេសក្រូអាស៊ីបានទទួលប្រើប្រាស់ប្រាក់អឺរ៉ូ និងបានចូលជាសមាជិកទី ២៧ នៃតំបន់ស្សិនគែន ហើយក្លាយខ្លួនជារដ្ឋសមាជិកទី ២០ នៃហ្សូនអឺរ៉ូ។
• ៥ មករា – ព្រះពិធីបុណ្យសពរបស់សម្តេចប៉ាប បេណេឌីកទី១៦ ត្រូវបានប្រារព្ធឡើងនៅទីលានសាំងព្យែរក្នុងបុរីវ៉ាទីកង់។
• ៨ មករា
  • វិបត្តិជំងឺកូវីដ-១៩៖ ប្រទេសចិនបានបើកព្រំដែនរបស់ខ្លួនឡើងវិញដើម្បីទទួលភ្ញៀវអន្តរជាតិ ដោយការសម្រេចនេះបានបញ្ជាក់ពីទីបញ្ចប់នៃគោលការណ៍រឹតបន្តឹងការធ្វើដំណើររបស់ប្រទេសចិនដែលបានចាប់អនុវត្តកាលពីអំឡុងខែមីនា ឆ្នាំ២០២០ មកម៉្លេះ។
  • អ្នកគាំទ្រអតីតប្រធានាធិបតីប្រេស៊ីល ចាអៀ បុលសូណារ៉ូ បានរួមគ្នាសម្រុកចូលសន្ធប់ក្នុងស្ថាប័នកំពូលទាំងបីរបស់រដ្ឋគឺ សមាជជាតិ តុលាការសហព័ន្ធកំពូល និងវិមានប្រធានាធិបតីផ្លាណាល់តូ។
• ១៧ មករា – លោកង្វៀន ស៊ួនហ្វុកបានលាលែងពីតំណែងជាប្រធានាធិបតីវៀតណាម ចំពេលមានរឿងអាស្រូវជាច្រើនកំពុងលេចឡើងក្នុងជួររដ្ឋាភិបាល។
• ២០ មករា – សភាទ្រីនីតេ និងតូបាគោបានបោះឆ្នោតជ្រើសរើសអតីតប្រធានព្រឹទ្ធសភាគឺលោក គ្រីស្ទីន កង់ហ្កាលូ ជាប្រធានាធិបតីនៃប្រទេសដោយសំឡេង ៤៨–២២។
• ២៥ មករា – លោកគ្រីស ហ៊ីបគីនបានឡើងកាន់តំណែងជានាយករដ្ឋមន្ត្រីនូវែលហ្សេឡង់បន្តពីលោកស្រីចាស៊ីនដា អារឌែន ក្រោយពីលោកស្រីបានលាលែងនៅប្រាំមួយថ្ងៃមុន។
• ២៧ មករា – ភាពចលាចលបានផ្ទុះឡើងនៅប្រទេសអ៊ីស្រាអែលបន្ទាប់ពីកងកម្លាំងយោធាអ៊ីស្រាអែលបានចុះធ្វើប្រតិបត្តិការបង្ក្រាបសកម្មជនឥស្លាមនិយមនៅក្រុងជេនីន ដែលជាហេតុបណ្តាលឱ្យជនជាតិប៉ាឡេស្ទីនចំនួនប្រាំបួននាក់បាត់បង់ជីវិត។ បន្ទាប់មក ប៉េងប៉ោង​អគ្យន្តរាយត្រូវ​បាន​​បង្ហោះ​ចូល​ទៅ​ក្នុង​តំបន់​ដែល​មាន​ប្រជាជន​អ៊ីស្រាអែល​រស់នៅ ដោយអ៊ីស្រាអែលបាន​ឆ្លើយ​តបវិញ​តាមរយៈ​ការ​បាញ់​ប្រហារ​តាម​ផ្លូវ​អាកាស។ ក្រោយមកនៅថ្ងៃដដែរនោះ ជនស៊ីវិលជ្វីហ្វចំនួន ៧ នាក់បានរងការបាញ់សម្លាប់នៅក្នុងវិហារជ្វីហ្វមួយនៅយេរូសាឡឹមខាងកើត។
• ២៧–២៨ មករា – ជុំទីពីរនៃការបោះឆ្នោតប្រធានាធិបតីឆែកឆ្នាំ ២០២៣ បានប្រព្រឹត្តិធ្វើឡើងដោយមានលោកពេទត៍ ប៉ាវែលជាអ្នកឈ្នះឆ្នោត។
• ៣០ មករា – អត្តឃាតកម្មបំផ្ទុះគ្រាប់បែកនៅក្នុងវិហារឥស្លាមមួយក្នុងទីក្រុងប៉េសាវ៉ា ប្រទេសប៉ាគីស្ថាន បានសម្លាប់មនុស្សយ៉ាងតិចចំនួន ១០១ នាក់ និងជាង ២២០ នាក់ផ្សេងទៀតបានរងរបួស។

កុម្ភៈ

• ២ កុម្ភៈ – ធនាគារកណ្ដាលអឺរ៉ុប និងធនាគារអង់គ្លេសបានតម្លើងអត្រាការប្រាក់ខ្លួនឡើង ០.៥ ភាគរយ ដើម្បីទប់ទល់នឹងអតិផរណា មួយថ្ងៃក្រោយពីធនាគារកណ្ដាលនៃសហរដ្ឋអាមេរិកបានបង្កើនអត្រាមូលនិធិសហព័ន្ធឡើង ០.២៥ ភាគរយ។
• ៣ កុម្ភៈ – សហរដ្ឋអាមេរិកបានប្រកាសថាខ្លួនកំពុងតាមដាន"បាឡុងចារកម្ម"របស់ប្រទេសចិនដែលកំពុងហោះរសាត់នៅលើទឹកដីនៃទ្វីបអាមេរិក ដោយបាឡុងទីមួយបានរសាត់ចេញពីទឹកដីយូគុននៃប្រទេសកាណាដាទៅរដ្ឋការ៉ូលីណាខាងត្បូងនៃសហរដ្ឋអាមេរិក មុនពេលត្រូវបានបាញ់កម្ទេចនៅថ្ងៃបន្ទាប់ និងបាឡុងទីពីរបានកំពុងហោះរសាត់លើប្រទេសកូឡុំប៊ី និងប្រេស៊ីល។
• ៥ កុម្ភៈ – ការបោះឆ្នោតប្រធានាធិបតីស៊ីបឆ្នាំ២០២៣ បានប្រព្រឹត្តធ្វើឡើងដោយមានលោកនីកូស គ្រីស្តូឌូលីដស៍ជាប់ឆ្នោតជាប្រធានាធិបតី។
• ៦ កុម្ភៈ – រញ្ជួយដីកម្រិត ៧.៨ វ៉ិចទ័រ បានផ្ទុះឡើងនៅប៉ែកអាគ្នេយ៍នៃប្រទេសតួកគី។ រលកមួយទៀតកម្រិត ៧.៥ វ៉ិចទ័រ បានកើតឡើងក្នុងថ្ងៃដដែរនៅខេត្តក្បែរនោះហៅការ៉ាម៉ង់ម៉ារ៉ាស។ គ្រោះរញ្ជួយដីនេះបាននាំមកនៅការខូតខាតយ៉ាងធ្ងន់ធ្ងរ និងមនុស្សស្លាប់រហូតដល់ទៅ ៤៧,០០០ នាក់នៅក្នុងប្រទេសតួកគី និងស៊ីរី ខណៈមនុស្សជាង ១២២,០០០ នាក់ទៀតបានទទួលរងរបួស។
• ១៣ កុម្ភៈ – ការបោះឆ្នោតប្រធានាធិបតីបង់ក្លាដែសឆ្នាំ២០២៣ ដែលគ្រោងធ្វើនៅថ្ងៃទី១៩ ខែកុម្ភៈ ត្រូវបានរៀបចំឡើង ដោយមានលោកសាហាប៊ូឌីន ជូបពូជាប់ឈ្មោះជាបេក្ខភាពប្រធានាធិបតីតែម្នាក់គត់ ហើយដូច្នេះលោកក៏ត្រូវបានជាប់ឆ្នោតដោយគ្មានសម្លេងប្រឆាំង។
• ២១ កុម្ភៈ – លោកវ្ល៉ាឌីមៀរ ពូទីនបានប្រកាសថា រុស្ស៊ីបានព្យួរចំណូលរួមរបស់ខ្លួននៅក្នុង New START ដែលជាសន្ធិសញ្ញាកាត់បន្ថយអាវុធនុយក្លេអ៊ែរជាមួយសហរដ្ឋអាមេរិក។
• ២៥ កុម្ភៈ – ការបោះឆ្នោតសកលនីហ្សេរីយ៉ាឆ្នាំ២០២៣៖ លោកបូឡា ទីនូប៊ូត្រូវបានជាប់ឆ្នោតជាប្រធានាធិបតីនីហ្សេរីយ៉ាដោយបានយកឈ្នះលើអតីតអនុប្រធានាធិបតី លោកអាទីគុ អាប៊ូបាកា និងពីទ័រ អូប៊ី។
• ២៧ កុម្ភៈ – ចក្រភពអង់គ្លេស និងសហភាពអឺរ៉ុបបានយល់ព្រមលើកិច្ចព្រមព្រៀងថ្មីមួយជុំវិញការកែប្រែចំណុមមួយចំនួនក្នុងពិធីសារអៀរឡង់ខាងជើង។
• ២៨ កុម្ភៈ – ឧប្បត្តិហេតុរថភ្លើង​បុកគ្នា​នៅ​ក្នុងតំបន់តេសាលី ប្រទេស​ក្រិក បានបណ្ដាលឱ្យមានមនុស្សស្លាប់ចំនួន ៥៧​ នាក់ និងមានអ្នករងបួស​ប្រមាណរាប់សិប​នាក់ផ្សេងទៀត។

មីនា

• ២ មីនា – រដ្ឋសភាជាតិវៀតណាមបានប្រកាសតែងតាំងលោកវ៉ូ វ៉ាន់ធឿង ជាប្រធានាធិបតីថ្មី បន្ទាប់ពីទទួលបានសំឡេងគាំទ្រ ៩៨.៣៨% ពីសភាវៀតណាម។
• ៤ មីនា – រដ្ឋសមាជិកនៃអង្គការសហប្រជាជាតិបានយល់ព្រមលើក្របខ័ណ្ឌច្បាប់សម្រាប់សន្ធិសញ្ញាសមុទ្រខ្ពស់ដែលមានគោលដៅការពារ ៣០% នៃមហាសមុទ្រពិភពលោកនៅឆ្នាំ២០៣០។
• ៥ មីនា – ការបោះឆ្នោតសភាអេស្តូនីឆ្នាំ២០២៣ បានប្រព្រឹត្តិធ្វើឡើង។
• ១០ មីនា
  • ការបោះឆ្នោតប្រធានាធិបតីនៃសាធារណរដ្ឋប្រជាមានិតចិន៖ លោកស៊ី ជីនពីងត្រូវបានជាប់ឆ្នោតជាប្រធានាធិបតីជាថ្មីសម្រាប់អាណត្តិទីបីដែលមិនធ្លាប់មានពីមុនមក។
  • អ៊ីរ៉ង់ និងអារ៉ាប៊ីសាអ៊ូឌីតបានយល់ព្រមស្ដារទំនាក់ទំនងការទូតជាមួយគ្នាឡើងវិញក្រោយពីប្រទេសទាំងពីរបានផ្តាច់ទំនាក់ទំនងគ្នាកាលពីឆ្នាំ២០១៦។
  • ធនាគារ Silicon Valley Bank ដែលត្រូវជាធនាគារធំបំផុតទី១៦ នៅសហរដ្ឋអាមេរិក បានដួលរលំ ហើយវាបានបង្កឱ្យមានផលប៉ះពាល់យ៉ាងដំណំដល់ក្រុមហ៊ុនធំៗនៅជុំវិញពិភពលោក ដោយនេះជាការដួលរលំធនាគារធំបំផុតមួយចាប់តាំងពីវិបត្តិហិរញ្ញវត្ថុឆ្នាំ២០០៨។
• ១៤ មីនា – យន្តហោះចម្បាំងរុស្ស៊ីប្រភេទ Su-២៧ បានស្កាត់ និងបាញ់ទម្លាក់ដ្រូន MQ-៩ Reaper របស់អាមេរិក បណ្តាលឱ្យវាធ្លាក់ចូលទៅក្នុងសមុទ្រខ្មៅ។
• ១៧ មីនា – តុលាការឧក្រិដ្ឋកម្មអន្តរជាតិបានចេញដីកាចាប់ខ្លួនប្រធានាធិបតីរុស្ស៊ី លោកវ៉្លាឌីមៀរ ពូទីន ដោយនេះជាដីកាចាប់ខ្លួនដំបូងចំពោះសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។
• ១៩ មីនា – ធនាគារវិនិយោគស្វីស UBS Group AG បានយល់ព្រមទិញ ក្រេឌីតស្វីស (Credit Suisse) ក្នុងតម្លៃ ៣ ពាន់លាន CHF (៣.២ ពាន់លានដុល្លារ) ដោយមានការសម្របសម្រួលពីរដ្ឋាភិបាលស្វីស និងអាជ្ញាធរត្រួតពិនិត្យទីផ្សារហិរញ្ញវត្ថុស្វីស។
• ២០ មីនា – ក្រុមប្រឹក្សាអន្តររដ្ឋាភិបាលស្តីពីការប្រែប្រួលអាកាសធាតុ (IPCC) បានបញ្ចេញរបាយការណ៍សំយោគនៃរបាយការណ៍វាយតម្លៃលើកទីប្រាំមួយរបស់ខ្លួនស្តីពីបម្រែបម្រួលអាកាសធាតុ។
• ២៦ មីនា
  • អង្គការណាតូបានថ្កោលទោសប្រទេសរុស្ស៊ីបន្ទាប់ពីមានការសម្រេចចិត្តពីប្រធានាធិបតីរុស្ស៊ីលោកវ៉្លាឌីមៀរ ពូទីន ក្នុងការបញ្ឈរអាវុធយុទ្ធសាស្ដ្រនុយក្លេអ៊ែរនៅក្នុងប្រទេសបេឡារុស។
  • បាតុកម្មប្រឆាំងកំណែទម្រង់តុលាការនៅអ៊ីស្រាអែល៖ បាតុកម្មទ្រង់ទ្រាយធំមួយបានផ្ទុះឡើងនៅទូទាំងប្រទេសអ៊ីស្រាអែលបន្ទាប់ពីនាយករដ្ឋមន្ត្រីលោកបេនយ៉ាមិន នេតាញ៉ាហ៊ូបានបណ្តេញរដ្ឋមន្ត្រីការពារជាតិចេញពីតំណែងក្រោយបាននិយាយប្រឆាំងនឹងផែនការប្តូរប្រព័ន្ធតុលាការនៃរដ្ឋាភិបាល។

មេសា

• ២ មេសា
  • ការបោះឆ្នោតសភាជាតិប៊ុលហ្ការី ត្រូវបានរៀបចំធ្វើឡើងក្នុងគោលបំណងបញ្ចប់វិបត្តិនយោបាយក្នុងប្រទេសដែលកើតឡើងតាំងពីឆ្នាំ២០២១។
  • ការបោះឆ្នោតជ្រើសរើសប្រធានាធិបតីម៉ុងតេណេគ្រោ ត្រូវបានប្រព្រឹត្តិធ្វើឡើង ដោយលោកយ៉ាកូហ្វ មីឡាតូវិកដែលមកពីចលនាអឺរ៉ុបឥឡូវ!បានទទួលជ័យជម្នះក្នុងជុំទីពីរ និងបានក្លាយជាប្រធានាធិបតីទីមួយដែលមិនមកពីគណបក្សប្រជាធិបតេយ្យនៃសង្គមនិយមបន្ទាប់ពីមានប្រព័ន្ធពហុបក្សតាំងពីឆ្នាំ១៩៩០ មក។
  • ការបោះឆ្នោតសភាជាតិហ្វាំងឡង់ ត្រូវបានប្រារព្ធឡើង ដោយគណបក្សជាតិចម្រុះដែលដឹកនាំដោយលោកពេទតេរី អ័រប៉ូបានទទួលសម្លេងគាំទ្រច្រើនជាងគេ។
  • ការបោះឆ្នោតសភាជាតិអង់ដូរ៉ា ត្រូវបានប្រារព្ធធ្វើឡើង ដោយគណបក្សកាន់អំណាចឈ្មោះ ប្រជាធិបតេយ្យសម្រាប់អង់ដូរ៉ា បានបន្តទទួលអាសនៈភាគច្រើន។
• ៤ មេសា – ហ្វាំងឡង់បានក្លាយជាសមាជិកទី ៣១ នៃអង្គការណាតូ និងជារដ្ឋសមាជិកទីប្រាំដែលមានព្រំដែនជាប់ជាមួយប្រទេសរុស្ស៊ី។
• ១០ មេសា – ករណីបែកធ្លាយឯកសារចំនួនពីរពីមន្ទីរបញ្ចកោណ ដែលផ្ទុកខ្លឹមសារលម្អិតស្ដីពីជំនួយយោធាបរទេស ទាក់ទងនឹងការឈ្លានពានរបស់រុស្ស៊ីលើអ៊ុយក្រែន ត្រូវបានបែកធ្លាយនៅលើបណ្ដាញអ៊ីនធើណេត។
• ១១ មេសា – សង្គ្រាមផ្ទៃក្នុងមីយ៉ាន់ម៉ា៖ អ្នកភូមិប៉ាហ្ស៊ីជីយ៉ាងតិច ១៦៥ នាក់ត្រូវបានប្រហារសម្លាប់ដោយកងទ័ពអាកាសមីយ៉ាន់ម៉ាក្នុងអំឡុងពេលប្រារព្ធពិធីបើកការិយាល័យរដ្ឋបាលនៃកងកម្លាំងការពារប្រជាជន។
• ១៤ មេសា – Jupiter Icy Moons Explorer (JUICE) ត្រូវបានបាញ់បង្ហោះដោយទីភ្នាក់ងារអវកាសអឺរ៉ុប (ESA) ដើម្បីស្វែងរកជីវិតនៅក្នុងប្រព័ន្ធចូវាន ដោយរំពឹងនឹងទៅដល់នៅឆ្នាំ២០៣១។
• ១៥ មេសា
  • ថាមពលនុយក្លេអ៊ែរនៅអាល្លឺម៉ង់បានឈប់ដំណើរការជាផ្លូវការបន្ទាប់ពីការប្រកាសបិទរោងចក្រថាមពលចុងក្រោយបង្អស់នៅក្នុងប្រទេស។
  • ជម្លោះប្រដាប់អាវុធបាន​ផ្ទុះឡើងនៅ​ក្នុង​ប្រទេស​ស៊ូដង់​រវាង​កង​កម្លាំង​ប្រដាប់​អាវុធ​ស៊ូដង់ និង​កង​កម្លាំង​គាំទ្រ​រហ័ស (RSF)។ RSF បានដណ្ដើមកាន់កាប់អាកាសយានដ្ឋានអន្តរជាតិខាទូម និងវិមានប្រធានាធិបតីនៅរដ្ឋធានីខាទូម។
• ១៩ មេសា – មនុស្សយ៉ាងតិច ៩០ នាក់បានបាត់បង់ជីវិត ខណៈ ៣២២ នាក់ផ្សេងទៀតបានទទួលរងរបួសក្នុងឧប្បត្តិហេតុរត់ជាន់គ្នាក្នុងកម្មវិធីសប្បុរសធម៌រ៉ាម៉ាដាននៅទីក្រុងសាណា ប្រទេសយេម៉ែន។
• ២០ មេសា – រ៉ុក្កែតស្តារស្ស៊ីប (Starship) របស់ SpaceX ដែលត្រូវជារ៉ុក្កែតដ៏ធំ និងមានកម្លាំងខ្លាំងបំផុតមិនធ្លាប់មាន ត្រូវបានធ្វើតេស្តបាញ់បង្ហោះពីមូលដ្ឋាននៅទីក្រុងបូឆាឈីរ៉ានៃរដ្ឋតិចសាស់។ វាបានផ្ទុះនៅរយៈនាទីទីបួនក្រោយពីការបាញ់បង្ហោះ។
• ២៥ មេសា – ​អត្តឃាត​កម្ម​បែបសាសនា​ម្យ៉ាង​ត្រូវ​បាន​គេ​រក​ឃើញ​នៅ​ក្នុង​ព្រៃស្សាកាហូឡា ប្រទេស​កេនយ៉ា។ សាកស័ពរបស់សាវ័កនៃ"សាសនា"នោះចំនួន ២២៧ នាក់ត្រូវបានរកឃើញនៅក្នុងផ្នូរដីរាក់នៅពាសពេញបរិវេណព្រៃ។ មនុស្សជាង ៦១១ នាក់ផ្សេងទៀតនៅតែស្ថិតក្នុងសភាពការណ៍បាត់ខ្លួន។
• ៣០ មីនា – ការបោះឆ្នោតសកលប៉ារ៉ាក្វេឆ្នាំ២០២៣ ត្រូវបានប្រារព្ធធ្វើឡើង ដោយបេក្ខជននៃគណបក្សកូឡារ៉ាដូ លោកសានទីអាហ្កូ ប៉េញ្ញាបានក្លាយជាប្រធានាធិបតីជាប់ឆ្នោត ក្នុងលទ្ធផលឈ្នះភ្លូកទឹកភ្លូកដី។

ឧសភា

• ៤ ឧសភា – គ្រោះទឹកជំនន់ និងគ្រោះបាក់ដីបានរំជួយតំបន់ភាគខាងកើតនៃសាធារណរដ្ឋប្រជាធិបតេយ្យកុងហ្គោ ហើយបានសម្លាប់មនុស្សជាង ៤០០ នាក់។
• ៥ ឧសភា – អង្គការសុខភាពពិភពលោកបានបិទបញ្ចប់សេចក្ដីប្រកាសជំងឺកូវីដ-១៩ ជាគ្រោះអាសន្នសុខភាពសកល ប៉ុន្តែនៅបន្តសម្ដៅលើវាថាជាជំងឺរាតត្បាតសកល។
• ៦ ឧសភា – ពីធីរាជាភិសេករបស់ព្រះបាទឆាលស៍ទី៣ ជាព្រះមហាក្សត្រ និងព្រះរាជនីកាមីលឡាជាមហាក្សត្រិយានីនៃសហរាជាណាចក្រ និងសហធនរដ្ឋប៉ុន្មានផ្សេងទៀត បានប្រារព្ធធ្វើឡើងនៅវិហារវេស្តមីនស្ទើរ រាជធានីឡុងដ៍។
• ៧ ឧសភា – ប្រទេសស៊ីរីត្រូវបានទទួលបញ្ចូលទៅជាសមាជិកនៃសម្ព័ន្ធអារ៉ាប់ឡើងវិញ បន្ទាប់ពីសមាជិកភាពខ្លួនត្រូវបានព្យួរចាប់តាំងពីឆ្នាំ២០១១ មក។
• ៩ ឧសភា – ព្យុះស៊ីក្លូនម៉ូកា (Mocha) បានលេចចេញជារូបរាងឡើងនៅមហាសមុទ្រឥណ្ឌា ហើយបានបក់គួចវាយចូលប្រទេសមីយ៉ាន់ម៉ា និងបង់ក្លាដែស ដោយបានសម្លាប់មនុស្សជាង ៤០០ នាក់ និងធ្វើឱ្យមនុស្សម្នាជាង ៧០០ នាក់ផ្សេងទៀតទទួលរងរបួស។
• ១៤ ឧសភា
  • ការបោះឆ្នោតសកលថៃឆ្នាំ២០២៣ បានប្រព្រឹត្តិធ្វើឡើង ដោយមានគណបក្សនិយមប្រជាធិបតេយ្យដូចជា គណបក្សកាវក្លៃ (ឈានមុខ) និងគណបក្សភឿថៃ ទទួលបានអាសនៈភាគច្រើននៅក្នុងសភាតំណាងរាស្រ្តថៃ ខណៈដែលគណបក្សនិយមយោធាដូច គណបក្សកម្លាំងប្រជារដ្ឋបានបាត់បង់អាសនៈជាបន្តបន្ទាប់។
  • ការបោះឆ្នោតសភាតួកគីឆ្នាំ២០២៣ បានប្រារព្ធធ្វើឡើង ដោយសម្ព័ន្ធភាពប្រជាជនក្រោមការដឹកនាំរបស់ប្រធានាធិបតីកំពុងកាន់អំណាចលោករ៉េសិប តាយីប អ៊ែរដូហ្កាន បានបន្តរក្សាអាសនៈភាគច្រើនរបស់ខ្លួននៅក្នុងមហាសភាជាតិតួកគី។ ការ​បោះឆ្នោត​ប្រធានាធិបតីនេះ​នឹង​ឈានចូលទៅ​ដល់​ជុំទីពីរដែលគ្រោង​នឹងធ្វើឡើង​នៅ​ថ្ងៃ​ទី២៨ ខែ​ឧសភា។
• ១៩–២១ ឧសភា – កិច្ចប្រជុំកំពូលជី៧ លើកទី៤៩ បានផ្ដើមដំណើរការឡើងនៅទីក្រុងហ៊ីរ៉ូស៊ីម៉ា ប្រទេសជប៉ុន។ ប្រធានាធិបតីអ៊ុយក្រែនលោកហ្សេឡេនស្គីបានធ្វើដំណើរមកដល់ប្រទេសជប៉ុននៅថ្ងៃទីពីរនៃជំនួបកំពូលមួយនេះ។

ថ្ងៃ​មរណភាព

មករា

• ៦ មករា – ចានលូកា វៀលលី (Gianluca Vialli) កីឡាករ​បាល់ទាត់និងអ្នកគ្រប់គ្រងបាល់ទាត់អ៊ីតាលី (កើត ៩ កក្កដា ឆ្នាំ ១៩៦៤)
• ១០ មករា – កុងស្តង់ទីនទី ២ នៃក្រិក អតីតព្រះមហាក្សត្រក្រិក (ប្រសូត ២ មិថុនា ឆ្នាំ ១៩៤០)